ក្នុងលិខិតចំហមួយផ្ញើជូនប្រមុខរាជរដ្ឋាភិបាលថៃ លោកស្រី យីងទ្បាក់ ស៊ីណាវ៉ាត្រា និងចម្លងជូនឯកអគ្គរាជទូតថៃប្រចាំកម្ពុជា ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានសម្តែងក្តីបារម្ភយ៉ាងខ្លាំង ចំពោះការកើនទ្បើងគួរឲ្យតក់ស្លុតនូវចំនួននៃការវាយប្រហារលើជនស៊ីវិលកម្ពុជាក្នុងទឹកដីថៃ។
មជ្ឈមណ្ឌលសិទ្ធិមនុស្សកម្ពុជា បានដកស្រង់របាយការណ៍របស់ការិយាល័យទំនាក់ទំនងព្រំដែនកម្ពុជា-ថៃ ដែលបានកត់ត្រាថា ក្នុងអំទ្បុងឆ្នាំ២០១២ ជនស៊ីវិលខ្មែរ៤៥នាក់ ត្រូវបានបាញ់សម្លាប់ដោយទាហានថៃ។ ចំនួននេះមានការកើនទ្បើងបីដង បើប្រៀបធៀបតួលេខឆ្នាំ២០១១ ដែលមានអ្នកស្លាប់១៥នាក់។ រហូតមកដល់ឆ្នាំ២០១៣នេះ ប្រជាពលរដ្ឋខ្មែរចំនួន៦នាក់ ត្រូវបានបាញ់សម្លាប់ ហើយមានអ្នករបួស ឫអ្នកកំពុងតែបាត់ខ្លួនជាច្រើនទៀត។
មជ្ឈមណ្ឌលសិទ្ធិមនុស្សកម្ពុជា យល់ថាការបាញ់ប្រហារនេះ ជាសកម្មភាពខុសច្បាប់ និងរំលោភលើកតិកាសញ្ញាអន្តរជាតិ ស្តីពីសិទ្ធិពលរដ្ឋ និងសិទ្ធិនយោបាយ ដែលប្រទេសថៃបានយល់ព្រមកាលពីថ្ងៃទី២៩ ខែតុលា ឆ្នាំ១៩៩៦។ មជ្ឈមណ្ឌលសិទ្ធិមនុស្សកម្ពុជា បានទទូចឲ្យរាជរដ្ឋាភិបាលថៃ និងគណៈកម្មការជាតិទទួលបន្ទុកសិទ្ធិមនុស្សនៃប្រទេសថៃ បើកការស៊ើបអង្កេតមួយដោយហ្មត់ចត់ជាបន្ទាន់ និងប្រកបដោយភាពមិនលម្អៀងលើករណីបាញ់ប្រហារទាំងអស់ចំពោះជនស៊ីវិល និងរាល់ករណីសង្ស័យពីឃាតកម្មក្រៅប្រព័ន្ធតុលាការ ឫការសម្លាប់តាមអំពើចិត្តក្នុងទឹកដីប្រទេសថៃ៕
No comments:
Post a Comment
yes