ក្បួនដង្ហែរបស់ក្រុមអង្គការសង្គមស៊ីវិល និងកម្មករគ្រប់វិស័យ នៅតាមដងផ្លូវ
នារាជធានីភ្នំពេញ ក្នុងទិវាពលកម្មអន្តរជាតិ ថ្ងៃទី១ ឧសភា ឆ្នាំ២០១២
កម្មករនិយោជិតប្រមាណ ២ម៉ឺននាក់ គ្រោងថានឹងចូលរួមក្នុងការហែក្បួនធំមួយ នៅថ្ងៃអបអរទិវាពលកម្មអន្តរជាតិ ១ ឧសភា ដើម្បីទាមទារអោយរដ្ឋាភិបាល និងគណបក្សនយោបាយធំៗមួយចំនួន ដែលចូលរួមក្នុងការបោះឆ្នោតអាណត្តិទី៥ យល់ព្រមសន្យាឡើងប្រាក់ឈ្នួលសមរម្យ និងកែលំអលក្ខខណ្ឌការងារមួយចំនួនទៀត។
ប្រធានសហភាពការងារកម្ពុជា លោក អាត់ ធន់ មានប្រសាសន៍នៅព្រឹកថ្ងៃសៅរ៍ ទី២០ ខែមេសា ថា ការទាមទាររបស់ក្រុមកម្មករ នឹងត្រូវដាក់ជូនរដ្ឋាភិបាលផង និងតំណាងគណបក្សនយោបាយសំខាន់ៗមួយចំនួន ដែលត្រូវមើលឃើញថា អាចនឹងទទួលបានអាសនៈច្រើន ឬជាគណបក្សដែលអាចឈ្នះឆ្នោត។
លោក អាត់ ធន់ បន្តថា ការសន្យារបស់គណបក្សនយោបាយ គឺជាមូលដ្ឋានសម្រាប់អោយកម្មករទាំងអស់តាមដានការបំពេញតួនាទីរបស់គណបក្សនីមួយៗនៅក្រោយពេលជាប់ឆ្នោត៖ «ដែលយើងធ្លាប់ដើរ ប្រទេសមួយចំនួនក្នុងពិភពលោក គេតែងតែយកឱកាសនៃការបោះឆ្នោតនីមួយៗហ្នឹង ដើម្បីអោយអ្នកនយោបាយសន្យា។ ហើយបន្ទាប់មក បើពួកគេមិនធ្វើ បានន័យថាគេនឹងត្រូវរិះគន់ជាសាធារណៈ ហើយជាពិសេស ក្នុងចំណោមកម្មកររាប់ម៉ឺននាក់ ដោយសារគេសន្យាហើយ។ នៅអឺរ៉ុប នៅអាមេរិក គេធ្វើបែបហ្នឹង ឃើញមានប្រសិទ្ធភាពច្រើននៅពេលបោះឆ្នោតសំខាន់ៗ ជាពិសេសបោះឆ្នោតជាតិ»។
លិខិតរបស់សហភាពសហជីពកម្ពុជា ដាក់ជូនសាលារាជធានីភ្នំពេញ កាលពីថ្ងៃទី១១ ខែមេសា បង្ហាញថា ពិធីជួបជុំដើម្បីសាទរទិវាពលកម្មអន្តរជាតិថ្ងៃ ១ ឧសភា ខាងមុខ នឹងចាប់ផ្ដើមនៅពហុកីឡាដ្ឋានជាតិអូឡាំពិក បន្ទាប់មកនឹងដើរហែក្បួនទៅកាន់រដ្ឋសភា។ រហូតមកដល់ពេលនេះ នៅមិនទាន់មានការឆ្លើយតបយ៉ាងណាពីសាលារាជធានីភ្នំពេញនៅឡើយទេ។
ចំណែកមន្ត្រីជាន់ខ្ពស់នៃសមាគមរោងចក្រកាត់ដេរនៅកម្ពុជា លោក ជាតិ ខេមរា បានហៅការហែក្បួនរបស់កម្មករ ដែលដឹកនាំដោយក្រុមសហជីពថា ជាទង្វើឃ្លាតឆ្ងាយពីតួនាទីរបស់សហជីពដែលមិនជាប់ជំពាក់ក្នុងការបម្រើប្រយោជន៍គណបក្សនយោបាយ។ លោក ជាតិ ខេមរា បន្ថែមថា ការប្រើប្រាស់ការសន្យារបស់គណបក្សនយោបាយ មកធ្វើជាមូលដ្ឋានដំឡើងប្រាក់ឈ្នួល ទំនងជាការប្រើប្រាស់របត់នយោបាយ ដើម្បីដាក់សម្ពាធលើនិយោជក ខណៈដែលការដំឡើងប្រាក់ឈ្នួលថ្មីចុងក្រោយបំផុតនៅមិនទាន់បានអនុវត្តនៅឡើយ។
លោក ជាតិ ខេមរា៖ «បើយើងយកគណបក្សនយោបាយមកនៅពីក្រោយខ្នងហើយ បានន័យថា វានឹងគោលការណ៍លក្ខន្តិកៈរបស់សហជីពហើយ។ ខ្ញុំគិតថា វាមិនមែនជាចំណុចល្អទេសម្រាប់យកអ្នកវិនិយោគទៅច្របូកច្របល់នឹងនយោបាយ។ អ្នករកស៊ីគេអត់ខ្វល់ពីនយោបាយទេ ដោយសារគេគិតពីរកស៊ីអោយមានស្ថិរភាពហ្នឹងគេរកស៊ី»។
រដ្ឋាភិបាលកម្ពុជា កាលពីខែមីនា បានសម្រេចដំឡើងប្រាក់ឈ្នួលគោលដល់កម្មករក្នុងវិស័យកាត់ដេរអោយបាន ៨០ដុល្លារក្នុង១ខែ ដែលសេចក្ដីសម្រេចនោះនឹងត្រូវចាប់ផ្ដើមអនុវត្តន៍ពីខែឧសភា។ ប៉ុន្តែ ក្រុមសហជីពកម្មករជាច្រើន ពុំបានយល់ស្របចំពោះសេចក្ដីសម្រេចនេះទេ គឺពួកគេនៅតែប្រកាន់ជំហរទាមទារប្រាក់ឈ្នួលគោលសម្រាប់កម្មករនោះអោយបានយ៉ាងតិច ១០០ដុល្លារក្នុង១ខែ។
ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍ថា ការទាមទាររបស់កម្មករដើម្បីអោយគណបក្សនយោបាយសន្យាផ្ដល់អត្ថប្រយោជន៍ដល់ពួកគេនៅមុនការបោះឆ្នោត គឺជាសិទ្ធិរបស់ពលរដ្ឋដែលបានធានាដោយច្បាប់ គឺពុំមែនជាទង្វើខុសច្បាប់ណាមួយឡើយ៖ «ការដែលសហជីពហៅគណបក្សនយោបាយមកស្តាប់កង្វល់ ហើយឆ្លើយតបនឹងការស្នើសុំការព្រួយបារម្ភរបស់សហជីពរបស់កម្មករហ្នឹង មិនមែនជាទង្វើមួយដែលសហជីពបម្រើប្រយោជន៍នយោបាយអោយគណបក្សនយោបាយទេ។ ប៉ុន្តែ គឺជាអ្វីដែលសហជីពជំរុញអោយគណបក្សនយោបាយទទួលខុសត្រូវចំពោះការសន្យារបស់ខ្លួន»។
ដូចគ្នានឹងការដើរហែក្បួនអបអរទិវា ១ឧសភា ជារៀងរាល់ឆ្នាំដែរ ក្នុងឆ្នាំនេះ សហជីពកម្មករអះអាងថា ពួកគេនឹងនៅតែប្រកាន់ជំហរដើរហែក្បួនអោយខាងតែបាន បើទោះជាសំណើរបស់ពួកគេមិនត្រូវបានការអនុញ្ញាតពីអាជ្ញាធររាជធានីភ្នំពេញ៕
No comments:
Post a Comment
yes