លោក ហ៊ុន សែន ថ្លែងកាលពីម្សិលមិញថា លោកនឹងជំរុញឲ្យមានការបង្កើត
ច្បាប់ដាក់ទោសអ្នកដែលថាគ្មានរបបខ្មែរក្រហម
គណបក្សសង្គ្រោះជាតិ ដែលជាគណបក្សប្រឆាំងនៅកម្ពុជា បានចេញសេចក្តីថ្លែងការណ៍មួយនៅថ្ងៃអង្គារនេះ គាំទ្រការបង្កើតច្បាប់ស្តីពីការដាក់ទោសលើបុគ្គលណាដែលនិយាយថា គ្មានរបបប្រល័យពូជសាសន៍នៅកម្ពុជា។
ការបង្ហាញជំហរគាំទ្រលើការបង្កើតឲ្យមានច្បាប់នេះ គឺបន្ទាប់ពីលោកនាយករដ្ឋមន្ត្រី ហ៊ុន សែន កាលពីម្សិលមិញបានប្រកាសក្នុងពិធីសម្ពោធមហាកុដិ ក្នុងវត្តលង្ការថា លោកនឹងជំរុញឲ្យសមាជិកសភាគណបក្សប្រជាជនកម្ពុជា និងគណបក្សហ្វ៊ុនស៊ិនប៊ិចបង្កើតច្បាប់ដាក់ទោសចំពោះអ្នកនិយាយថា របបខ្មែរក្រហមគ្មានអំពើប្រល័យពូជសាសន៍។
នៅក្នុងសុន្ទរកថាកាលពីម្សិលមិញលោកនាយករដ្ឋមន្ត្រី ហ៊ុន សែន បានបញ្ចេញប្រតិកម្មខ្លាំងៗ និងបាននិយាយវាយប្រហារ លោក កឹម សុខា ប្រធានស្តីទីគណបក្សសង្គ្រោះជាតិ ដែលជាដៃគូរប្រជែងរបស់លោក ទាក់ទងនឹងសំណុំរឿងមន្ទីរ ស-២១ នៃរបបខ្មែរក្រហម ថាជាកន្លែងសិប្បនិម្មិត។
លោកថ្លែងថា៖ «ខ្ញុំសង្ឃឹមថា អ្វីក៏ដោយដែលប្រកាសបែបនោះនឹងត្រូវតែទទួលខុសត្រូវ។ បញ្ហានេះគឺជាបញ្ហាជាតិ។ នៅអឺរ៉ុបនរណាក៏ដោយដែលហ៊ាននិយាយថា ហ៊ីត្លែរ មិនសម្លាប់ប្រជាជនអ្នកនោះត្រូវតែមានទោស»។
លោក កឹម សុខា បានប្រាប់ភ្នំពេញប៉ុស្តិ៍កាលពីម្សិលមិញដែរថា ឯកសារថតជាសំឡេងនោះត្រូវគេកាត់តយកពាក្យសម្តីរបស់លោកឲ្យនៅ ក្រៅបរិបទ។ លោកអះអាងថា សម្តីនោះលោកថ្លែងច្រើនខែមកហើយគឺមិនមែនប៉ុន្មានសប្តាហ៍នោះទេ ហើយការលេចចេញពេលនេះ គឺដោយសារតែជិតដល់ពេលបោះឆ្នោត។
អង្គភាពព័ត៌មាននិង ប្រតិកម្មរហ័សនៃទីស្តីការគណៈរដ្ឋមន្រ្តី កាលពីថ្ងៃទី២០ ឧសភាបានបង្ហោះឯកសារសំឡេងនៅក្នុងគេហទំព័រខ្លួន ដែលគេសន្មតជាសុន្ទរកថាដែលលោក កឹម សុខា ធ្វើឡើងកាលពី ២ថ្ងៃមុននៅខេត្តព្រៃវែង និងខេត្តតាកែវ ដែលត្រូវគេឮអំពីការសង្ស័យពាក់ព័ន្ធនឹងភាពត្រឹមត្រូវនៃស‑២១ ឬគុកទួលស្លែងដែលមនុស្សជិត១៣.០០០នាក់ត្រូវគេគិតថា បានទទួលរងទារុណកម្មពីឆ្នាំ១៩៧៥ រហូតដល់ ១៩៧៩។
នៅក្នុងសេចក្តីថ្លែងការណ៍របស់គណបក្សសង្គ្រោះជាតិ បានលើកឡើងថា ប្រព័ន្ធផ្សព្វផ្សាយមួយចំនួន តាមរយៈវេទិកាសាធារណៈ ពិធីសម្ពោធសមិទ្ធិផលបានថ្លែងពីនេះពីនោះ ដោយព្យាយាមវាយប្រហារពាក្យសម្តីថែមថយ មកលើថ្នាក់ដឹកនាំគណបក្សសង្គ្រោះជាតិ ។
សេចក្តីថ្លែងការណ៍បន្តថា គណបក្សសង្គ្រោះជាតិ ថ្កោលទោសចំពោះបុគ្គលណា ក្រុមណា ដែលព្យាយាមញុះញង់បំបែកបំបាក់ខ្មែរ បំផ្លើសបំភ្លៃការពិត មកលើថ្នាក់ដឹកនាំគណបក្សសង្គ្រោះជាតិក្នុងគំនិតទុច្ចរិត កេងចំណេញនយោបាយ ចង់បង្កឲ្យមានភាពច្របូកច្របល់ អស្ថិរភាពសង្គម នៅក្នុងរយៈពេលមុនការបោះឆ្នោតជ្រើសតាំងតំណាងរាស្ត្រ នីតិកាលទី៥ ថ្ងៃទី ២៨ ខែកក្កដា ឆ្នាំ២០១៣។
No comments:
Post a Comment
yes