កងទ័ពកម្ពុជាធ្វើសមយុទ្ធយោធា កាលពីដើមខែមេសានៅខេត្តកំពង់ស្ពឺ
សហរដ្ឋអាមេរិកនិងរាជរដ្ឋាភិបាលកម្ពុជា នឹងចូលរួមក្នុងលំហាត់សមយុទ្ធយោធារួមគ្នា ដែលមានឈ្មោះថា ឆ្មាំអង្គរ នៅថ្ងៃ ១៦ ដល់ថ្ងៃទី ២៩ ខែឧសភា ឆ្នាំ ២០១៣ នៅខេត្តកំពង់ស្ពឺ។
យោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជាបានឲ្យដឹងថា ឆ្មាំអង្គរឆ្នាំ ២០១៣ គឺជាលំហាត់សមយុទ្ធទ្វេភាគីធំមួយ ដែលជាការបន្តការខិតខំប្រឹងប្រែងលើរយៈពេលច្រើនឆ្នាំ របស់កងកម្លាំងទ័ពសហរដ្ឋអាមេរិកប្រចាំនៅតំបន់ប៉ាស៊ីហ្វិក និងបញ្ជាការដ្ឋានសហរដ្ឋអាមេរិកប្រចាំតំបន់ប៉ាស៊ីហ្វិក ដើម្បីចូលរួមឲ្យបានសកម្មជាមួយកងយោធពលខេមរភូមិន្ទ ហើយពង្រីកប្រតិបត្តិការថែរក្សាស្ថេរភាព និងសន្តិភាព។
ឆ្មាំអង្គរគឺជាលំហាត់សមយុទ្ធទ្វេភាគីប្រចាំឆ្នាំ ដែលឧបត្ថម្ភដោយកងកម្លាំងទ័ពសហរដ្ឋអាមេរិកប្រចាំនៅតំបន់ប៉ាស៊ីហ្វិក ដោយកងយោធពលខេមរភូមិន្ទធ្វើជាម្ចាស់ផ្ទះ។ ឆ្មាំអង្គរឆ្នាំ ២០១៣ គឺជាលំហាត់សមយុទ្ធចុងក្រោយ ក្នុងចំណោមលំហាត់សមយុទ្ធដែលមានលក្ខណៈស្វិតស្វាញ និងច្រើន វិញ្ញាសារបន្តបន្ទាប់គ្នា ដែលមានធ្វើជាបន្ត ដើម្បីលើកកំពស់សន្តិភាព និងសន្តិសុខក្នុងតំបន់។ លំហាត់សមយុទ្ធនេះកត់សំគាល់ខួបលើកទី ៤ នៃលំហាត់សមយុទ្ធប្រចាំតំបន់ប្រកបដោយផ្លែផ្កា និងមានអត្ថន័យយ៉ាងសំខាន់។
លោក Jeff Daigle អនុប្រធានស្ថានទូតសហរដ្ឋអាមេរិក នឹងចូលរួមបើកលំហាត់សមយុទ្ធនេះ នៅថ្ងៃព្រហស្បតិ៍ ទី១៦ ខែឧសភានេះ វេលាម៉ោង ៩ ព្រឹក នៅមជ្ឈមណ្ឌលហ្វឹកហ្វឺនកងកម្លាំងថែរក្សាសន្តិភាពពហុជាតិ នៅតាមផ្លូវជាតិលេខ ៤ ភូមិទួល ឃុំមហាសាំង ស្រុកភ្នំស្រួច ខេត្តកំពង់ស្ពឺ។
ក្នុងលំហាត់សមយុទ្ធរយៈពេល ១៤ ថ្ងៃ កងកម្លាំងទ័ពសហរដ្ឋអាមេរិកប្រចាំនៅតំបន់ប៉ាស៊ីហ្វិកនិងកងយោធពលខេមរភូមិន្ទនឹងផ្តោតលើប្រតិបត្តិការផ្តល់ជំនួយមនុស្សធម៌ និងថែរក្សាសន្តិភាព ដែលរួមមានលំហាត់សមយុទ្ធតាមកងវរសេនាតូច លំហាត់សមយុទ្ធលើទីលានប្រឆាំងយុទ្ធភណ្ឌផ្ទុះកែច្នៃ សកម្មភាពពេទ្យក្នុងសមរភូមិដើម្បីជួយកងទ័ពកម្ពុជា ក្នុងបេសកកម្មថែរក្សាសន្តិភាពរបស់អង្គការសហប្រជាជាតិ។
នៅក្នុងលំហាត់សមយុទ្ធនេះ បុគ្គលិកទាហានអាមេរិកនិងកម្ពុជាដែលចូលរួម នឹងទទួលបានការបង្រៀនលើប្រព័ន្ធទំនាក់ទំនងនិងកុំព្យូទ័រ ការបណ្តុះបណ្តាលបុគ្គលិក និងការកសាងក្រុម។
សកម្មភាពទាំងនេះមានភាពចាំបាច់សម្រាប់ដោះស្រាយភារកិច្ចស្មុគស្មាញផ្នែកសន្តិសុខ។ លើសពីនេះទៀត អ្នកចូលរួមនឹងមានការផ្លាស់ប្តូរបទពិសោធន៍គ្នាស្តីពីការងារតាមអង្គភាពតូចៗដែលធ្វើបានល្អ និងការវាយតំលៃកងទ័ព ដែលមានបំណងសង្គ្រោះជីវិត ហើយការពារកុំឲ្យមានការរាំងស្ទះដល់ប្រតិបត្តិការយោធា។
No comments:
Post a Comment
yes