ជនជាប់ចោទវាយអ្នកកាសែត ដេវិដ ឆាណាយវា និងក្មួយប្រុស
ពេលនាំឡើងតុលាការ
អតីតមេធាវីលោក ដេវិដ ឆាណាយវាត្រូវសាលាឧទ្ធរណ៍ឲ្យរួចខ្លួនកាលពីថ្ងៃព្រហស្បតិ៍ ពីបទប្រើអំពើហិង្សានៅខេត្តព្រះសីហនុ ក្នុងឆ្នាំ ២០០៧។
លោកស្រី ចាន់ ម៉ាឌីណា ប្រធានក្រុមប្រឹក្សាជំនុំជម្រះបានថ្លែងថា សាលាឧទ្ធរណ៍សម្រេចឲ្យជនជាប់ចោទ ដេវិដ ឆាណាយវា ជាពាណិជ្ជកររួចផុតពីបទចោទពី ការប្រើអំពើហិង្សាក្នុងករណីដីធ្លីមួយ នៅក្នុងសង្កាត់លេខ៤ ក្រុងព្រះសីហនុ ពីថ្ងៃទី៩ ខែមិថុនា ឆ្នាំ ២០០៧។ លោកស្រីបន្តថាតុលាការ បដិសេធសាលក្រមសាលាដំបូងខេត្តព្រះសីហនុ។ ទុកសិទ្ធិប្តឹងសារទុក្ខតាមកំណត់ច្បាប់។
សាលាដំបូងខេត្តព្រះសីហនុ នៅថ្ងៃទី២៥ ខែមករាឆ្នាំ ២០១១ បានផ្តន្ទាទោស ដេវិដ ឆាណាយវា ដាក់ពន្ធនាគារ១ឆ្នាំ និងបង្គាប់ឲ្យសងប្រាក់ជនរងគ្រោះ២០លានរៀលពីបទប្រើអំពើហិង្សា។
ក្នុងសវនាការឧទ្ធរណ៍កន្លងមក កែវ សារី ជាជនរងគ្រោះ បានឲ្យដឹងថា គាត់ទិញដីនេះពីឈ្មោះ នៅ ប៊ូរ៉ា ក្បាល១២ម៉ែត្របណ្តោយ៤០ម៉ែត្រ បានធ្វើរបងព័ទ្ធដី។ នៅថ្ងៃទី៩ ខែមិថុនា ឆ្នាំ២០០៧ ក្រុម ដេវិដ ឆាណាយវា បានមកព័ទ្ធរបងថ្មី អ្នកចាំដីគាត់ប្រាប់អាជ្ញាធរ ហើយអាជ្ញាធរបានមកឃាត់ដែរ តែក្រុមឆាណាយវាមិនស្តាប់។
តាមចម្លើយ ឆាណាយវា ដែលអវត្តមាន ហើយអានដោយក្រឡាបញ្ជីថា គាត់ទិញដីនោះពីឈ្មោះ នៅ ប៊ូរ៉ា ក្នុងតម្លៃ៣ពាន់ដុល្លារ មានកិច្ចសន្យាមួយច្បាប់ តែឯកសារនោះបានបាត់។ គាត់មិនបំពានដីគេទេ និងធ្វើរបងត្រឹមតែដីគាត់ហើយសុំឲ្យតុលាការលើកលែងបទចោទ។
លោក ឆាណាយវា អាយុ៤១ឆ្នាំ ខ្មែរសញ្ជាតិអាមេរិកបានចូលមកកម្ពុជាក្នុងឆ្នាំ១៩៩៤ ធ្លាប់ជានគរបាលជាទីប្រឹក្សាលោក ជា ស៊ីម ប្រធានព្រឹទ្ធសភា និងធ្លាប់ជាមេធាវីតែត្រូវលុបឈ្មោះចេញពីបញ្ជីមេធាវី ក្នុងឆ្នាំ២០០៣។
លោក ឆាណាយវា និងក្មួយប្រុស ប្រាក់ អូហ្វី ហៅ ម៉ាអូហ្វី និស្សិត អាយុ២០ឆ្នាំ ត្រូវចាប់ខ្លួននៅថ្ងៃទី១៩មីនា ពីបទស្ថិតក្នុងជន៧នាក់ដែលវាយអ្នកសារព័ត៌មាន ក្នុងគ្រោះថ្នាក់ចរាចរណ៍មួយ ត្រូវបញ្ជូនទៅឃុំខ្លួននៅព្រៃស។
គួររំឭកថា កាលពីថ្ងៃទី២០ខែឧសភាសាលាដំបូងរាជធានីបានបើកជំនុំជម្រះករណី ដេវិដ ឆាណាយវា និងអតីតរដ្ឋលេខាធិការក្រសួងយុត្តិធម៌ យាន ស៊ីណា ចោទប្រកាន់ពីបទវាយអ្នកកាសែតនៅយប់ថ្ងៃទី១៨មីនា។ ប៉ុន្តែត្រូវបានពន្យារដោយសារមេធាវីលោក ឆាណាយវា ធ្វើពហិការដើរចេញពីបន្ទប់សវនាការ ហើយចុងចោទឆាណាយវា ក៏បានស្នើសុំផ្លាស់ប្តូរចៅក្រមសវនាការសម្រាប់សំណុំរឿងរបស់គាត់ផង។
ការពន្យារសវនាការធ្វើឡើងបន្ទាប់ពីមានការចម្រូងចម្រាសរវាងចៅក្រមលោកស្រី ចាំង ស៊ីណាត និងព្រះរាជអាជ្ញារងលោក លី សុផាន់ណា និងមេធាវីលោក ឆាណាយវា។ ឆាណាយវា កំពុងប្រឈមនឹងបទចោទចំនួន២គឺការប្រើប្រាស់អាវុធខុសច្បាប់និងអំពើហិង្សាទៅលើអ្នកកាសែត។ ករណីប្រើខុសច្បាប់គាត់ត្រូវកាត់ទោសកំបាំងមុខឲ្យជាប់ពន្ធនាគារ១៨ខែកាលពីថ្ងៃទី២៩ ខែកុម្ភៈ ឆ្នាំ ២០១៣៕
No comments:
Post a Comment
yes