សហភាពសហជីពកម្ពុជា អំពាវនាវកុំឲ្យមន្ត្រីរាជការ កម្មករ និងពលរដ្ឋ ចូលរួមធ្វើបាតុកម្មប្រឆាំងមេដឹកនាំបក្សប្រឆាំង ដែលរងការចោទថា មិនទទួលស្គាល់របស់របបវាលពិឃាតខ្មែរក្រហម ដោយចាត់ទុកថា ទង្វើនោះជារូបភាពកេងចំណេញ ផ្នែកនយោបាយ។
តាមលិខិតអំពាវនាវរបស់ប្រធានសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា លោក រ៉ុង ឈុន ផ្សព្វផ្សាយនៅថ្ងៃទី៨ ខែមិថុនានេះ បានអំពាវនាវឲ្យ សមាជិក សមាជិការ កម្មករ កម្មការិនី គ្រូបង្រៀន មន្ត្រីរាជការ ពលរដ្ឋ កុំចូលរួមធ្វើបាតុកម្មនៅថ្ងៃទី៩ ខែមិថុនាស្អែកនេះ ដែលដឹកនាំដោយមនុស្សមួយក្រុម ជាជនរងគ្រោះក្នុងរបបខ្មែរក្រហម ដើម្បីប្រឆាំងនឹងប្រធានស្តីទីគណបក្សសង្គ្រោះជាតិ គឺ លោក កឹម សុខា ដោយចាត់ទុកថា គម្រោងរៀបចំឲ្យមានបាតុកម្មនេះជារឿងនយោបាយ ដែលរៀបចំឡើងដោយបក្សកំពុងកាន់អំណាច។
លោក រ៉ុង ឈុន ពន្យល់ក្នុងលិខិតនោះថា ការធ្វើបាតុកម្មនេះ មិនមែនប្រឆាំងនឹងបរទេសឈ្លានពានទឹកដី ការកាប់បំផ្លាញព្រៃឈើ អំពើពុករលួយ អយុត្តិធម៌សង្គម និងមិនមែនទាមទារដំឡើងប្រាក់ខែនោះទេ គឺជាបាតុកម្មគ្រាន់តែបំពេញចិត្តអ្នកដឹកនាំ ដែលកំពុងគ្រប់គ្រងអំណាចតែប៉ុណ្ណោះ។
ការអំពាវនាវរបស់ លោក រ៉ុង ឈុន នេះ ធ្វើឡើងមុនមួយថ្ងៃប៉ុណ្ណោះ ដែលប្រធានសមាគមក្សេមក្សាន្ត របស់ លោក ជុំ ម៉ី ប្រកាសដឹកនាំធ្វើមហាបាតុកម្ម ប្រឆាំងនឹង លោក កឹម សុខា នៅថ្ងៃអាទិត្យស្អែកនេះ ជុំវិញអ្វីដែលមន្ត្រីជាន់ខ្ពស់បក្សប្រឆាំងរូបនោះហៅ គុកទួលស្លែង ដែលធ្វើទារុណកម្មសម្លាប់មនុស្សនាសម័យខ្មែរក្រហម ថា រៀបចំឡើងដោយប្រទេសវៀតណាម៕
No comments:
Post a Comment
yes