គំនរឈើដែលក្រុមហ៊ុនកាប់ធ្វើអាជីវកម្មយ៉ាងគគ្រឹកគគ្រេង នៅក្នុងខេត្តរតនគិរី
រាជរដ្ឋាភិបាលកម្ពុជាបានសម្រេចឲ្យលោកឧកញ៉ា ទ្រី ភាពទីប្រឹក្សាលោកនាយករដ្ឋមន្ត្រីនិងជាឈ្មួញរកស៊ីកែច្នៃឈើដ៏ល្បីបង្កើតតំបន់សេដ្ឋកិច្ចពិសេស«ទ្រីភាពអូរយ៉ាដាវ» លើផ្ទៃដី១៣៦ហិកតានៅក្នុងភូមិ-ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរីជាប់នឹងព្រំដែនកម្ពុជា-វៀតណាម។ នេះបើតាមសៀវភៅរាជកិច្ច ចុះថ្ងៃទី២៧ ខែឧសភា។
នៅក្នុងសៀវភៅរាជកិច្ចរបស់ទីស្តីការគណៈរដ្ឋមន្ត្រី ចេញផ្សាយថ្ងៃទី២៧ ខែឧសភានោះបង្ហាញថា នៅថ្ងៃទី៧ ខែឧសភាមុននេះលោកនាយករដ្ឋមន្ត្រី ហ៊ុន សែន បានចុះហត្ថលេខាសម្រេចឲ្យបង្កើតតំបន់សេដ្ឋកិច្ចពិសេស ទី្រ ភាព អូរយ៉ាដាវ លើផ្ទៃដី១៣៦ ហិកតា នៅក្នុងភូមិ-ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។ ប៉ុន្តែក្នុងមាត្រាទី៣នៃអនុក្រឹត្យនោះបញ្ជាក់ថា ការរៀបចំនិងការប្រព្រឹត្តទៅនៃតំបន់សេដ្ឋកិច្ចពិសេសថ្មីនេះ ស្ថិតក្រោមវិសាលភាពនៃច្បាប់និងបទប្បញ្ញត្តិនានា នៃព្រះរាជាណាចក្រកម្ពុជា។
នៅក្នុងមាត្រា៤នៃអនុក្រឹត្យចង្អុលបង្ហាញថា រដ្ឋមន្ត្រីទីស្តីការគណៈរដ្ឋមន្ត្រី រដ្ឋមន្ត្រី រដ្ឋលេខាធិការក្រសួងស្ថាប័នពាក់ព័ន្ធក្រុមប្រឹក្សាអភិវឌ្ឍន៍កម្ពុជា អភិបាលខេត្តរតនគិរី និងក្រុមហ៊ុនទ្រី ភាពត្រូវអនុវត្តឲ្យមានប្រសិទ្ធភាព ចាប់ពីថ្ងៃចុះហត្ថលេខាតទៅ។
លោក សុក ចិន្តាសោភា ជាអគ្គលេខាធិការក្រុមប្រឹក្សាអភិវឌ្ឍន៍កម្ពុជាដែលចុះហត្ថលេខា លើអនុក្រឹត្យនោះពុំអាចទាក់ទងសុំការអត្ថាធិប្បាយបញ្ជាក់បានទេ កាលពីថ្ងៃម្សិលមិញ។
សូមរំឭកថា ពីថ្ងៃទី១ ខែមីនា ឆ្នាំ ២០១៣ ក្រសួងកសិកម្ម រុក្ខាប្រមាញ់និងនេសាទ ប្រធានរដ្ឋបាលព្រៃឈើ បានអនុញ្ញាតឲ្យក្រុមហ៊ុន អឹម ឌី អេស ប្រមូលទិញនិងបង្កើតរោងចក្រកែច្នៃវល្លិរមៀត នៅក្នុងអាងស្តុកទឹកវារីអគ្គិសនីស្ទឹងអាតៃ ដែលមិនប៉ះពាល់ព្រៃឈើនិងបរិស្ថាន និងតម្រូវឲ្យបង់ថ្លៃសួយសារនិងបុព្វលាភចូលថិវការដ្ឋ។ នៅខែកុម្ភៈឆ្នាំ ២០១៣ ក្រសួងកសិកម្មក៏បានចុះហត្ថលេខាផ្តល់សិទ្ធិផ្តាច់មុខឲ្យក្រុមហ៊ុនទ្រី ភាពប្រមូលទិញឈើ ដែលគេកាប់រួចនៅតំបន់ដីសម្បទានសេដ្ឋកិច្ច ក្នុងខេត្តរតនគិរីផងដែរ។
លោកឧកញ៉ា ទ្រី ភាព មិនអាចទាក់ទងសុំធ្វើការអត្ថាធិប្បាយបញ្ជាក់បានទេប៉ុន្តែ លោក ប៊ី ជីវ័នតារា ជំនួយការលោកបានប្រាប់កាសែតក្នុងស្រុកថា តំបន់សេដ្ឋកិច្ចពិសេសនេះត្រូវអភិវឌ្ឍជាច្រើនផ្នែកនិងដំណាក់ ដូចជា សង់សណ្ឋាគារកម្ពស់៥ជាន់ មាន១០០បន្ទប់ អគារកាស៊ីណូ និងអគារស្នាក់នៅរបស់បុគ្គលិកមានតម្លៃ៥លានដុល្លារ និងចំណាយ៣លានដុល្លារទៀតលើការសង់ផែស្ងួត អគាររដ្ឋបាល ស្ថានីយប្រេង ចំណតរថយន្ត ផ្សារនិងផ្ទះល្វែង។ ចំណែកតម្រូវការបុគ្គលិក បម្រើការក្នុងកាស៊ីណូនិងផែស្ងួត អាចមានចំនួនជាង៥០០នាក់។ តាមប្រភពដដែលនេះថា ជំហានបន្ទាប់ក្រុមហ៊ុនត្រូវសង់រោងចក្រកៅស៊ូក្នុងបរិវេណផែស្ងួត និងហេដ្ឋារចនាសម្ព័ន្ធផ្សេងៗ ដោយចំណាយ២០លានដុល្លារទៀត។
តាមរបាយការណ៍របស់អង្គការឃ្លាំមើលពិភពលោក(Global Witness)ក្នុងខែឧសភា បានរកឃើញថា ត្រឹមចុងឆ្នាំ២០១២ រដ្ឋាភិបាលបានជួលដីជាសម្បទានសេដ្ឋកិច្ចប្រមាណ ២លាន៦សែនហិកតា ទៅឲ្យក្រុមហ៊ុនជាច្រើន។ ក្នុងនោះ មានក្រុមហ៊ុនវៀតណាមពីរគឺក្រុមហ៊ុនហួងអាញ់ យ៉ាឡាយ ដែលជិតស្និទ្ធជាមួយនឹងឧកញ៉ា ទ្រី ភាព លើផ្ទៃដីជិត៥ម៉ឺនហិកតា(៤៧.៣៧០ហិកតា)និងក្រុមហ៊ុនរ៉ាប់បឺគ្រុប ត្រូវសង្ស័យថា កំពុងរកស៊ីដៃគូជាមួយអ្នកស្រី សេង គាង អតីតភរិយាលោក ឌី ចូច ជាសាច់ញាតិលោកនាយករដ្ឋមន្ត្រី មានជាង១៦ម៉ឺនហិកតា(១៦១.៣៤៤ហិកតា)។
លោក ឆាយ ធី មន្ត្រីសម្របសម្រួលសមាគមការពារសិទ្ធិមនុស្សអាដហុកថ្លែងឲ្យដឹងថា អ្វីដែលរដ្ឋាភិបាលសម្រេចនេះ មិនមែនជាសញ្ញាល្អសម្រាប់ការការពារដីរបស់ជនជាតិភាគតិច ឬក៏ព្រៃឈើនៅក្នុងខេត្តទេ ព្រោះមានបទល្មើសព្រៃឈើនិងទំនាស់ដីធ្លីស្ទើរគ្រប់តំបន់នៅក្នុងខេត្តដោយសារតែដីសម្បទានសេដ្ឋកិច្ច៕
No comments:
Post a Comment
yes