គណបក្សប្រជាជនកម្ពុជាក្នុងខេត្ដសៀមរាប រងការចោទពីគណបក្សសង្គ្រោះជាតិថា បានចាប់ផ្ដើមចុះឃោសនារកសំឡេងឆ្នោត មុនគណៈកម្មាធិការជាតិរៀបចំការបោះឆ្នោតអនុញ្ញាត ដែលគណបក្សប្រឆាំងលើកឡើងថា នេះជាករណីខុសច្បាប់។
ប្រធានក្រុមការងារ គណបក្សសង្គ្រោះជាតិខេត្ដសៀមរាប លោក សុខ គឹមសេង ប្រាប់នៅព្រឹកថ្ងៃចន្ទនេះថា គណបក្សកាន់អំណាច បានដើរឃោសនាបោះឆ្នោតជាតិ យកទង់ និងខិតប័ណ្ណគណបក្ស ដែលមានរូបថ្នាក់ដឹកនាំទាំងបី គឺ លោក ជា ស៊ីម លោក ហេង សំរិន និងលោកហ៊ុន សែន បិទតាមដើមឈើ និងតាមផ្ទះប្រជាពលរដ្ឋ នៅស្រុកពួក និងតាមស្រុកជាច្រើនក្នុងខេត្ដសៀមរាប។ លោកបន្ដថា គណបក្សកាន់អំណាចធ្វើបែបនេះ ធ្វើឲ្យគណៈបក្សសង្គ្រោះជាតិ ពិបាកចុះទាក់ទងជាមួយប្រជាពលរដ្ឋទាំងនោះ ហើយមិនគោរពតាមច្បាប់ គ.ជ.ប ៖"នេះជាទម្លាប់ហើយដែលគណបក្សប្រជាជន មិនដែលគោរពច្បាប់នោះ មិនត្រឹមតែធ្វើការឃោសនាបោះឆ្នោតទេ សូម្បីតែការប្រើប្រាស់ធនធានរបស់រដ្ឋ ក៏ជាការរំលោភ មានន័យថា ប្រើតែឯង ហើយខុសច្បាប់ដែរ ដូចជាការប្រើបា្រស់រថយន្ដរបស់រដ្ឋ ដើម្បីធ្វើការឃោសនា ប្រើរដ្ឋយន្ដរបស់រដ្ឋ ដើម្បីធ្វើការប្រើមធ្យោបាយក្នុងការដឹកស្លាកសញ្ញា របស់ខ្លួនឯងយកទៅបោះ ឫក៏ជាមួយនឹងសកម្មជន" ។
អភិបាលស្រុកពួក ខេត្ដសៀមរាប លោក ពេជ្រ សុខាល័យ បានបដិសេធចំពោះការចុះឃោសនា ឬបិទតាមខិត្ដប័ណ្ណនៅទីសាធារណៈ តែលោកទទួលការបិទស្លាកសញ្ញាគណបក្ស ដែលមានរូបថ្នាក់ដឹកនាំទាំងបីនោះ នៅតាមផ្ទះប្រជាពលរដ្ឋ ដែលលោកអះអាងថា ជាផ្ទះសកម្មជនរបស់គណបក្ស ៖ "បាទតាមពិតគឺជាសិទ្ធិរបស់គណបក្ស បាទក៏ព្រោះថា គណបក្សណា បាទគេមានសិទ្ធិរបស់គេ ក្នុងការរៀបចំនៅឯកសារ សម្រាប់គណបក្សហ្នឹងទៅតាមផ្ទះសមាជិករបស់គេ អញ្ចឹងប្រជាជនដែល បានទទួលការបិទមានតែរូបថតរបស់ថ្នាក់ដឹកនាំគណបក្សទាំងបី ហើយនឹងទង់គណបក្ស ដែលគេបានដាក់នៅតាមផ្ទះ" ។
VODមិនអាចទាក់ទង ប្រធានគណបក្សប្រជាជនកម្ពុជាខេត្ដសៀមរាប លោក ឃឹម ប៊ុនសុង ដើម្បីសុំការបកស្រាយ ពីការចោទប្រកាន់នេះបានទេនៅថ្ងៃចន្ទនេះ។
ប្រធានគណៈកម្មការរៀបចំការបោះឆ្នោត ប្រចាំខេត្ដសៀមរាប(គខប) លោក នឹម វ៉ាន់សំ មានប្រសាសាសន៍ថា ការធ្វើសម្មភាពនេះ មិនមែនជាដែនសមត្ថកិច្ចរបស់គណៈកម្មការរៀបចំការបោះឆ្នោតខេត្ដនោះឡើយ ៖ "អ្វីៗនេះចេញពីអាជ្ញាធរដែនដី មិនមែនជាភារៈរបស់ខាងគណៈកម្មការបោះឆ្នោតទេ ដូច្នេះមុន សកម្មភាពមុនការឃោសនា ជាការដែលមានការទទួលខុសត្រូវ ឫក៏មានការអនុញ្ញាត ឫក៏មានការសម្រុះសម្រួលគ្នាហ្នឹង នៅថ្នាក់អាជ្ញាធរមូលដ្ឋាន" ។
នាយកប្រតិបត្ដិអង្គការឃ្លាំមើលការបោះឆ្នោត ហៅកាត់ថា និចហ្វិច លោក ហង្ស ពុទ្ធា មានប្រសាសន៍ ថា ការឃោសនាបោះឆ្នោត ហាក់ចាប់ផ្ដើមមុនការកំណត់នៃប្រតិទិនរបស់ គ.ជ.ប ។ លោកថា ការដើរបោះខិត្ដប័ណ្ណនៅតាមទីសាធារណៈ ខុសនឹងនីតិវិធីនៃការបោះឆ្នោត។
តាមប្រតិទិន គជប យុទ្ធនាការឃោសនាបោះឆ្នោតសម្រាប់តំណាងរាស្ត្រអាណត្តិទី៥ ឆ្នាំ២០១៣នេះ នឹងប្រព្រឹត្តិទៅពីថ្ងៃទី២៧ ខែមិថុនា ដល់ ថ្ងៃទី២៦ ខែកក្កដា និងបោះឆ្នោតនៅថ្ងៃទី២៨ ខែកក្កដា ឆ្នាំ២០១៣៕
No comments:
Post a Comment
yes