អ្នកភូមិបឹងកក់តវ៉ានៅក្បែរសាលាឧទ្ធរណ៍កាលពីថ្ងៃពុធ
ក្រុមមន្ត្រីអាជ្ញាធររាជធានី កាលពីម្សិលមិញ បានចុះទៅស្រង់ស្ថិតិប្រជាពលរដ្ឋ នៅក្នុងតំបន់បឹងកក់ដើម្បីរៀបចំសាលាកបត្រ សម្គាល់ម្ចាស់កម្មសិទ្ធិករ លើអចលនវត្ថុជូនប្រជាពលរដ្ឋដែលនៅសេសសល់ប្រមាណជាង៦០ គ្រួសារ ដើម្បីឈានទៅដោះស្រាយ បញ្ចប់បញ្ហាជម្លោះដីធ្លីដ៏រ៉ាំរ៉ៃនៅក្នុងតំបន់នេះ។
អង្គការសង្គមស៊ីវិល ដែលឃ្លាំមើលពីបញ្ហានេះ បានសម្ដែងក្ដីសាទរ ដោយថា នេះអាចជាការចាប់ផ្តើមវិជ្ជមានមួយរបស់អាជ្ញាធរ ចាប់តាំងពីលោក ប៉ា សុជាតិវង្ស បានឡើងកាន់តំណែងជាអភិបាលក្រុង ជាងមួយខែមកនេះ ដើម្បីឈានទៅដោះស្រាយបញ្ចប់បញ្ហាជម្លោះដីធ្លី ដែលប្រជាពលរដ្ឋរងគ្រោះតែងតែធ្វើការតវ៉ាស្ទើរតែរៀងរាល់ថ្ងៃនេះ។
លោក អ៊ី សារ៉ុម ប្រធានសមាគមធាងត្នោត បានថ្លែងកាលពីម្សិលមិញថា ការចុះស្រង់ស្ថិតិ និងធ្វើបញ្ជីសាលាកបត្រព័ត៌មាន ប្រជាពលរដ្ឋក្នុងសហគមន៍ដែលមានជម្លោះដីធ្លីដ៏រ៉ាំរ៉ៃមួយនេះ គឺជាសញ្ញាថ្មីនៃការចាប់ផ្តើមការងារជាក់ស្តែងក្នុងការដោះស្រាយបញ្ហាជម្លោះដីធ្លី ចាប់តាំងពីលោក ប៉ា សុជាតិវង្ស អភិបាលរាជធានីភ្នំពេញ បានឡើងកាន់តំណែងជំនួសលោក កែប ជុតិមា ដែលបានផ្លាស់ចេញ កាលពីចុងខែមេសា។ លោកបានថ្លែងថា៖«នេះជាចំណុចល្អនិងមានភាពជាក់លាក់ជាងមុន ហើយខ្ញុំយល់ថា នេះសញ្ញាវិជ្ជមានឈានទៅរកការដោះស្រាយបញ្ចប់វិវាទដីធ្លី ក្នុងតំបន់មួយនេះ»។
លោក ណើប លី ប្រធានកម្មវិធីពង្រឹងអំណាចសហគមន៍នៃអង្គការសិទ្ធិលំនៅឋាន បានថ្លែងថា ក្នុងនាមលោកជាអង្គការសង្គមស៊ីវិលលោកនឹងនៅតែបន្តការឃ្លាំមើលនិងរង់ចាំសហការចូលរួមផ្ដល់មតិយោបល់ដល់អាជ្ញាធរដើម្បីធ្វើយ៉ាងណាឲ្យដំណើរការដោះស្រាយទំនាស់ដីធ្លី ក្នុងតំបន់នេះ ក៏ដូចជាតំបន់ផ្សេងទៀតទទួលបានជោគជ័យ។
តំណាងប្រជាពលរដ្ឋបឹងកក់លោក ចាន់ ពុទ្ធិស័ក្តិ បានសម្ដែងក្ដីត្រេកអរ និងសង្ឃឹមថា ក្រោយពីគណៈកម្មការចម្រុះរបស់សាលារាជធានីចុះស្រង់ស្ថិតិ និងធ្វើសាលាកបត្រព័ត៌មានហើយនោះ អាជ្ញាធរនឹងផ្ដល់ប័ណ្ណកម្មសិទ្ធិលើអចលនវត្ថុដល់គ្រួសារលោក។
លោកនិយាយថា៖«នៅពេលនេះ ខ្ញុំមានក្ដីត្រេកអរ ហើយយើងខ្ញុំរំពឹងថា អាជ្ញាធរនឹងរៀបចំដោះដូរដីឲ្យពួកយើងខ្ញុំចូលទៅក្នុងដី១២,៤៤ ហិកតា ព្រមទាំងផ្ដល់ប័ណ្ណកម្មសិទ្ធិឲ្យយើងខ្ញុំគ្រប់ៗគ្នា ទាំងជាង៦០គ្រួសារ»។
លោកស្រី អ៊ិន សាផន ចៅសង្កាត់រង សង្កាត់ស្រះចកដែលបានចូលរួមនៅក្នុងការចុះស្រង់ស្ថិតិ កាលពីម្សិលមិញ បាននិយាយថា មកទល់ពេលនេះ ក្រុមកាងាររបស់លោកស្រី បានស្រង់ស្ថិតិ និងធ្វើសាលាកបត្រជូនប្រជាពលរដ្ឋបានចំនួនជាង២០គ្រួសាររួចហើយ។ លោកស្រីបន្តថា៖ «យើងនឹងបន្តចុះធ្វើការងារនេះទៀត រហូតដល់គ្រប់ចំនួន»៕
No comments:
Post a Comment
yes