អង្គរក្សរបស់មន្ត្រីរាជរដ្ឋាភិបាលជាន់ខ្ពស់ម្នាក់ ត្រូវបានចាប់ខ្លួនពីបទបាញ់បោះសេរី និងគម្រាមសម្លាប់ស្ត្រីពីរនាក់ ហើយនឹងត្រូវបញ្ជូនទៅសាលាដំបូងរាជធានីប្រកាន់ នៅរសៀលថ្ងៃចន្ទ ទី១៧ ខែមិថុនានេះដើម្បីធ្វើការចោទ។
លោក ខេង សុវណ្ណ មេបញ្ជាការរងនៃកងរាជអាវុធហត្ថរាជធានីភ្នំពេញបានឲ្យដឹងថា ឈ្មោះ ឃាង សិលា ភេទប្រុស អាយុ ៣៣ ឆ្នាំត្រូវបានបញ្ជូនទៅសាលាដំបូងរាជធានីភ្នំពេញដើម្បីធ្វើការចោទប្រកាន់នៅរសៀល ថ្ងៃទី១៧ ខែមិថុនា ពាក់ព័ន្ធនឹងការបាញ់បោះសេរី គម្រាមសម្លាប់ស្ត្រីពីរនាក់ និងបានបង្កឲ្យខូចខាតឡានរបស់ស្ត្រីពីរនាក់នោះ ប្រព្រឹត្តនៅសង្កាត់ចាក់អង្រែ ខណ្ឌមានជ័យ។
លោកបាននិយាយថា «លោកត្រូវបានចោទប្រកាន់ដោយមន្ត្រីសមត្ថកិច្ចយើង បីករណីគឺ បទបង្កអំពើហឹង្សា គម្រាម និងបង្កឲ្យខូចខាតទ្រព្យសម្បត្តិ»។
លោកបានបន្តថា លោក ឃាង សិលា ត្រូវបានចាប់ខ្លួនដោយកងកម្លាំងសមត្ថកិច្ចរាជធានីភ្នំពេញ នៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កាលពីថ្ងៃអាទិត្យ ទី១៦ ខែមិថុនា តាមបណ្តឹងរបស់ស្ត្រីពីរនាក់នោះ។
No comments:
Post a Comment
yes