លោកឈាង វុន តំណាងរាស្ត្រគណបក្សប្រជាជនកម្ពុជា និងជាអ្នកនាំពាក្យរដ្ឋសភានឹងចូលរួមធ្វើបាតុកម្មប្រឆាំងនឹងលោកកឹម សុខា អនុប្រធានគណបក្សសង្គ្រោះជាតិ នៅថ្ងៃអាទិត្យខានស្អែកនេះ ជាការតវ៉ា ចំពោះការថ្លែងរបស់លោក កឹម សុខា ដែលត្រូវបានគេដកស្រង់សម្តីហើយផ្សព្វផ្សាយថា ទួលស្លែង ជាគុកសិប្បនិម្មិត។
យ៉ាងណាក្តីមជ្ឈដ្ឋានជាច្រើនមើលឃើញថា ការតវ៉ានេះគឺជារឿងនយោបាយខណៈដែលការបោះឆ្នោតជាតិជិតចូលមកដល់។
ប៉ុន្តែលោកឈាង វុន បានប្រាប់ភ្នំពេញប៉ុស្តិ៍ កាលពីម្សិលមិញថា ក្នុងនាមលោកជាជនរងគ្រោះម្នាក់ ដែលមានសមាជិកគ្រួសារចំនួន ១០ នាក់ បានស្លាប់នៅក្នុងរបបខ្មែរក្រហម លោកមានការឈឺចាប់ចំពោះប្រជាជនកម្ពុជាណាដែលបដិសេធមិនទទួលស្គាល់អំពីអំពើប្រល័យពូជសាសន៍នៅកម្ពុជា។ លោកឈាង វុនបានមានប្រសាសន៍ថា៖ «ខ្ញុំចូលរួមជាមួយប្រជាជនកម្ពុជាទាំងអស់ ដែលនឹងមកជួបជុំគ្នាដើម្បីធ្វើការតវ៉ា និងដង្ហែក្បួន។
ខ្ញុំមិនប្រាកដទេ កន្លែងដែលខ្ញុំនឹងទៅ ថាតើខ្ញុំនឹងនៅក្នុងរាជធានីភ្នំពេញដែលខ្ញុំនឹងចូលរួមក្នុងរាជធានីភ្នំពេញ ឬខ្ញុំនឹងទៅខេត្តបាត់ដំបង នៅថ្ងៃអាទិត្យប្រសិនបើមានការដង្ហែក្បួននៅទីនោះ ខ្ញុំនឹងទៅទីនោះដើម្បីចូលរួមផងដែរ។ ខ្ញុំនឹងចូលរួម ហើយបញ្ចេញកំហឹងរបស់ខ្ញុំ»។
លោក ឈាង វុន មិនបានដឹងថា តើមានមន្ត្រីជាន់ខ្ពស់គណបក្សប្រជាជនកម្ពុជាណាខ្លះនឹងចូលរួម ក្នុងបាតុកម្មនៅថ្ងៃអាទិត្យនោះទេ។
លោក ជុំ ម៉ី អ្នករួចរស់ជីវិតម្នាក់ពីគុកទួលស្លែង ដែលជាអ្នកដឹកនាំធ្វើបាតុកម្ម ប្រឆាំងនឹងលោក កឹម សុខា បានចូលជួបពិភាក្សា ជាមួយអាជ្ញាធររាជធានី កាលពីម្សិលមិញ ពីគម្រោងនៃការធ្វើបាតុកម្មនេះ។ លោកជុំ ម៉ី បានឲ្យដឹងថា ខាងសាលាក្រុងបានផ្តល់ការអនុញ្ញាតឲ្យលោកធ្វើបាតុកម្មទៅតាមពេលកំណត់ហើយសាលាក្រុងបានបញ្ជូនលិខិតអនុញ្ញាតនេះទៅក្រសួងមហាផ្ទៃដើម្បីសុំឲ្យជួយការពារសន្តិសុខ និងសណ្តាប់ធ្នាប់។
លោកជុំ ម៉ី មិនបានប្រាប់លម្អិតអំពីដំណើការនៃការធ្វើបាតុកម្មនៅថ្ងៃអាទិត្យនោះទេ ដោយគ្រាន់តែនិយាយថា៖«មានព្រះសង្ឃជាច្រើន មកពីតាមបណ្តាខេត្ត ចង់ចូលរួមនៅក្នុងបាតុកម្មនេះដែរ»។ លោកជុំ ម៉ី បានប្រកាសនៅក្នុងសន្និសីទកាសែតមួយនៅគុកទួលស្លែងកាលពីថ្ងៃអង្គារថា បាតុកម្មដែលនឹងមានអ្នកចូលរួមពីមនុស្សប្រមាណ ២ ម៉ឺននាក់នេះ នឹងជួបជុំគ្នា នៅសួនសេរីភាព ហើយដើរដង្ហែក្បួនទៅកាន់ទីស្នាក់ការគណបក្សសង្គ្រោះជាតិ។
លោក កឹម សុខា បានធ្វើការបដិសេធរួចហើយ ថាលោកមិនដែលបាននិយាយថា ទួលស្លែងជាគុកសិប្បនិម្មិតដូចអ្វីដែលគេបានផ្សព្វផ្សាយនោះទេ ហើយថា សំឡេងរបស់លោក ត្រូវបានគណបក្សប្រជាជន យកទៅកាត់តខុសពីបរិបទដើមទាំងស្រុងដើម្បីមួលបង្កាច់លោក ខណៈដែលការបោះឆ្នោតជាតិជិតចូលមកដល់។
នៅក្នុងសេចក្តីអំពាវនាវមួយ កាលពីម្សិលមិញ ដែលចុះហត្ថលេខា ដោយលោក សម រង្ស៊ី និងលោក កឹម សុខា ប្រធាន និងអនុប្រធានគណបក្សសង្គ្រោះជាតិបានគូសបញ្ជាក់ថា ក្រោយពីគណបក្ស សម រង្ស៊ី និងគណបក្សសិទ្ធិមនុស្សបានរួមបញ្ចូលគ្នា គណបក្សប្រជាជន«នៅតែបន្តព្យាយាមញុះញង់ បំបែកបំបាក់ អ្នកប្រជាធិបតេយ្យ អ្នកជាតិនិយម និងអ្នករាជានិយម តាមមធ្យោបាយផ្សេងៗ»។ គណបក្សប្រឆាំង ដែលជាគូប្រជែងខ្លាំងក្លាជាមួយគណបក្សប្រជាជននៅក្នុងការបោះឆ្នោតខាងមុខនេះបានបន្តថា៖«ទោះបីគេខិតខំប្រើឧបាយកលបំបែកបំបាក់ តាមរូបភាពណាក៏ដោយ យើងខ្ញុំ សម រង្ស៊ី និង កឹម សុខា សូមប្តេជ្ញាចិត្តថា យើងខ្ញុំទាំងពីរនាក់ មិនធ្លាក់ចូលក្នុងឧបាយកលបំបែកបំបាក់របស់ពួកគេឡើយ»៕
No comments:
Post a Comment
yes