ពលរដ្ឋមកអុជធូប រម្លឹកវិញ្ញាណក្ខន្ធនៅវាលពិឃាតជើងឯក
សេចក្តីព្រាងច្បាប់ប្រឆាំងការមិនទទួលស្គាល់ឧក្រិដ្ឋកម្មខ្មែរក្រហមដែលត្រូវបានស្នើឡើងដោយលោកនាយករដ្ឋមន្ត្រី ហ៊ុន សែន ត្រូវបានសមាជិកសភាអនុម័តជាផ្លូវការនៅព្រឹកថ្ងៃសុក្រនេះជាមួយសំឡេង ៨៦លើ៨៦ ដោយគ្មានសមាជិកសភាបក្សប្រឆាំងចូលរួមឡើយ។
សេចក្តីព្រាងច្បាប់ថ្មីនេះមាន ៥មាត្រា បានកំណត់ ដាក់ទោសលើជនណាដែលមិនទទួលស្គាល់ឧក្រិដ្ឋកម្ម ក្នុងរបបខ្មែរក្រហម ត្រូវដាក់ពន្ធនាគារពី ៦ ខែទៅ ២ ឆ្នាំនិងពិន័យជាប្រាក់ពី ១លានរៀលទៅ ៤លានរៀល។
កាលពីម្សិលមិញ តំណាងរាស្ត្រគណបក្សប្រឆាំងទាំងពីរនៅកម្ពុជា គឺគណបក្សសម រង្ស៊ី និងគណបក្សសិទ្ធិមនុស្ស បានចេញសេចក្តីថ្លែងការណ៍មួយថា រដ្ឋសភាបច្ចុប្បន្ន អធម្មនុញ្ញភាព ដែលគណៈកម្មាធិការអចិន្រ្តៃយ៍រដ្ឋសភា កាលពីថ្ងៃពុធ បានសម្រេចហាមឃាត់ពួកគេ មិនឲ្យជជែកពិភាក្សា រាប់ទាំងការពិភាក្សាអំពីច្បាប់ប្រឆាំងការមិនទទួលស្គាល់ឧក្រិដ្ឋកម្មខ្មែរក្រហម និងបានបង្កកប្រាក់បៀវត្សរ៍ ក្រោយពីពួកគេបានលាលែង រួចរួមគ្នាទៅចូលជាសមាជិកគណបក្សសង្រ្គោះជាតិថ្មី។
សមាជិកគណបក្សសង្គ្រោះជាតិ ក៏ធ្លាប់បានចេញសេចក្តីថ្លែងការណ៍មួយកាលពីថ្ងៃអង្គារ ទី២៨ ខែឧសភា គាំទ្រការបង្កើតច្បាប់ស្តីពីការដាក់ទោសលើបុគ្គលិកណាដែលនិយាយថា គ្មានរបបប្រល័យពូជសាសន៍នៅកម្ពុជានេះដែរ។ គឺមួយថ្ងៃបន្ទាប់ពី លោកនាយករដ្ឋមន្ត្រី បានប្រកាសជំរុញឲ្យសមាជិកសភាគណបក្សប្រជាជនកម្ពុជា និងគណបក្សហ្វ៊ុនស៊ិនប៊ិចបង្កើតច្បាប់ដាក់ទោសចំពោះអ្នកនិយាយថា របបខ្មែរក្រហមគ្មានអំពើប្រល័យពូជសាសន៍។
ប៉ុន្តែអ្នកវិភាគនយោបាយឯករាជ្យនៅកម្ពុជាបានឡើងថា ច្បាប់នេះគឺជាច្បាប់នយោបាយ និងអធម្មនុញ្ញភាព។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានភ្នំពេញប៉ុស្តិ៍កាលពីម្សិលមិញថា «វាជាមូលហេតុ បានព្រាងឡើង បន្ទាប់ពីសំឡេងលោក កឹម សុខា និងសុន្ទរកថាលោក ហ៊ុន សែន។ មូលហេតុនេះ គឺច្បាស់លាស់ថា គឺជាច្បាប់នយោបាយ»។
លោក ជាម យៀប សមាជិកសភាគណបក្សប្រជាជនកម្ពុជា បានលើកឡើងថា សេចក្តីស្នើច្បាប់នេះ ធ្វើឡើងក្នុងគោលដៅឲ្យប្រជាពលរដ្ឋ មានការចងចាំ មិនភ្លេចពីប្រវត្តិសាស្ត្រដ៏ជូរចត់ពីអតីតកាល និងរកយុត្តិធម៌ជូនជនរងគ្រោះ។
នៅក្នុងសុន្ទរកថាកាលពីសប្តាហ៍មុនលោកនាយករដ្ឋមន្ត្រី ហ៊ុន សែន បានបញ្ចេញប្រតិកម្មខ្លាំងៗ និងបាននិយាយវាយប្រហារ លោក កឹម សុខា ប្រធានស្តីទីគណបក្សសង្គ្រោះជាតិ ដែលជាដៃគូរប្រជែងរបស់លោក ទាក់ទងនឹងសំណុំរឿងមន្ទីរ ស-២១ នៃរបបខ្មែរក្រហម ថាជាកន្លែងសិប្បនិម្មិតដែលត្រូវបាន អង្គភាពព័ត៌មាននិង ប្រតិកម្មរហ័សនៃទីស្តីការគណៈរដ្ឋមន្រ្តី កាលពីថ្ងៃទី២០ ឧសភាបានបង្ហោះឯកសារសំឡេងនៅក្នុងគេហទំព័រខ្លួន។
មហាបាតុកម្មមួយនឹងត្រូវធ្វើឡើងនៅថ្ងៃអាទិត្យ ខានស្អែកនេះដោយមានការចូលរួមតំណាងរាស្ត្រគណបក្សប្រជាជនកម្ពុជា ក្នុងការទាមទារឲ្យលោក កឹម សុខាចេញមកសុំទោសជាសាធារណៈ លើអ្វីដែលលោកបាននិយាយ ប៉ុន្តែលោកកឹម សុខា បានធ្វើការអះអាងថា ឯកសារថតជាសំឡេងនោះត្រូវគេកាត់តយកពាក្យសម្តីរបស់លោកឲ្យនៅក្រៅបរិបទ។
No comments:
Post a Comment
yes