អ្នកនាំពាក្យកងរាជអាវុធហត្ថលើផ្ទៃប្រទេសបានឲ្យដឹងថ្ងៃនេះថា ជនជាតិតៃវ៉ាន់ ២៦ នាក់ត្រូវបានចាប់ខ្លួនកាលពីថ្ងៃចន្ទដោយនាយកដ្ឋានសន្តិសុខ និងព័ត៌មាននៃកងរាជអាវុធហត្ថលើផ្ទៃប្រទេសនៅក្នុងខេត្តព្រះសីហនុពាក់ព័ន្ធនឹងការគំរាមនិងជំរិតទារប្រាក់ពលរដ្ឋនៅក្នុងប្រទេសចិននិងតៃវ៉ាន់តាមរយៈបណ្ដាញទូរស័ព្ទ VOIPs ចេញពីប្រទេសកម្ពុជា។
លោកឧត្ដមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍ថា ជនជាតិតៃវ៉ាន់២៦នាក់ខាងលើនេះត្រូវបានចាប់ខ្លួន ខណៈកងកម្លាំងរាជអាវុធហត្ថសហការជាមួយនគរបាលមូលដ្ឋាន តំណាងអេយ្យការនៃតុលាការខេត្តព្រះសីហនុ និងតំណាងក្រសួងប្រៃសនីយ៍និងទូរគមនាគមន៍បានវាយឆ្មក់ចូលទៅក្នុងផ្ទះវីឡាមួយកន្លែងស្ថិតនៅក្នុងភូមិ៣សង្កាត់លេខ៣ ខេត្តព្រះសីហនុកាលពីថ្ងៃទី១៧ខែមិថុនាឆ្នាំ២០១៣នៅម៉ោងប្រហែល១០និង៣០នាទីព្រឹក។
លោកឧត្ដមសេនីយ៍បានប្រាប់ភ្នំពេញប៉ុស្តិ៍ថា៖ «អ្នកទាំងនេះគឺជាក្រុមអ្នកចាប់ជំរិតចិននិងតៃវ៉ាន់ដែលបានគំរាមទារប្រាក់ពីពលរដ្ឋរស់នៅចិន និងតៃវ៉ាន់តាមបណ្ដាញទូរស័ព្ទចេញពីកម្ពុជា។ ពួកគេបានស្នាក់នៅនិងលាក់ខ្លួននៅកម្ពុជា ហើយបានទូរស័ព្ទចេញពីកម្ពុជាដើម្បីគំរាមនិងទារប្រាក់ពីពលរដ្ឋនៅចិននិងតៃវ៉ាន់»។
No comments:
Post a Comment
yes