លោកហ៊ុន ម៉ានី កូនប្រុសលោកនាយករដ្ឋមន្ត្រី ហ៊ុន សែន
ក្នុងយុទ្ធនាការឃោសនាបោះឆ្នោត
លោក ហ៊ុន ម៉ានី លោក ស សុខា លោក សាយ សំអាល់ លោក សុខ សុកាន ដែលជាកូនមន្ត្រីជាន់ខ្ពស់គណបក្សប្រជាជន ដែលបានឈរឈ្មោះជាបេក្ខជនតំណាងរាស្ត្រ របស់គណបក្សកាន់អំណាចយូរអង្វែងមួយនេះ សុទ្ធតែទទួលបរាជ័យក្នុងការបោះឆ្នោតកាលពីថ្ងៃអាទិត្យទី២៨ កក្កដា ដោយការបែងចែកអាសនៈពុំជាប់ដល់លេខរៀងដែលបានឈរឈ្មោះ។
ក្រុមអ្នកវិភាគបាននិយាយកាលពីម្សិលមិញថា ខណៈដែលគណបក្សប្រជាជនបានរៀបចំក្រុមជាថ្មី ក្រោយពីការបោះឆ្នោត កាលពីថ្ងៃអាទិត្យនិងពិចារណាអំពីអនាគតរបស់ពួកគេដែលជាអ្នកបានទៅរៀនសូត្រនៅឯក្រៅប្រទេស។
អ្នកវិភាគនយោបាយឯករាជ្យលោក កែម ឡី បានថ្លែងថា៖«ខ្ញុំ គិតថា អាណត្តិនេះរដ្ឋាភិបាល ចាំបាច់ត្រូវដាក់បញ្ចូលយុវជន ដែលមានសមត្ថភាព ឬមានលក្ខណសម្បត្តិគ្រប់គ្រាន់ នៅក្នុងប្រព័ន្ធដឹកនាំរបស់ពួកគេ។ នៅពេលនេះ ពួកគេដឹងថា ពួកគេទាំងអស់គ្នាចាស់ៗអស់ហើយ ពួកគេ ចាំបាច់ត្រូវប្រគល់ការងារ ទៅឲ្យយុវជនជំនាន់ក្រោយរបស់ពួកគេ»។
បេក្ខជនវ័យក្មេងលើកដំបូងទាំងនេះ បានទទួលបរាជ័យ ដោយសារតែពួកគេត្រូវបានគេដាក់ឲ្យឈរចាប់ពីលេខរៀងទី ៤ ឡើងទៅ រីឯ យុវជនពាក់កណ្តាលនៃក្រុមទាំងនេះ ត្រូវបានឲ្យឈរជាបេក្ខជនបម្រុង។ ខុសពីអភិបាលខេត្ត ៤ រូប ដែលមានវ័យ ៦០ ក្រាស់ ហើយត្រូវចូលនិវត្តន៍កាលពីដើមឆ្នាំនេះ ត្រូវបានគេដាក់មិនឲ្យលើសពីលេខរៀងទី ៣ ទេ នៅក្នុងបញ្ជីបោះឆ្នោត ហើយដែលក្នុងចំណោមពួកគេ មាន ៣ នាក់ បានឈ្នះអាសនៈ។
អ្នកវិទ្យាសាស្រ្ត នយោបាយលោក Carlyle Thayer ដែលចូលនិវត្តន៍ទៅហើយ នៃបណ្ឌិត្យសភា កងទ័ព អូស្រ្តាលី បានថ្លែងថា៖«រដ្ឋាភិបាលកម្ពុជាជារដ្ឋាភិបាលមួយដែលមានវ័យចាស់ ទៅហើយ ដែលត្រូវចាប់ផ្តើម»។ លោកបន្តថា៖«មនុស្សថ្មីដែលជាបេក្ខជនវ័យក្មេងទាំងនេះមានប្រយោជន៍ខ្លាំងដល់ការផ្លាស់ប្តូររបៀបនៃការគិតរបស់បក្សកាន់អំណាច»។
តាមពិតទៅក្រុមជំនាន់ក្រោយរបស់គណបក្សប្រជាជនទាំងនេះ គឺជាអ្នករៀនសូត្របានច្រើនទាំងក្នុងស្រុក ទាំងក្រៅស្រុក ហើយមានតំណែងខ្ពស់ក្នុងជួររដ្ឋាភិបាលរួចហើយ។ លោក ហ៊ុន ម៉ានី វ័យ ៣១ ឆ្នាំ ជាកូនពៅរបស់បុរសខ្លាំង ហ៊ុន សែន មានសញ្ញាបត្រជាន់ខ្ពស់ពីអាមេរិកនិងអូស្រ្តាលី។ លោក ស សុខា វ័យ ៣៤ ឆ្នាំ ដែលជាកូនរបស់រដ្ឋមន្រ្តីក្រសួងមហាផ្ទៃលោក ស ខេង ក៏ជាស្នងការរងប៉ូលិសក្រុងភ្នំពេញនិងបានទៅសិក្សានៅបរទេស ផងដែរ។ លោកឧត្តមសេនីយ៍ផ្កាយពីរ ឌី វិជ្ជា ដែលជាកូនប្រសារបស់លោក ហ៊ុន សែន និងជាកូនរបស់សពអតីតអគ្គស្នងការប៉ូលិសជាតិដែលមានកេរ្តិ៍ឈ្មោះ មិនសូវល្អ លោក ហុក ឡង់ឌី ក៏អ៊ីចឹងដែរ។
គណបក្សប្រជាជនកម្ពុជា ដែលបានគ្រប់គ្រងប្រទេសជាង ៣០ ឆ្នាំមកហើយនោះ បានចាប់ផ្តើមពង្រឹងអំណាចតកូនតចៅរបស់ខ្លួន ដោយតែងតាំងកូនៗរបស់ពួកគេឲ្យកាន់តំណែងជាន់ខ្ពស់ក្នុងរដ្ឋាភិបាល ដែលបង្ហាញឲ្យឃើញពីប្រព័ន្ធនៃគ្រួសារនិយម និងបក្ខពួកនិយមនៅក្នុងចំណោមថ្នាក់ដឹកនាំគណបក្សកាន់អំណាចមួយនេះ។ ប៉ុន្តែយ៉ាងណាក៏ដោយ លទ្ធផលបឋមសម្រាប់ការបោះឆ្នោតកាលពីថ្ងៃអាទិត្យ បានបង្ហាញថា ប្រព័ន្ធគ្រួសារនិយមទាំងនេះ អាចនឹងចាប់ផ្តើមដួលរំលំ។
លោក កង ហ៊ាង អតីតអភិបាលខេត្ត កំពង់ស្ពឺ បានប្រាប់កាសែតភ្នំពេញ ប៉ុស្តិ៍ កាលពីថ្ងៃម្សិលមិញថា លោក ហ៊ុន ម៉ានី ស្ទើរតែប្រាកដថា នឹងទទួលបានអាសនៈ ដែលជាអាសនៈរបស់អនុប្រធានព្រឹទ្ធសភាទី ១ លោក សាយ ឈុំ បានឈ្នះនៅក្នុងខេត្តនេះ។ លោក បានបញ្ជាក់ថា៖ «លោក សាយ ឈុំ នឹងលាលែង ដើម្បីបន្តការងារនៅព្រឹទ្ធសភា»។
លោក Thayer បានថ្លែងថា៖«ពួកគេ បានជួយប្រជាជនពីរបបខ្មែរក្រហម ប៉ុន្តែពលរដ្ឋភាគច្រើន បានកើតក្រោយសម័យនោះ។ កម្ពុជាមានស្ថិរភាព ប៉ុន្តែពលរដ្ឋកាន់តែច្រើន ត្រូវរងផលប៉ះពាល់ដោយសារជម្លោះដីធ្លីមានផលប៉ះពាល់អាក្រក់។ តើឲ្យពួកគេ កំណត់និយមន័យខ្លួនឯងបែបណា?ពួកគេ មិនអាចរស់នៅក្នុងអតីតកាលបានទេ»។
លោក ស សុខា ទោះបីមិនបានឈ្នះអាសនៈនៅខេត្ត ព្រៃវែង ដែលជាស្រុកកំណើតឪពុក របស់លោក ក៏ដោយ ក៏ក្រុមថ្នាក់ដឹកនាំបក្សជាន់ខ្ពស់គណបក្ស នឹងរៀបចំកិច្ចប្រជុំមួយនៅសប្តាហ៍ក្រោយដើម្បីពិភាក្សាអំពីរឿងនេះ។
លោក សុខា បានបញ្ជាក់ថា៖ «អាទិត្យក្រោយនេះយើងនឹងពិភាក្សាថាតើនរណានឹងចូលសភា ហើយនរណា នឹងទទួលយកភារកិច្ចអីទៀត។ ក្នុងនាមជាអ្នកចាញ់ យើងក៏ចង់បាន (អាសនៈ) ច្រើនជាងហ្នឹងដែរ ប៉ុន្តែយើងទទួលយកលទ្ធផលនេះ ហើយលទ្ធផលនេះ វាដូចរំពាត់ដែលគេវាយមកលើរូបយើង ហើយយើងត្រូវតែភ្ញាក់»៕
No comments:
Post a Comment
yes