កម្លាំងសមត្ថកិច្ចកំពុងបើកការស៊ើបអង្កេតរកភស្តុតាងនៃការបាញ់ទីស្នាក់ការគណបក្ស
សង្គ្រោះជាតិ ខណ្ឌទួលគោក ស្ថិតនៅចំណុចត្រឡោកបែក រាជធានីភ្នំពេញ
នៅថ្ងៃទី២០ ខែកក្កដា ឆ្នាំ២០១៣
អនុប្រធានគណៈកម្មាធិការវិន័យរបស់គណបក្សសង្គ្រោះជាតិ អះអាងថា ការបាញ់ប្រហារដោយជនមិនស្គាល់មុខសំដៅមកទីស្នាក់ការធំរបស់គណបក្សប្រឆាំងនេះ គឺជាចេតនា និងជាការគំរាមកំហែងផ្នែកនយោបាយធ្ងន់ធ្ងរ ចំពោះគណបក្សជំទាស់។
លោក ហូរ វ៉ាន់ អនុប្រធានក្រុមការងារគណបក្សសង្គ្រោះជាតិ ប្រចាំរាជធានីភ្នំពេញ អះអាងនៅព្រឹកថ្ងៃទី២០ កក្កដា ថា ការបាញ់ប្រហារប្រឆាំងទីស្នាក់ការធំរបស់គណបក្សសង្គ្រោះជាតិ នេះ គឺជាការប៉ុនប៉ងដើម្បីរារាំងដល់ដំណើរការបោះឆ្នោតរបស់គណបក្សប្រឆាំង។ លោកជំរុញឲ្យមានការស៊ើបអង្កេតឲ្យបានស៊ីជម្រៅ ដើម្បីវែកមុខខ្មាន់កាំភ្លើង និងអ្នកនៅពីក្រោយខ្នងយកមកផ្ដន្ទាទោសតាមផ្លូវច្បាប់។ លោក ហូរ វ៉ាន់ បញ្ជាក់ជំហរថា គណបក្សប្រឆាំងនឹងតស៊ូដល់នាទីចុងក្រោយ ប្រឆាំងនឹងសកម្មភាពបាញ់ប្រហារនេះ។
កាលពីម៉ោងជាង ៣ទៀបភ្លឺថ្ងៃទី២០ កក្កដា មានការបាញ់កាំភ្លើងមួយគ្រាប់ចូលក្នុងទីស្នាក់ការកណ្ដាលគណបក្សសង្គ្រោះជាតិ នៅតំបន់ត្រឡោកបែក ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។ ការបាញ់នេះ ពុំបានបណ្ដាលឲ្យមានរងរបួស និងគ្រោះថ្នាក់អាយុជីវិតអ្នកដែលស្នាក់នៅពេលយប់ ក្នុងទីស្នាក់ការនោះទេ។ ក៏ប៉ុន្តែ បានធ្វើឲ្យបែកកញ្ចក់ទីស្នាក់ការ រួចធ្លាយក្បាលគ្រាប់ចូលទៅផ្នែកខាងក្នុង។
ស្នងការរងរាជធានីភ្នំពេញ លោក ជួន ណារិន្ទ ដែលបានចុះស៊ើបអង្កេត បដិសេធក្នុងការអត្ថាធិប្បាយ ដោយលោកបានអះអាងយ៉ាងខ្លីថា នេះជាដំណាក់កាលស៊ើបអង្កេតបឋមនៅឡើយ។
ស្នាមគ្រាប់កាំភ្លើងបាញ់ទម្លុះកញ្ចក់ចូលក្នុងទីស្នាក់ការគណបក្សសង្គ្រោះជាតិ នាតំបន់ត្រឡោកបែក សង្កាត់បឹងកក់២ ខណ្ឌទួលគោក រាជធានីភ្នំពេញ នៅថ្ងៃទី២០ ខែកក្កដា ឆ្នាំ២០១៣។ RFA/Uon Chhin
សន្តិសុខប្រចាំស្នាក់ការកណ្ដាលគណបក្សសង្គ្រោះជាតិ លោក ប៊ុត សំផុន ដែលស្ថិតក្នុងហេតុការណ៍នៃការបាញ់ប្រហារ និយាយថា ការបាញ់នេះកើតឡើងបន្ទាប់ពីលោកត្រឡប់ពីបន្ទប់ទឹកវិញ នៅម៉ោងប្រហែលជាង ៣ទៀបភ្លឺថ្ងៃទី២០ កក្កដា។ លោកបន្តថា ក្រោយពេលផ្ទុះអាវុធនេះភ្លាមៗ គឺលោកពុំបានចាប់អារម្មណ៍ឡើយ។ លោកបន្តថា ក្រោយពីជម្រះមន្ទិលសង្ស័យថា អាចជាផ្ទុះកង់ម៉ូតូ ឬអ្វីផ្សេង។ ក៏ប៉ុន្តែ ក្រោយពីការពិនិត្យដិតដល់ ទើបដឹងថាមានការបាញ់ប្រហារ។
លោក ចាន់ សុវ៉េត មន្ត្រីស៊ើបអង្កេតជាន់ខ្ពស់នៃសមាគមអាដហុក (Adhoc) ដែលបានចុះអង្កេតដោយផ្ទាល់ដែរនោះ បានអះអាងថា អង្គការសង្គមស៊ីវិល ចាត់ទុកថា នេះជាការគំរាមកំហែងផ្នែកនយោបាយ ជាជាងការប៉ុនប៉ងមនុស្សឃាត។ លោកបន្តថា ការបាញ់នេះស្របពេលយុទ្ធនាការឃោសនាបោះឆ្នោត និងចំពេល លោក សម រង្ស៊ី វិលចូលប្រទេសកម្ពុជា។
ប្រធាននាយកដ្ឋានស៊ើបអង្កេតនៃក្រសួងមហាផ្ទៃ បដិសេធ និងព្យាយាមមិនបង្ហាញពីលទ្ធផលនៃការស៊ើបអង្កេត ទៅនឹងសំណួររបស់អ្នកសារព័ត៌មាន ក្រោយពីបិទបញ្ចប់នៃការស៊ើបអង្កេតកាលពីព្រឹកថ្ងៃទី២០ កក្កដា។
ការផ្ទុះអាវុធនេះ ជាលើកទីពីរហើយបន្ទាប់ពីព្រឹត្តិការណ៍នៃការបាញ់ដូចគ្នានេះ កាលពីថ្ងៃទី៥ កក្កដា បានកើតឡើងម្ដងរួចមកហើយទៅលើក្បួនដង្ហែរបស់បក្សសង្គ្រោះជាតិ នៅសង្កាត់ផ្សារដើមថ្កូវ ខណ្ឌចម្ការមន៕
No comments:
Post a Comment
yes