កឹមសុខា៖មិន​ដែល​ឃើញ​រដ្ឋាភិបាល​ប្រើ​ច្បាប់​អន្តោប្រវេសន៍លើ​ជន​ជាតិ​វៀតណាម

បណ្ដាជនវៀតណាម រស់នៅឃុំកំពង់លួង ស្រុកក្រគរ ខេត្តពោធិសាត់

លោក កឹម សុខា អនុប្រធានគណបក្សសង្គ្រោះជាតិបានអះអាងថា ច្បាប់អន្តោប្រវេសន៍នៅកម្ពុជា បច្ចុប្បន្នមិន​បានរឹតបណ្តឹង ដើម្បីអនុវត្តទៅលើជនអន្តោប្រវេសន៍ ដែលជាជនជាតិវៀតណាមនោះឡើយ។

លោក កឹម សុខា បានថ្លែងនៅក្នុងកិច្ចពិភាក្សាបេក្ខជនតំណាងរាស្ត្រ ឆ្នាំ២០១៣ ក្រោមការរៀបចំរបស់វិទ្យាស្ថានជាតិ ប្រជាធិបតេយ្យសម្រាប់កិច្ចការ អន្តរជាតិ(NDI) ដោយមានការចូលរួមពីគណបក្សចំនួនបី គឺគណបក្ស​ប្រជាជនកម្ពុជា គណបក្សសង្គ្រោះជាតិ និងគណបក្សខ្មែរអភិវឌ្ឍន៍សេដ្ឋកិច្ច ថា លំហូរចូលនៃជនអន្តោប្រវេសន៍​វៀតណាម ស្របច្បាប់ និងខុសច្បាប់មកកម្ពុជា ជិត៣០ឆ្នាំមកនេះ នៅតែបន្តកើនឡើង ដោយមិនមានច្បាប់​គ្រប់គ្រង​ឡើយ ហើយកម្ពុជា​អនុវត្ត​ច្បាប់នេះ តែចំពោះប្រទេសផ្សេងប៉ុណ្ណោះ។ លោកបានថ្លែងឲ្យដឹងទៀតថា ៖ «យើងមិនដែលឃើញរដ្ឋាភិបាល​យកច្បាប់​អន្តោប្រវេសន៍ យកទៅអនុវត្តន៍ ដើម្បីបញ្ជូនជនវៀតណាមណាម្នាក់ ទៅស្រុកវិញ ឬក៏យកទៅផ្តន្ទាទោស​តាម​ច្បាប់​ឡើយ»។

លោកបានថ្លែងឲ្យដឹងទៀតថា បច្ចុប្បន្ននេះ ការដែលជនជាតិវៀតណាមហូរចូលមកកម្បុជា គឺដោយសារដ្ឋាភិបាល​ពុំ​បាន​អនុវត្តច្បាប់ ។ លោកបានថ្លែងឲ្យដឹងថា ៖«បើសិនជាមានការអនុវត្តច្បាប់ គឺច្បាស់ជាពុំមានជនជាតិវៀតណាមហូរ​ចូល​បានទេ»។

លោក សួស វិរៈ ដែលបានចូលរួមស្តាប់កម្មវិធីឃោសនានយោបាយបាន ឲ្យដឹងថា អ្វីដែលគណបក្សប្រជាជនកម្ពុជា​លើកឡើង ពាក់ព័ន្ធនឹងលំហូរចូលនៃជនអន្តោប្រវេសន៍វៀតណាម ថាមិនមានសិទ្ធិក្នុងការហាមឃាត់នោះ គឺជាទង្វើរមួយ​ដែលមិនអាចទទួលយកបាន។ លោកបានឲ្យដឹងថា ៖«គាត់ថា គេចូលមក គាត់មិនអាចហាមឃាត់គេបានទេ ចុះហេតុអ្វី​ក៏ពុំយកច្បាប់មកអនុវត្តន៍ រឺមួយក៏ខ្លាចមិនហ៊ានប៉ះពាល់ជនជាតិវៀតណាម»។

លោកបានពន្យល់ថា ជនជាតិវៀតណាមមួយចំនួននៅកម្ពុជា មានសិទ្ធិលើសពីពលរដ្ឋកម្ពុជា ​ដោយខ្លះមាន​អត្តសញ្ញាណ​ប័ណ្ណ ប៉ុន្តែពលរដ្ឋខ្មែរខ្លះ ពុំមានអត្តសញ្ញាណប័ណ្ណដោយសារពុំមានលុយសូកអាជ្ញាធរ។ លោកបានបន្ថែមថា៖ «យើង​ឃើញជាក់ស្តែង ពលរដ្ឋយើងទៅធ្វើកានៅក្រៅប្រទេស ពេលត្រឡប់មកវិញបាត់សិទ្ធិបោះឆ្នោត តែជនជាតិ​វៀតណាម​បែរជាមានសិទ្ធិបោះឆ្នោត»។

រដ្ឋលេខាធិការក្រសួងមហាផ្ទៃ លោកស្រី ជូ ប៊ុនអេង បដិសេធចំពោះការលើកឡើងនោះដោយលោក ស្រីបានឲ្យដឹងថា នោះគឺជាការលើកឡើងរបស់គេ ហើយវាគឺជាសិទ្ធិរបស់គាត់។ លោកស្រីបានឲ្យដឹងទៀតថា ៖«វាជាសិទ្ធិរបស់គាត់ ពេល​ណាគាត់និយាយអស់ចិត្ត គឺគាត់ឈប់និយាយហើយ ប្រទេសមានច្បាប់»។

សូមរម្លឹកថា កាលពីថ្ងៃទី១៩ ខែមិថុនា២០១៣ ក្នុងពិធីសម្ពោធអាគារសិក្សា នៅស្រុកអង្គស្នួល ខេត្តកណ្តាល លោក​នាយករដ្ឋមន្ត្រីហ៊ុន សែន បានលើកឡើងថា គ្មានវត្តមានជនជាតិវៀតណាម រហូតដល់៤លាន៥សែននាក់នៅកម្ពុជា ដូច​ដែលគណបក្សប្រឆាំងនោះទេ គឺមានមិនដល់១០ម៉ឺននាក់ផង។

ហើយទាក់ទិននៅនិងការលើកឡើងនោះ កាលពីថ្ងៃទី២០ ខែមិថុនា ប្រធានចលនាយុវជនគណបក្សសង្គ្រោះជាតិ លោក សួង សុភ័ណ្ឌ ដែលជាបេក្ខជនតំណាងរាស្ត្រមណ្ឌលប៉ៃលិន បានដាក់ពាក្យបណ្តឹងទៅ សាលាដំបូងរាជធានីភ្នំពេញ ដោយប្តឹងលោកនាយករដ្ឋមន្ត្រី ហ៊ុន សែន ពីបទក្លែងបន្លំឯកសារសាធារណៈ ប៉ុន្តែបណ្តឹងនោះ ត្រូវបានសាលាឧទ្ទរណ៍​បដិសេធ ពុំទទួលពាក្យបណ្តឹងឡើយ។

យោងតាមច្បាប់អន្តោប្រវេសន៍ក្នុងមាត្រាទី២៩ បានឲ្យដឹងថា ជនបរទេសរូបណាដែលគ្មានការអនុញ្ញាត ហើយចូល​មក​ក្នុងប្រទេសកម្ពជា ដោយលួចលាក់ បន្លំ រឺ ដោយល្បិចផ្សេងទៀត ដែលផ្ទុយនិងបញ្ញាត្តិនៃច្បាប់ ត្រូវផ្តន្ទាទោសដាក់គុកពី ៣ ខែដល់៦ ខែ និងត្រូវបណ្តេញចេញ។ ត្រូវផ្តន្ទាទោសដូចគ្នានិងជនល្មើស ចំពោះជនណាដែលផ្តល់ជំនួយ រឺជួយ​លាក់​បាំងក្នុងការបញ្ជូនជនបរទេស ដែលគ្មានការអនុញ្ញាត មកក្នុងព្រះរាជណាចក្រកម្ពុជា។ មន្ត្រីរឺភ្នាក់ងាររាជការមាន​សមត្ថកិច្ច​រូបណា ដែលជាអ្នកសមគំនិត រឺជួយសម្រួលក្នុងការប្រព្រឹត្តបទល្មើសខាងលើ ត្រូវផ្តន្ទាទោសដាក់គុកពី៦ ខែ ដល់ ១ឆ្នាំ៕