ព្រះអង្គម្ចាស់ ក្សត្រិយ៍នរោត្តម វជ្ជរ៉ា ព្រះអនុជព្រះបរមរតនកោដ្ឋ ព្រះបាទ នរោត្តម សីហនុ ព្រះមាតាទីទៃគ្នា បានសោយទិវង្គត ក្នុងព្រះជន្មាយុ ៦៨ ព្រះវស្សា ដោយរោគាពាធ នៅប្រទេសបារាំង កាលពីយប់ម្សិលមិញ។ នេះបើតាមការប្រាប់ឲ្យដឹងពីអ្នកស្រី សុង ស៊ីដែន ជំនួយការផ្ទាល់របស់ព្រះអង្គម្ចាស់ នរោត្តម សិរីវុឌ្ឍ ដែលជាព្រះរាមព្រះអង្គម្ចាស់ក្សត្រិយ៍ នរោត្តម វជ្ជរ៉ា។
អ្នកស្រីបានប្រាប់ឲ្យដឹងទៀតថា ព្រះសពរបស់ព្រះអង្គម្ចាស់ក្សត្រិយ៍ នឹងត្រូវបានរៀបចំដើម្បីដង្ហែយាងត្រឡប់មកប្រទេសកម្ពុជានៅថ្ងៃនេះ។
អ្នកស្រីបានបន្តថា៖ «ពេលនេះយើងខ្ញុំកំពុងរៀបចំកម្មវិធីមួយចំនួន សម្រាប់ការទទួលនូវព្រះសព និងកម្មវិធីបុណ្យព្រះសពនៅរាជដំណាក់របស់ព្រះអង្គម្ចាស់ នរោត្តម សិរីវុឌ្ឍ»។
ព្រះអង្គម្ចាស់ ស៊ីសុវត្ថិ ធម្មិកោ បានថ្លែងប្រាប់ភ្នំពេញ ប៉ុស្តិ៍ ថា ព្រះអង្គម្ចាស់ក្សត្រិយ៍បានយាងទៅសម្រាកព្យាបាលរោគឯប្រទេសបារាំង តាំងពីឆ្នាំ២០០៨ ម៉្លេះ ពីព្រោះព្រះអង្គមានព្រះឈួនមហារីកសួត។
ព្រះអង្គមានបន្ទូលថា៖ «ព្រះអង្គម្ចាស់ក្សត្រិយ៍ នរោត្តម វជ្ជរ៉ា បានការពារប្រទេសជាតិនិងប្រជាជាតិខ្មែរ ដូចជា ព្រះអង្គបាន បង្ហាត់និងផ្សព្វផ្សាយនូវរបាំប្រពៃណីខ្មែរ និងរបាំព្រះរាជទ្រព្យ។ មិនតែប៉ុណ្ណោះ ព្រះអង្គម្ចាស់ក្សត្រិយ៍ ធ្លាប់ជាប្រធានគណៈកម្មការទី៥នៃរដ្ឋសភាជាតិអាណត្តិទី២ ឆ្នាំ ១៩៩៨ និងជាសមាជិកសភា ក្នុងឆ្នាំ ២០០៣»។
ព្រះអង្គ មានបន្ទូលទៀតថា៖«ការសោយទិវង្គតរបស់ព្រះអង្គម្ចាស់ក្សត្រិយ៍ គឺជាការបាត់បង់នូវធនធានមនុស្សដ៏សំខាន់មួយនៅកម្ពុជា។ ក្នុងនាមខ្ញុំជាសមាជិករាជវង្សខ្ញុំពិតជាសោកស្ដាយនិងមានទុក្ខក្រៀមក្រំជាខ្លាំងចំពោះដំណឹង ដ៏ក្រៀមក្រំនេះ»។
ព្រះអង្គម្ចាស់ ក្សត្រិយ៍ សមាជិករាជវង្សានុវង្សដ៏មានឥទ្ធិពលជាច្រើនដែលបានលាចាកនយោបាយជាច្រើន មានជាអាទិ៍ ព្រះអង្គម្ចាស់ នរោត្តម រណឫទ្ធិ អតីតសហ នាយករដ្ឋមន្ត្រី និងជាព្រះប្រធានគណបក្សរាជានិយម ហ៊្វុនស៊ិនប៉ិច និងព្រះអង្គម្ចាស់ នរោត្តម សិរីវុឌ្ឍ អតីតរដ្ឋមន្ត្រីក្រសួងការបរទេសព្រះអង្គម្ចាស់ នរោត្តម ចក្រពង្ស់ អតីតប្រធានគណបក្សរាជានិយម «នរោត្តមចក្រពង្ស់ព្រលឹងខ្មែរ» និងព្រះអង្គម្ចាស់ ស៊ីសុវត្ថិ ជីវ័ន មុនីរក្ស អតីតអនុប្រធានព្រឹទ្ធសភាពីគណបក្សហ៊្វុនស៊ិនប៉ិច៕
No comments:
Post a Comment
yes