សហភាពសហជីពកម្ពុជាគាំទ្រនិងចូលរួមមហាបាតុកម្មជាមួយគណបក្សសង្គ្រោះជាតិដើម្បីទាមទារយុត្តិធម៌ជូនម្ចាស់ឆ្នោត

លោក រ៉ុង ប្រធានសហភាពសហជីពកម្ពុជា

ដោយសារតែការបោះឆ្នោតអាណត្តិទី៥នេះ មិនមានតម្លាភាព និងយុត្តិធម៌ ទាំងគណបក្ស សង្គ្រោះជាតិ ទាំងប្រជាពលរដ្ឋខ្មែរ ទាំងអង្គការសង្គមស៊ីវិលជាតិ អន្តរជាតិ បានធ្វើការទាម​ទារឥតឈប់ឈរ ដើម្បីឲ្យមានដំណោះស្រាយក្នុងការផ្តល់យុត្តិធម៌ជូនប្រជាពលរដ្ឋដែលជា ម្ចាស់ឆ្នោត ។

ជាមួយគ្នានេះផងដែរ កាលពីថ្ងៃទី២៩ សីហា សហភាពសហជីពកម្ពុជា បានចេញសេចក្តីថ្លែង​ការណ៏របស់ខ្លួនដោយសម្តែងការគាំទ្រ និងចូលរួមធ្វើមហាបាតុកម្មអហិង្សា ជាមួយគណបក្ស សង្គ្រោះជាតិ ដើម្បីជំរុញឲ្យមានការបង្កើតគណៈកម្មការពិសេសមួយ ធ្វើការដោះស្រាយ​ដោយតម្លាភាព និងយុត្តិធម៌នូវភាពមិនប្រក្រតីពាក់ព័ន្ធ និងការបោះឆ្នោតជ្រើសតាំងតំណាង រាស្រ្ត នីតិកាលទី៥ កាលពីថ្ងៃទី២៨ ខែកក្កដា​ ឆ្នាំ២០១៣នេះ ។

អ្វីទាំងនេះក៏ដោយសារតែសហភាពសហជីពកម្ពុជា បានកត់សម្គាល់ឃើញថា គជប និងក្រុម ប្រឹក្សាធម្មនុញ្ញ គឺមិនបានផ្តល់ដំណោះស្រាយដោយតម្លាភាព និងយុត្តិធម៌តាមការស្នើសុំរបស់ គណបក្សសង្គ្រោះជាតិឡើយ។ ហើយម្យ៉ាងវិញទៀតគណបក្សប្រជាជន ពុំមានឆន្ទៈពិតប្រា កដក្នុងការចូលរួមបង្កើតគណៈកម្មការពិសេស ដើម្បីស្វែងរកដំណោះស្រាយ ដោយសន្តិវិធី ចំពោះភាពមិនប្រក្រតីនៃការបោះឆ្នោត ហើយមហាបាតុកម្មអហិង្សានេះ គឺជាជម្រើសចុង​ក្រោយរបស់គណបក្សសង្គ្រោះជាតិ បន្ទាប់ពីគ្មានដំណោះស្រាយ ។

ជាមួយគ្នានោះលោក រ៉ុង មានជំនឿងថា សមាជិ សមាជិការ សហភាពសហជីពកម្ពុជា កម្មករ គ្រូបង្រៀន យុវជន និស្សិតបញ្ញវ័ន្ត និងចូលរួមមហាបាតុកម្មអហិង្សា​ដែលរៀបចំដោយ​គណ​បក្ស​សង្គ្រោះ​ជាតិ នៅថ្ងៃទី៧ កញ្ញា មានចំនួនច្រើន​លើសលុប ។ 

ក្នុងនោះលោក រ៉ុង ឈុន បានធ្វើការបញ្ជាក់បន្ថែមថា ប្រសិនបើមានកម្លាំងសមត្ថកិច្ច ធ្វើការ​បិទ​ផ្លូវ រារាំងដល់សមាជិ សមាជិការ សហភាពសហជីពកម្ពុជា គ្រូបង្រៀន កម្មករ យុវជន និស្សិតបញ្ញវ័ន្ត គឺមិនអាចធ្វើទៅរួចបានឡើយដោយសារតែការចូលរួមនេះមិនមានការខុស​ច្បាប់​ទេ ព្រោះ​របបប្រជាធិបតេយ្យត្រូវបានធានា ក្នុងការប្រមូលផ្តុំសម្តែងមតិក្នុងការចង់បាន​យុត្តិធម៌ ។

ព្រមជាមួយគ្នានេះសហភាពសហជីពកម្ពុជា ក៏បានធ្វើការអំពាវនាវដល់សហគមន៏អន្តរជាតិ ជួយឃ្លាំមើលឲ្យបានដិតដល់បំផុត ក្នុងអំឡុងពេលមហាបាតុកម្មអហិង្សា ដែលនិងចាប់ផ្តើម នៅថ្ងៃសៅរ៏ ទី០៧ ខែកញ្ញា ខាងមុខនេះ និងជួយជំរុញឲ្យមានដំណោះស្រាយប្រកបដោយ​តម្លាភាព និងយុត្តិធម៌ ស្របតាមឆន្ទៈពិតប្រាកដរបស់ប្រជាពលរដ្ឋខ្មែរ ៕