សង្គមស៊ីវិល ដែលធ្វើការលើការបោះឆ្នោតមួយចំនួន បានផ្តល់អនុសាសន៍ក្នុងការបង្កើតគណៈកម្មាការត្រួតពិនិត្យភាពមិនប្រក្រតីនេះការបោះឆ្នោត ដោយតម្រូវឲ្យមានការសុំជំនួយពីភាគីអន្តរជាតិ ដោយសារនេះជាករណីធំមួយ ដែលត្រូវដោះស្រាយ។
ការលើកឡើងនេះ ធ្វើឡើងបន្ទាប់ពីគ.ជ.ប បានបដិសេធសំណើររបស់គណបក្សសង្គ្រោះជាតិ ដែលទាមទារឲ្យមានសង្គមស៊ីវិល និងអង្គការសហប្រជាជាតិ ជាអាជ្ញាកណ្តាលនៃគណៈកម្មការត្រួតពិនិត្យ ភាពមិនប្រក្រតីនៃការបោះឆ្នោត។
នាយកប្រតិបត្តិអង្គការឃ្លាំមើលការបោះឆ្នោត ហៅកាត់និចហ្វិច លោក ហង្ស ពុទ្ធា មានប្រសាសន៍ថា ប្រសិនបើគណបក្សសង្គ្រោះជាតិ លែងទុកចិត្ត គ.ជ.ប ហើយនោះ គួរតែមានភាគីដទៃ ដែលអាចទុកចិត្តបានទាំងអស់គ្នា មកធ្វើអាជ្ញាកណ្តាលក្នុងការស្វែងរក ភាពមិនប្រក្រតីក្នុងការបោះឆ្នោត ដែលទើបនឹងបញ្ចប់ទៅនេះ ៖ “ប្រសិនជារកច្រកមិនចេញទេ យើងប្រហែលជា ត្រូវការភាគីំមួយបន្ថែមទៀត ឬក៏លើសពីមួយដើម្បីស្វែងរកដំណោះស្រាយរួម ពីព្រោះខ្ញុំគិតថាយ៉ាងណាក៏ដោយ ការដោះស្រាយខាងនយោបាយ ហើយនឹងការបង្ហាញនូវលទ្ធផល ជាក់ស្តែងខាងបច្ចេកទេសនោះ អាចជួយឲ្យភាគីទាំងអស់អាចទុកចិត្តបាន”។
នាយកប្រតិបត្តិអង្គការឃ្លាំមើលការបោះឆ្នោតមួយ ហៅកាត់ថា ខុមហ្វ្រែល លោក គល់ បញ្ញា មានប្រសាសន៍ថា មិនត្រឹមតែទទួលយកភាគីមួយផ្សេងមកធ្វើជាអាជ្ញាកណ្តាលនោះទេ គឺត្រូវស្នើសុំជំនួយបច្ចេកទេសពីស្ថាប័នអន្តរជាតិដទៃទៀត ដើម្បីបង្កើតគណៈកម្មការនេះ ៖ “កន្លងមកការងារអង្កេត គជប គាត់អត់មានបច្ចេកទេស ពិសោធន៍អ្វី អត់មានយន្តការអ្វីច្បាស់លាស់ទេ ដោយយើងមើលនៅក្នុងបទបញ្ជា នីតិវិធីអត់មានទេ អញ្ចឹង គជប ត្រូវរៀបចំពង្រឹង រៀបចំវិធានការអង្កេតមើល ដែលអាចសុំជំនួយពីអ្នកខាងក្រៅមក”។
នាយកប្រតិបត្តិអង្គការតម្លាភាពកម្ពុជា លោក ព្រាប កុល មានប្រសាសន៍ គ.ជ.ប ត្រូវមានឆន្ទៈពិតប្រាកដ និងសម្រួលតួនាទីអង្គការសហប្រជាជាតិ ដើម្បីអាចទទួលយកបាន ៖ “គណបក្សសង្គ្រោះជាតិ គាត់ចង់ឲ្យអង្គការសហប្រជាជាតិ ធ្វើជាអាជ្ញាកណ្តាល មានន័យថាមានតួនាទី ជាអ្នកមានឥទ្ធិពល នៅក្នុងគណៈកម្មការនេះ អញ្ចឹងទៅប្រហែលជា គជប គាត់គិតថា ដូចជាធំដុំពេក តែប្រសិនសំរួលតួនាទីនេះ យករកមើលក្របខណ្ឌមុខងារណាមួយ ដែលអង្គការសហប្រជាជាតិចូលរួម គ្រាន់តែជាអ្នកសង្កេតការណ៍ ដឹងឮ ជាសាក្សីវិញ ឧបមាអញ្ចឹងចុះ ហើយទុកឲ្យគណៈកម្មការជំនាញ អង្គការសង្គមស៊ីវិល ហើយនឹង គជប គណបក្សនយោបាយ ធ្វើការងារនេះ ប៉ុន្តែដូចខ្ញុំជំរាបហើយជំរាបទៀត ថាធ្វើមែនទែន ធ្វើឲ្យម៉ត់ចត់ តាមបច្ចេកទេស និងវិជ្ជាជីវៈ”។
ប្រធានគ.ជ.ប លោក អ៊ឹម សួស្តី ថាគ.ជ.ប មានការសោកស្តាយដែរ ដោយសារយើងខិតខំប្រឹងប្រែង និងបើកទូលាយអស់ហើយ។ លោកថា ការស្នើសុំឲ្យមានអង្គការសហប្រជាជាតិ ហួសពីសមត្ថភាពរបស់គ.ជ.ប ហើយគ.ជ.ប មិនអាចរង់ចាំបានទេ តែគ.ជ.បនឹងដំណើរការយន្តការចាស់ដែលមាន។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ គ.ជ.ប ជាអ្នកបង្កើតបញ្ហា ដូច្នេះត្រូវតែដោះស្រាយបញ្ហា។ លោកថាដោយសារគ.ជ.ប មានកំហុស និងចង់លាក់បាំងកំហុស ដូច្នេះបានជាមិនចង់ឲ្យសង្គមស៊ីវិល និងអង្គការសហប្រជាជាតិ ចូលរួមស៊ើបអង្កេត។
បន្ទាប់ពីការបោះឆ្នោតបញ្ចប់ គណបក្សសង្គ្រោះជាតិ បានបដិសេធទទួលលទ្ធផលបណ្តោះអាសន្នប្រកាសដោយគ.ជ.ប ហើយទាមទារឲ្យបង្កើតគណៈកម្មការចម្រុះមួយ ដែលមានភាគីអង្គការសហប្រជាជាតិជាអាជ្ញាកណ្តាល និងគ.ជ.ប ជាអ្នកសម្របសម្រួល៕
No comments:
Post a Comment
yes