មន្ត្រីស្ថានទូតអាមេរិក នៅថ្ងៃចន្ទនេះ ជំរុញឲ្យកម្ពុជា ស៊ើបអង្កេតលើភាពមិនប្រក្រតីនៃការបោះឆ្នោត ដោយសន្តិវិធី និងសហការគ្នា ដោយមានការចួលរួមពីភាគីទាំងអស់ ដែលដើរតួនាទីស្ថាបនាមួយ។
អ្នកនាំពាក្យស្ថានទូតអាមេរិកប្រចាំកម្ពុជា លោកJohn Simmons មានប្រសាសន៍ថា សហរដ្ឋអាមេរិក បារម្ភនឹងភាពមិនប្រក្រតីជាច្រើន ដែលត្រូវបានរាយការណ៍ នៅក្នុងដំណើរបោះឆ្នោត ហើយយើងបានអំពាវនាវឲ្យមានការស៊ើបអង្កេតដោយពេញទំហឹង និងមានតម្លាភាព។ លោកបន្តថា ផ្លូវដែលបំផុតសម្រាប់កម្ពុជា គឺលទ្ធផលនៃការបោះឆ្នោត ត្រូវបានដោះស្រាយដោយសន្តិភាប និងសហការគ្នា។
កាលពីថ្ងៃអាទិត្យ ទី០៤ខែសីហា គណៈកម្មាធិការជាតិរៀបចំការបោះឆ្នោត (គជប) បានបដិសេធសំណើររបស់គណបក្សសង្គ្រោះជាតិ ដែលទាមទារឲ្យមានការបញ្ចូលសមាសភាពអង្គការសហប្រជាជាតិជាអាជ្ញាកណ្តាល ទៅ ក្នុងគណៈកម្មការចម្រុះ ដើម្បីត្រួតពិនិត្យលើភាពមិនប្រក្រតីនេះការ បោះឆ្នោត។
ប្រធានគជប លោក អ៊ឹម សួស្តី ថ្លែងប្រាប់អ្នកសារព័ត៌មានក្រោយពីកិច្ចប្រជុំជាមួយមន្ត្រីខ្លួនថា គជប មានការសោកស្តាយដែរ ដោយសារយើងខិតខំប្រឹងប្រែង និងបើកទូលាយអស់ហើយ។ លោកបន្ថែមថា ការស្នើសុំឲ្យមានអង្គការសហប្រជាជាតិ ហួសពីសមត្ថភាពរបស់គជប ហើយគជប មិនអាចរង់ចាំបានទេ តែគជប នឹងដំណើរការយន្តការចាស់ ដែលមាន។
រដ្ឋមន្ត្រីក្រសួងមហាផ្ទៃ លោក ស ខេង ប្រាប់អ្នកសារព័ត៌មាននៅថ្ងៃចន្ទនេះថា គជប នឹងដំណើរការអ្វី ដែលមិនស្រាប់ បើទោះជាមិនមានវត្តមានរបស់គណបក្សសង្គ្រោះជាតិ តែលោកស្វាគមន៍ចំពោះការចូលរួមរបស់គណបក្សប្រឆាំង។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ គជប ជាអ្នកបង្កើតបញ្ហា ដូច្នេះត្រូវតែដោះស្រាយបញ្ហា។ លោកថា ដោយសារគជប មានកំហុស និងចង់លាក់បាំងកំហុស ដូច្នេះ បានជាមិនចង់ឲ្យសង្គមស៊ីវិល និងអង្គការសហប្រជាជាតិ ចូលរួមស៊ើបអង្កេត។
គណបក្សសង្គ្រោះជាតិ ចង់ឲ្យអង្គការសហប្រជាជាតិ (UN) ធ្វើជាអាជ្ញាកណ្តាល ក្នុងដំណើរការស៊ើបអង្កេត និងដោះស្រាយភាពមិនប្រក្រតីនៃការបោះឆ្នោតជ្រើសតាំងតំណាង រាស្ត្រនីតិកាលទី៥ ថ្ងៃទី២៨ ខែកក្កដា ឆ្នាំ២០១៣។លិខិតរបស់លោក សម រង្ស៊ី បន្តថា គណបក្សសង្គ្រោះជាតិ ចង់បានគណៈកម្មការចំពោះកិច្ចមួយ ដែលមានការចូលរួមពីតំណាងគណបក្សទាំងពីរ ពីសង្គមស៊ីវិល អ្នកសង្កេតការណ៍ជាតិ-អន្តរជាតិ ដោយមាន គ.ជ.ប ជាអ្នកសម្របសម្រួល និងអង្គការសហប្រជាជាតិជាអាជ្ញាកណ្តាល៕
No comments:
Post a Comment
yes