លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច
ក្នុងយុទ្ធនាការឃោសនាបោះឆ្នោត
គណបក្ស ហ៊្វុនស៊ិនប៉ិច ដែលជាគណបក្សរាជានិយមបានចូលរួមជាមួយនឹង គណបក្សប្រឆាំង ដោយស្នើសុំឲ្យមានការចូលរួមពីអន្តរជាតិក្នុងការស៊ើបអង្កេតលើភាពមិនប្រក្រតីនៃការបោះឆ្នោតថ្ងៃទី២៨ ខែកក្កដា។
លោក ញឹក ប៊ុនឆៃ អគ្គលេខាធិការនៃគណបក្ស ហ៊្វុនស៊ិនប៉ិច បានថ្លែងពីម្សិលមិញថា៖ «ខ្ញុំបានស្នើសុំបង្កើតគណៈកម្មការឯករាជ្យ ដើម្បីស៊ើបអង្កេតលើភាពមិនប្រក្រតី»។
លោកបន្តថា គណបក្សនេះបានបរាជ័យក្នុងការឈ្នះអាសនៈមួយ ប៉ុន្តែ ការគណនាផ្អែកលើលទ្ធផលជុំទី១ ដែលចេញផ្សាយកាលពីថ្ងៃអាទិត្យតាមកញ្ចក់ទូរទស្សន៍ជាតិ បង្ហាញថា គណបក្សអាចឈ្នះមួយអាសនៈក្នុងខេត្ត បន្ទាយមានជ័យ ខណៈដែលតួលេខពេញលេញដែលចេញផ្សាយកាលពីមួយសប្តាហ៍មុន បង្ហាញថា គណបក្សខ្វះតែប្រហែល ២ ពាន់សំឡេងប៉ុណ្ណោះ។
លោក Shiro Harada សាស្រ្តាចារ្យ នៅសាកលវិទ្យាល័យ តូក្យូ ដែលមានមូលដ្ឋាននៅសាកលវិទ្យាល័យ នីតិសាស្រ្ត និងវិទ្យាសាស្រ្តសេដ្ឋកិច្ច ដែលបានសិក្សាពីការបោះឆ្នោតនៅកម្ពុជាបានថ្លែងថា៖ «ប្រសិនបើគណបក្ស ហ៊្វុនស៊ិនប៉ិច ទទួលបានសំឡេង ២.២២៦ ថែមទៀត ឬប្រសិនបើគណបក្សសង្គ្រោះជាតិទទួលបានសំឡេង ៤.៤៥២ តិចជាងមុននោះអាសនៈ ទី៦ នឹងត្រូវបែងចែកទៅឲ្យគណបក្ស ហ៊្វុនស៊ិនប៉ិច»។
លោកបន្តថា៖ «ចំនួនលម្អៀងបែបនេះមានលក្ខណៈប្រកែកគ្នា ក្នុងខេត្តខ្លះ ដែលនោះជាមូលហេតុដែលផ្អែកទៅតាមទស្សនវិស័យបច្ចេកទេស ដែលយើងគួរតែប្រុងប្រយ័ត្ន»។
បើទោះជាការស្រាវជ្រាវរបស់លោក Harada បង្ហាញថា ខេត្តបន្ទាយមានជ័យ ជាខេត្តមួយដែលគណបក្ស ហ៊្វុនស៊ិនប៉ិច មានឱកាសឈ្នះអាសនៈក៏ដោយក៏ប៉ុន្តែ លោក ញឹក ប៊ុនឆៃ បានថ្លែងថា គេជឿជាក់ថា ភាពមិនប្រក្រតីជាលក្ខណប្រព័ន្ធបានធ្វើឲ្យពួកគេបាត់បង់អាសនៈផងដែរ នៅក្នុងខេត្ត សៀមរាប ហើយនិងខេត្ត កំពង់ចាម។
លោក ញឹក ប៊ុនឆៃ បានបន្តថា៖ «ប្រសិនបើយើងដោះស្រាយភាពមិនប្រក្រតី យើងនឹងទទួលបានអាសនៈ។ នោះជាមូលហេតុដែលខ្ញុំទាមទារឲ្យបង្កើតគណៈកម្មការឯករាជ្យដោយ មានការចូលរួមពីសហគមន៍អន្តរជាតិ»។
គណៈកម្មាធិការជាតិរៀបចំការបោះឆ្នោត (គជប) នៅតែទទូចថា អ្នកឃ្លាំមើលក្នុងស្រុក ឬអន្តរជាតិមិនអាចចូលរួមក្នុងការស៊ើបអង្កេតបានទេ ជាមួយគ្នានឹងមន្រ្តីរដ្ឋាភិបាលជាច្រើន លើកឡើងថា ការចូលរួមនោះគឺខុសច្បាប់។
គណៈកម្មការចម្រុះដែលត្រូវចូលរួមដោយគណបក្សសង្គ្រោះជាតិ គណបក្សប្រជាជនកម្ពុជា និងមន្រ្តី គ.ជ.ប ជួបបរាជ័យ បន្ទាប់ពីគណបក្សប្រឆាំងបានធ្វើពហិការ ដោយសារតែអវត្តមានពីភាគីអន្តរជាតិ។
ក្នុងការបោះឆ្នោតកន្លងមក ហ៊្វុនស៊ិនប៉ិច បានសំឡេងឆ្នោតជាង ២៤២ ០០០ នៃសំឡេងឆ្នោតជាង ៦,៦ លាននាក់ នេះបើយោងតាមតួលេខចុងក្រោយបង្អស់របស់ គ.ជ.ប ដែលចំនួននេះ គឺស្មើនឹង ៣,៥ ភាគរយ។
លោក ញឹក ប៊ុនឆៃ បានចង្អុលបង្ហាញថា៖ «វាមិនមែនសូន្យទេ។ បើទោះជាភាពមិនប្រក្រតីបានប៉ះពាល់ដល់លទ្ធផលរបស់គណបក្ស ហ៊្វុនស៊ិនប៉ិច ក៏ដោយ យើងនៅតែទទួលបានសំឡេងឆ្នោតជាង ២៤ ម៉ឺន។ ដូច្នេះបើគិតអំពីភាពមិនប្រក្រតី យើងមានអ្នកគាំទ្រច្រើនជាងនេះ»៕
No comments:
Post a Comment
yes