លោកហ៊ុន សែនពេលទៅពិនិត្យការសាងសង់ស្ពានអាកាសស្ទឹងមានជ័យ
លោកនាយករដ្ឋមន្រ្តី ហ៊ុន សែន កាលពីថ្ងៃសុក្រ ហាក់បីដូចជាចំអក ឲ្យសភាសហរដ្ឋអាមេរិក ដោយជំរុញឲ្យធ្វើតាមសម្តីរបស់ពួកគេដែលចង់កាត់ជំនួយបរទេសចំពោះកម្ពុជា ប្រសិនបើពួកគេចាត់ទុកថា ការបោះឆ្នោតជាតិនៅកម្ពុជា ជាការបោះឆ្នោតខុសច្បាប់។
សវនាការសភានៅទីក្រុង វ៉ាស៊ីនតោន កាលពីខែមិថុនាបានពិនិត្យនៅលើលទ្ធភាពនៃការកាត់ជំនួយហិរញ្ញវត្ថុចំពោះកម្ពុជាប្រសិនបើការ បោះឆ្នោតនៅកម្ពុជាមិនមានលក្ខណៈសេរីនិងយុត្តិធម៌ ប៉ុន្តែ លោក ហ៊ុន សែន បានអះអាងថា លោកមិនភ័យខ្លាចចំពោះឱសានវាទបែបនេះទេ។
ទោះជាយ៉ាងណាក្តី ក្រុមអ្នកវិភាគ បានក្រើនរំឭកថា ការងាកចេញពីអាមេរិក ទៅរកចិន មិនប្រាកដថា នឹងមិនមានផលវិបាកនោះទេ។
លោក ហ៊ុន សែន បានថ្លែងកាលពីថ្ងៃសុក្រនៅពេលចុះទៅខេត្ត កណ្តាលថា៖ «នេះគឺជាពាក្យសម្តីពីសមាជិកសភា និងព្រឹទ្ធសមាជិកពីរបីនាក់ ដែលមិនមែនជាតំណាងឲ្យសំឡេងនៃពលរដ្ឋអាមេរិក និងរដ្ឋាភិបាលរបស់លោក អូបាម៉ា»។ លោកនាយករដ្ឋមន្ត្រីបានថ្លែងដូច្នេះពីមុនពេលប្រាប់សភាអាមេរិកថា៖ «កុំនិយាយច្រើនពេកកាត់វាទៅ»។
លោកបន្តថា រដ្ឋាភិបាល មិនចាប់អារម្មណ៍នឹងជំនួយនោះទេ ដែលលោកថាមានចំនួន ៥០ លានដុល្លារក្នុងមួយឆ្នាំ ហើយលោកថា ជនរងគ្រោះពិតប្រាកដ នឹងជាអង្គការក្រៅរដ្ឋាភិបាល និងអ្នកដែលទទួលផលប្រយោជន៍ពីកម្មវិធីនៃការប្រយុទ្ធនឹងមេរោគ និងជំងឺអេដស៍ និងកម្មវិធីប្រយុទ្ធនឹងជំងឺរបេងដែលទទួលមូលនិធិពីអាមេរិក។
លោក ហ៊ុន សែន ក៏បានរិះគន់ទៅលើជំនួយយោធាអាមេរិកផងដែរ ដែលលោកថា មានចំនួនប្រហែល ១ លានដុល្លារក្នុងមួយឆ្នាំ និងបានរំឭកអំពីកាលពេលមួយ ដែលសហរដ្ឋអាមេរិកបានផ្អាកការផ្តល់ជំនួយយានយន្តយោធា ១០០ គ្រឿងដែលខ្លួនសន្យាឲ្យកម្ពុជា ដោយសារក្តីបារម្ភអំពីបញ្ហាសិទ្ធិមនុស្សពាក់ព័ន្ធនឹងការសុំសិទ្ធិជ្រកកោនរបស់ជនជាតិភាគតិចអ៊ុយហ្គ័រ «ប៉ុន្តែនៅពេលចិនបានឃើញវា ចិនបានផ្តល់យានយន្តយោធាចំនួន ២៥៧ គ្រឿងជំនួសអាមេរិក»។
បើតាមតួលេខរបស់ក្រសួងការបរទេសអាមេរិក ជំនួយសរុបរបស់អាមេរិកចំពោះកម្ពុជាគឺមានចំនួនជិត ៧០ លានដុល្លារ ហើយលោក Carl Thayer អ្នកជំនាញវិភាគអំពីកម្ពុជានិងជាសាស្រ្តចារ្យនៅសាកលវិទ្យាល័យ New South Wales បានដាក់ជំនួយយោធាអាមេរិកថា មានចំនួនជិត ៦ លានដុល្លារ។
លោកបានកត់សម្គាល់នៅក្នុងអ៊ីមែលមួយថា ការកាត់ចំនួនធំមួយនឹងធ្វើឲ្យ «ប៉ះពាល់ទៅលើក្រុមប្រជាជនងាយរងគ្រោះបំផុតនិងក្រុមប្រជាជនក្រីក្រនៅក្នុងសង្គមកម្ពុជា» ប៉ុន្តែថា «ជំនួយនឹងអាចនៅតែផ្តល់ទៅឲ្យអង្គការក្រៅរដ្ឋាភិបាល»។
លោក Thayer បានថ្លែងថា៖ «ភាពក្លាហានរបស់លោក ហ៊ុន សែន ទៅកាន់សភាអាមេរិកឆ្លុះបញ្ចាំងពីជំនឿផ្ទាល់ខ្លួនថា គាត់កំពុងគ្រប់គ្រងកម្ពុជានិងអាចរក្សាឯករាជ្យភាពរបស់ កម្ពុជាពីសម្ពាធបរទេស»។
លោក Thayer បានកត់សម្គាល់អំពីថា ការជជែកតឹងរ៉ឹងអាចនឹងនាំឲ្យមានផលវិបាកនយោបាយ។ «ការច្រានចោលរបស់លោក ហ៊ុន សែន ចំពោះជំនួយរបស់អាមេរិកអាចនឹងធ្វើឲ្យសង្គមកម្ពុជាបែកជាពីរក្រុមបន្ថែមទៀត»។
អ្នកវិភាគនយោបាយឯករាជ្យ លោក បណ្ឌិត ឡៅ ម៉ុងហៃ បានសម្តែងទស្សនៈស្រដៀងគ្នាផងដែរ។ លោកថ្លែងថា៖« ប្រភេទនៃជំហរបែបនោះ បានធ្វើឲ្យសាធារណៈជនមិនពេញចិត្តជាមួយនឹងការគ្រប់គ្រង របស់គាត់រួចទៅហើយ ដូចឃើញតាមរយៈការបោះឆ្នោត»។
លោក ម៉ុងហៃ ក៏បានកត់សម្គាល់ផងដែរអំពីការរិះគន់ស្រដៀងគ្នា របស់លោក ហ៊ុន សែន ទៅលើអ៊ុនតាក់បន្ទាប់ពីការបោះឆ្នោតរៀបចំឡើងដោយអង្គការ សហប្រជាជាតិក្នុងឆ្នាំ ១៩៩៣។
លោកបន្តថា ចាប់តាំងពីទសវត្សរ៍ ៨០ «ប្រជាជនកម្ពុជាបានងាកទៅរកលោកខាងលិចជាពិសេសអាមេរិក» ហើយបើទោះបីជាមាន «ការវិនិយោគនិងជំនួយដ៏ធំពីចិនក្តី ខ្ញុំគិតថា ប្រជាជនកម្ពុជា មិនអាចភ្លេចបានទេអំពីជំនួយរបស់ចិនទៅលើពួកខ្មែរក្រហម»៕
No comments:
Post a Comment
yes