លោកសម រង្ស៊ី និងលោកកឹម សុខា ប្រធាន និងអនុប្រធានគណបក្សសង្គ្រោះជាតិ
ស្វាគមន៍អ្នកគាំទ្រដែលគេប៉ាន់ប្រមាណថា មានប្រមាណ២ ម៉ឺននាក់ នៅទីលាន
ប្រជាធិបតេយ្យក្នុងក្រុងភ្នំពេញ កាលពីល្ងាចម្សិលមិញ
មេដឹកនាំគណបក្សប្រឆាំងបានគំរាមធ្វើមហាបាតុកម្មប្រឆាំងនឹងលទ្ធផលនៃការបោះឆ្នោត មុនពេលគណៈកម្មាធិការជាតិរៀបចំការបោះឆ្នោត(គ.ជ.ប) ប្រកាសលទ្ធផលចុងក្រោយ នៅថ្ងៃទី៨ ខែកញ្ញា ដរាបណាភាពមិនប្រក្រតីនៃការបោះឆ្នោត មិនត្រូវបានដោះស្រាយឲ្យត្រឹមត្រូវនោះ។
ថ្លែងទៅកាន់មនុស្សប្រហែល ២ ម៉ឺននាក់ នៅទីលានប្រជា ធិបតេយ្យ កាលពីម្សិលមិញ លោក សម រង្ស៊ី ជាប្រធាននិងលោក កឹម សុខា អនុប្រធានគណបក្សសង្គ្រោះជាតិ បានប្រកាសជាថ្មីម្តងទៀតថា មហាបាតុកម្មនឹងធ្វើឡើងនៅមុនការប្រកាសលទ្ធផលជាផ្លូវការនៅខែក្រោយ។ ការបញ្ជាក់នេះ គឺជាការឆ្លើយតបនឹងប្រជាជនដែលបានចូលរួមក្នុងការជួបជុំនោះ ដែលបានសួរអំពីថ្ងៃជាក់លាក់ ក្នុងការធ្វើមហាបាតុកម្ម។
លោក សម រង្ស៊ី បានថ្លែងថា៖ «យើងនឹងធ្វើមហាបាតុកម្ម មុនពេលប្រកាសលទ្ធផលផ្លូវការ។ ប៉ុន្តែ យើងជំរុញឲ្យបង្កើតគណៈកម្មការឯករាជ្យ ដើម្បីស្វែងរកការពិត ផ្តល់យុត្តិធម៌។ ប្រសិនបើមានគណៈកម្មការនេះ យើងនឹងមិនធ្វើមហាបាតុកម្មទេ ប៉ុន្តែ គណៈកម្មការនេះមិនចេញទេ ហើយគេរាំងស្ទះមិនឲ្យចេញ ហើយគេត្រៀមប្រកាសលទ្ធផលផ្លូវការ នៅពេលនោះនឹងមានបាតុកម្ម»។
លោក កឹម សុខា បានប្រាប់អ្នកចូលរួមថា បាតុកម្មដំបូងធ្វើឡើងក្នុងពេលឆាប់ៗនៅភ្នំពេញ ហើយបន្ទាប់មកទៀតគឺនៅទូទាំងប្រទេស។
លោក កឹម សុខា បានបន្ថែមថា ៖ «មហាបាតុកម្មនោះ គឺជាមហាបាតុកម្មអហិង្សាក្នុងគោលបំណងទាមទារយុតិ្តធម៌ ដោយបង្កើតគណៈកម្មការឯករាជ្យ ដែលមានអង្គការជាតិនិងអន្តរជាតិ និងក៏មានអង្គការសហប្រជាជាតិជាអ្នកសង្កេតការណ៍ ហើយប្រសិនបើគេនៅតែមិនបង្កើត មហាបាតុកម្មនឹងកើតមានជាទូទៅ។ នេះគឺជាសេចក្តីសម្រេចរបស់មេដឹកនាំគណបក្សសង្គ្រោះជាតិ ដែលប្រជាជនបានរង់ចាំជាយូរមកហើយ»។
លោក កឹម សុខា បន្ថែមថា គណបក្សសង្គ្រោះជាតិ ក៏នឹងដាក់ពាក្យបណ្តឹងទៅតុលាការប្រឆាំងនឹងគ.ជ.ប ដោយចោទពីបទក្លែងឯកសារសាធារណៈ ដោយចេញទម្រង់ក្លែងក្លាយឲ្យប្រជាជន ដើម្បីប្រើប្រាស់ក្នុងការបោះឆ្នោត។
ទាក់ទងនឹងការចោទដោយលោក សម រង្ស៊ី និងលោក កឹម សុខា លោក អឹុម សួស្តី ប្រធានគ.ជ.ប មិនបានប្រាប់លម្អិតទេគ្រាន់តែថា មេដឹកនាំទាំងពីរចង់ដាក់ពាក្យបណ្តឹងទៅតុលាការឬធ្វើមហាបាតុកម្ម វាជាសិទិ្ធរបស់លោកទាងពីរទេ។
នៅសួនសេរីភាពមានមនុស្សយ៉ាងច្រើនកុះករ។ អ្នកទាំងនោះបានបង្ហាញពីឆន្ទៈចង់ធ្វើមហាបាតុកម្មខ្លាំងណាស់ ដោយថ្កោលទោស និងចោទ គ.ជ.ប ថា លួចសន្លឹកឆ្នោតឲ្យគណបក្សប្រជាជន។ នៅពេលលោក សម រង្ស៊ី និងលោក កឹម សុខា សួរថាតើគេចូលរួមមហាបាតុកម្មដែរឬទេ? គេលើកដៃ និងស្រែកថា គេនឹងចូលរួមធ្វើមហាបាតុកម្មដើម្បីរកយុតិ្តធម៌ដែលពួកគេកំពុងរង់ចាំ ហើយអ្នកខ្លះបានស្រែកថា ពួកគេនឹងចូលរួមធ្វើមហាបាតុកម្មដើម្បីស្វែងរកយុត្តិធម៌ដែលពួកគេកំពុងរង់ចាំ។
អ្នកស្រី ឡេង យីម អាយុ៥៩ឆ្នាំ ដែលបានឡើងទៅលើឆាកជាមួយលោក សម រង្ស៊ី និងលោក កឹម សុខា បានប្រាប់ទៅអ្នកចូលរួមទាំងអស់ថា៖ «ខ្ញុំជាស្រ្តីម្នាក់ ខ្ញុំសូមចូលរួមធ្វើមហាបាតុកម្ម។ គ.ជ.ប គឺជាអ្នកបង្កបញ្ហា។ ពេលនេះ គ.ជ.ប ធ្វើឲ្យខ្ញុំចង់ធ្វើបាតុកម្ម» ។ គាត់អះអាងថា ៖ «ប្រសិនបើខ្ញុំចូលរួមបាតុកម្ម ហើយអ្នកបាញ់ខ្ញុំស្លាប់ អ្នកក៏មិនមានផ្លូវដើរដែរ»។
ហឿន ប៊ុនធឿន ជាអ្នកគាំទ្រម្នាក់ទៀតបានបន្ទរថា៖ «ខ្ញុំជាអ្នកបោះឆ្នោតម្នាក់ ខ្ញុំបានបោះឆ្នោតឲ្យគណបក្សសង្គ្រោះជាតិ ខ្ញុំត្រូវការនាយករដ្ឋមន្រ្តីល្អ»។
ចំណែកឈ្មោះរិន ចាន់រិទ្ធិ បានថ្លែងថា៖ «ជាយុវជនម្នាក់ ខ្ញុំនឹងចូលរួមធ្វើបាតុកម្មដើម្បីស្វែងរកយុត្តិធម៌សម្រាប់ប្រជាជនខ្មែរ»។
ប៉ុន្តែ អ្នកនាំពាក្យរដ្ឋាភិបាលនិងជារដ្ឋមន្រ្តីក្រសួងព័ត៌មាន លោក ខៀវ កាញារីទ្ធ បានថ្លែងព្រមានថា រដ្ឋាភិបាលនឹងមិនអនុញ្ញាតឲ្យមេដឹកនាំគណបក្សសង្គ្រោះជាតិធ្វើមហាបាតុកម្មតាមដែលពួកគេចង់ទេ ដោយលោកបានអះអាងថា លោក សម រង្ស៊ី និង លោក កឹម សុខា ត្រូវតែទទួលខុសត្រូវចំពោះសកម្មភាពរបស់ពួកគេ។
លោក ខៀវ កាញារីទ្ធ ថ្លែងបន្តថា ៖ «មិនអីទេ ទុកឲ្យគាត់សាកមើលទៅ!គាត់ចង់ធ្វើបាតុកម្មដើម្បីឲ្យមានការផ្លាស់ប្តូរវាស្រេចតែគាត់ ប៉ុន្តែ រដ្ឋាភិបាលក៏កំណត់ទៅតាម[សកម្មភាពនោះ]»។
លោកបន្ថែមថា លោក សម រង្ស៊ី និងលោក កឹម សុខា ដែលបង្កភាពវឹកវរឲ្យមានការធ្វើមហាបាតុកម្ម បណ្តាលឲ្យមានចលា ចលនៅក្នុងប្រទេស ពួកគេត្រូវតែទទួលខុសត្រូវនៅចំពោះមុខច្បាប់។ អ្នកនាំពាក្យរូបនេះបានអះអាងដែរថា កញ្ចប់សុវត្ថិភាពត្រូវបានបើក ដូច្នេះ លទ្ធផលនឹងត្រូវបានឃើញច្បាស់ ហេតុដូច្នេះគណបក្សប្រជាជនកម្ពុជាដែលបានឈ្នះឆ្នោត មិនអាចធ្វើតាមតែអ្វីដែលគណបក្សសង្គ្រោះជាតិទាមទារនោះទេ៕
No comments:
Post a Comment
yes