មជ្ឈមណ្ឌលសិទ្ធិមនុស្សកម្ពុជា CCHR ព្រួយបារម្ភពីកង្វះតម្លាភាពរបស់ គណកម្មាធិការជាតិរៀបចំការបោះឆ្នោត(គ.ជ.ប) ពេលផ្ទៀងផ្ទាត់លទ្ធផលបោះឆ្នោត ក្នុងការដោះស្រាយពាក្យបណ្តឹងឲ្យគណបក្សនយោបាយ ដែលធ្វើឲ្យលទ្ធផលបោះឆ្នោត មិនអាចបញ្ជាក់ពីលទ្ធបោះឆ្នោតបាន។
សេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា ចុះផ្សាយនៅថ្ងៃសៅរ៍នេះបានរកឃើញថា រយៈពេល២ថ្ងៃគឺថ្ងៃទី១៥ និង១៦ ខែសីហា ដែល គ.ជ.ប ដោះស្រាយបណ្តឹងទៅលើខេត្តចំនួន៤គឺ មិនបានផ្ទៀងផ្ទាត់លទ្ធផលបោះឆ្នោត ជាមួយទម្រង់ដើម មាននៅក្នុងកញ្ចប់សុវត្ថិភាព(ក) នោះទេ ដោយផ្ទៀងផ្ទាត់តែទម្រង់ ១១០២ ១១០៤ និង១១០៩ ដែលខ្លួនទទួលបានពីឃុំតែប៉ុណ្ណោះ ដែលធ្វើឲ្យការផ្ទៀងផ្ទាត់នេះខ្វះតម្លាភាព។ សេចក្តីប្រកាសដដែលក៏បានជំរុញឲ្យ គ.ជ.ប បើកទម្រង់ដើម នៅក្នុងកញ្ចប់សុវត្ថិភាព ដើម្បីផ្ទៀងផ្ទាត់លទ្ធផល និងស៊ើបអង្កេតលើភាពមិនប្រក្រតី ក្នុងការរាប់សន្លឹកឆ្នោត មុននឹងមានការចេញផ្សាយលទ្ធផលបោះឆ្នោតនៅខែក្រោយ។
ប្រធានមជ្ឈមណ្ឌលសិទ្ធិមនុស្សលោក អ៊ូ វីរៈ ត្រូវបានដកស្រង់សម្តីមកសរសេរ ក្នុងសេចក្តីថ្លែងការណ៍នោះថា ការដោះស្រាយបណ្តឹងរបស់ គ.ជ.ប នៅពេលនេះ ធ្វើឲ្យមានការព្រួយបារម្ភពីភាពមិនប្រក្រតីនៅតែកើតមាន ហើយភាពមិនឯករាជ្យ នៃលទ្ធផលបោះឆ្នោត និង គ.ជ.ប នៅតែបន្តក្នុងភាពមន្ទិល។ លោកថា ប្រសិនបើគណៈកម្មាធិការនេះ ចង់ឲ្យមានតម្លាភាពពិតមែននោះ ត្រូវបើកទម្រង់ដើម នៅក្នុងកញ្ចប់សុវត្ថិភាព ដើម្បីស៊ើបអង្កេត៕
No comments:
Post a Comment
yes