អ្នកស្រី យ៉ោម បុប្ផា សកម្មជននៃសហគមន៍បឹងកក់
លោកយាយ ទឹម សាកមុនី អាយុ ៦៦ ឆ្នាំ សកម្មជនបុរីកីឡា បានជាប់ឃុំជាច្រើនខែជាមួយអ្នកស្រី យ៉ោម បុប្ផា សកម្មជនសិទិ្ធដីធ្លី បឹងកក់ ពេលអ្នកទាំងពីរជាប់នៅពន្ធនាគារ ព្រៃសជាមួយគ្នាពីឆ្នាំមុន។
រហូតដល់ថ្ងៃនេះ គាត់មិនជឿថា ស្ត្រីជាម្តាយវ័យ ៣០ រូបនេះទៅបញ្ជាឲ្យវាយប្រហារដោយប្រើពូថៅ និង ទួណឺវិសលើអ្នករត់ម៉ូតូឌុបពីរនាក់នោះឡើយ។
យាយ សាក់មុនី ប្រាប់ ភ្នំពេញ ប៉ុស្តិ៍ ថា៖ «ខ្ញុំមិនជឿថា យ៉ោម បុប្ផា ធ្វើដូច្នេះទេ។ ខ្ញុំស្គាល់គាត់ជាស្រ្តីចិត្តល្អម្នាក់។ យើងក្លាយជាមិត្តពេលជាប់គុក ៤ ខែជាមួយគ្នា។ គាត់សុំបង់ប្រាក់ឲ្យខ្ញុំ ដើម្បីឲ្យបានកន្លែងដេកល្អ តែខ្ញុំមិនព្រមព្រោះកុំឲ្យអស់ប្រាក់»។
ថ្ងៃនេះគម្រប់ខួប ១ ឆ្នាំ ដែលអ្នកស្រី យ៉ោម បុប្ផា ត្រូវនគរបាលស្លៀកស៊ីវិល ចាប់ខ្លួននៅបឹងកក់ ក្នុងរាជធានីភ្នំពេញ ហើយត្រូវចោទប្រកាន់និងកាត់ទោសឲ្យជាប់ពន្ធនាគារ ៣ ឆ្នាំ ពីបទជាមេខ្លោងនៃការវាយប្រហារនោះ។
លោក លួស សាខន អាយុ ៥៧ ឆ្នាំ ប្តីអ្នកស្រី បុប្ផា ក៏ត្រូវចាប់ខ្លួន និងចោទប្រកាន់នៅថ្ងៃនោះដែរ ប៉ុន្តែ គាត់មានសេរីភាពវិញនៅប៉ុន្មានម៉ោងក្រោយមក ខណៈដែលប្រពន្ធគាត់ត្រូវនាំទៅឃុំខ្លួនបណ្តោះអាសន្ន។
កាលពីម្សិលមិញលោកប្រាប់ថា៖ «ខ្ញុំមិនដឹងថាតើហេតុអ្វីគេបានសម្រេចឃុំស្រ្តី ហើយដោះលែងបុរស។ ខ្ញុំនៅតែឆ្ងល់អំពីចំណុចនេះ»។ លោក សាខន បានសង្ស័យពីដំបូងថា ប្រពន្ធគាត់និងយាយ សាក់មុនី គឺជាគោលដៅចាប់ខ្លួន ដោយសារតែភាពសកម្មរបស់ពួកគេ។
អ្នកស្រី បុប្ផា ត្រូវគេស្គាល់កាន់តែច្រើនក្នុងជម្លោះរ៉ាំរ៉ៃនៅបឹងកក់ នៅពេលគាត់ដឹកនាំបាតុកម្មស្នើសុំឲ្យដោះលែងស្រ្តី ១៤ នាក់ និងបុរសម្នាក់ពីពន្ធនាគារកាលពីខែ មិថុនា ឆ្នាំមុន។
លោក សាខន និយាយដែរថា ពេលមេដឹកនាំបាតុកម្មជាប់ឃុំនៅ ព្រៃស បុប្ផា បានបន្តរិះគន់ការអត្ថាធិប្បាយរបស់លោក ហោ ណាំហុង រដ្ឋមន្រ្តីការបរទេស ដោយចោទថា ៦ នាក់នៃ ១៥ នាក់មិនមែនមកពី បឹងកក់ទេ។ លោកថា៖ «អាជ្ញាធរមូលដ្ឋានខ្លះចង្អុលប្រាប់ប្រពន្ធខ្ញុំថា ក្នុងអំឡុងបាតុកម្មឈ្មោះគាត់មាននៅក្នុងបញ្ជីខ្មៅ ហើយអ្នកនឹងត្រូវជាប់គុក»។
អ្នកស្រី យ៉ោម បុប្ផា ត្រូវផ្តន្ទាទោសឃុំខ្លួនបីឆ្នាំ នៅចុងខែ ធ្នូ ពេលចៅក្រមនៅសាលាដំបូងភ្នំពេញ សម្រេចថា គាត់បានបញ្ជាប្អូនប្រុស យ៉ោម កន្លង់ និង យ៉ោម សិត ឲ្យវាយទៅលើលោក ង៉ែត ជិត និងបងប្អូនជីដូនមួយឈ្មោះ វ៉ាត់ ថៃសេង។
មជ្ឈមណ្ឌលសិទិ្ធមនុស្ស កម្ពុជាចេញសេចក្តីថ្លែងការណ៍ កាលពីម្សិលមិញថា៖ «រឿងក្តីប្រឆាំងនឹងអ្នកស្រី យ៉ោម បុប្ផា គឺផ្អែកលើការសន្មតថា ប្អូនប្រុសគាត់បានវាយប្រហារ ប៉ុន្តែប្អូនប្រុសគាត់ពុំមានវត្តមានការពារខ្លួននៅតុលាការឡើយ»។
សក្ខីកម្មក្នុងសំណុំរឿងអ្នកស្រី បុប្ផា រួមមានអ្នករត់ម៉ូតូឌុបពីរនាក់ដែលសារភាពថា ពួកគេបានផឹកស្រាមុនមានការវាយប្រហារនោះនិងមានសាក្សីដែលក្រុម អង្គការសិទ្ធិមនុស្សចោទថា ជាសាក្សីរៀបចំឡើង។
សេចក្តីថ្លែងការណ៍ពីសម្ព័ន្ធអង្គការក្រៅរដ្ឋាភិបាលចេញផ្សាយកាល ពីម្សិលមិញថា៖ «គ្មានចំណុចដែលព្រះរាជអាជ្ញាបានបង្ហាញភ័ស្តុតាងដែលអាចជឿបាន ឬសាក្សីដែលបង្ហាញថា អ្នកស្រី បុប្ផា ប្រព្រឹត្តឬរៀបចំផែនការវាយប្រហារហិង្សាពាក់ព័ន្ធនឹងការវាយ ប្រហារនៅក្នុងហាងផឹកស៊ីនោះទេ។ ផ្ទុយទៅវិញ អ្នកជិតខាងម្នាក់បានគាំទ្រទៅលើសក្ខីកម្មស៊ីគ្នារបស់ អ្នកស្រី បុប្ផា និងប្តីគាត់ពាក់ព័ន្ធនឹងសកម្មភាពពួកគេល្ងាចនោះ»។
ក្នុងសវនាការសាលាឧទ្ធរណ៍របស់អ្នកស្រី បុប្ផា កាលពីខែ មិថុនា អ្នករត់ម៉ូតូឌុបទាំងពីរនាក់ឆ្លើយផ្ទុយគ្នាប្រាប់តុលាការអំពីថា តើបងប្អូនប្រុសរបស់អ្នកស្រី បុប្ផា មួយណាដែលបានវាយប្រហារទៅលើពួកគេ។
តែទោះជាយ៉ាងណាចៅក្រម បានតម្កល់សាលក្រមរបស់សាលាដំបូងរាជធានីភ្នំពេញ ប៉ុន្តែបានបន្ថយទោសលើអ្នកស្រី យ៉ោម បុប្ផា មកត្រឹមពីរឆ្នាំ។
នៅក្នុងសេចក្តីថ្លែងការណ៍កាលពីថ្ងៃចន្ទ អង្គការលើកលែងទោសអន្តរជាតិ បានសុំឲ្យដោះលែងសកម្មជនរូបនេះ។
លោកស្រី Isabelle Arradon អនុប្រធានប្រចាំតំបន់អាស៊ីប៉ាស៊ីហ្វិក របស់អង្គការលើកលែងទោសអន្តរជាតិថ្លែងថា៖ «អ្នកស្រី យ៉ោម បុប្ផា មិនត្រូវគេបំភ្លេចទេ ក្នុងអំឡុងជាប់គាំងនយោបាយបច្ចុប្បន្ន»។
«ករណីរបស់គាត់និងសហគមន៍ បឹងកក់ គឺតំណាងឲ្យបញ្ហាមួយចំនួនដែលនាំឲ្យមានការ មិនពេញចិត្តកាន់តែខ្លាំងនៅក្នុងប្រទេសកម្ពុជា ដូចជា ការអភិវឌ្ឍមិនស្មើភាព ជម្លោះដីធ្លី ការបណ្តេញចេញពីដីធ្លីទាំងបង្ខំ និងប្រព័ន្ធយុត្តិធម៌ដែលមិនអាចការពារសិទ្ធិជនក្រីក្រ និងការបំបិទសិទ្ធិបញ្ចេញមតិ»៕
ប្រភពពី ភ្នំពេញប៉ុស្តិ័
No comments:
Post a Comment
yes