សម រង្ស៊ី កាលពីកន្លងទៅ
ប្រធានគណបក្សសង្គ្រោះជាតិ លោក សម រង្ស៊ី ប្រកាសនៅលើហ្វេសប៊ុករបស់លោក ដោយសុំជាអនុសាសន៍ និងយោបល់ប្រជាពលរដ្ឋ ក្នុងការពិចារណា សម្រាប់ការចរចានៅថ្ងៃសៅរ៍នេះ។
លោក សម រង្ស៊ី សរសេរថា នៅថ្ងៃសៅរ៍ទី១៤ ខែកញ្ញា ថ្នាក់ដឹកនាំគណបក្សសង្គ្រោះជាតិ ៣រូប មានទាំងរូបលោកផសង នឹងចូលគាល់ព្រះមហាក្សត្រ នៅព្រះបរមរាជវាំង ដើម្បីដោះស្រាយបញ្ហាប្រទេសជាតិ ជាមួយថ្នាក់ដឹកនាំកំពូល៣រូប នៃគណបក្សប្រជាជនកម្ពុជា។ លោកសម រង្ស៊ី បន្តសរសេរថា សូមបងប្អូនកូនក្មួយ មេត្តាជួយផ្តល់ជាយោបល់ ឬអនុសាសន៍ ឲ្យខ្ញុំអាចយកមកពិចារណា ឲ្យបានមុនម៉ោង៨និង៣០នាទីព្រឹក។
លោក សម រង្ស៊ី នឹងដឹកនាំគណៈប្រតិភូគណបក្ស រួមមាន អនុប្រធាន កឹម សុខា និងលោកស្រី ជូឡុង សូមួរ៉ា(ភរិយារបស់លោក សម រង្ស៊ី) នឹងទៅចូលរួមប្រជុំ ថៃ្ងទី១៤ កញ្ញា ២០១៣ នៅព្រះបរមរាជវាំង។
លោក សម រង្ស៊ី នៅថ្ងៃសុក្រនេះ ប្រកាសថា លោកនឹងចូលរួមការចរចា ក្រោមអធិបតីភាពរបស់ព្រះមហាក្សត្រ ដោយនឹងទូលព្រះមហាក្សត្រពីការទាមទាររបស់ប្រជារាស្ត្រ និងដំណោះស្រាយនៃការបោះឆ្នោតប្រកបដោយតម្លាភាព និងយុត្តិធម៌។លោក សម រង្ស៊ី បានថ្លែងទៅកាន់ប្រជាពលរដ្ឋថា៖«យើងនឹងទូលព្រះអង្គថាយើងអត់សុខចិត្តទេ ដរាបណាអត់មានដំណោះស្រាយប្រកបដោយតម្លាភាព និងយុត្តិធម៌ទាក់ទងនឹងលទ្ធផលនៃការបោះឆ្នោត មិនចាំបាច់ជជែករឿងអីផ្សេងទៀតទេ អត់ចង់ដឹងទេ អ្វីដែលសំខាន់គឺគោរពឆន្ទៈប្រជារាស្ត្រ»។
ក្នុងបទសម្ភាសន៍ជាមួយVODនៅព្រឹកថ្ងៃសុក្រ លោក កឹម សុខា មានប្រសាសន៍ថា ប្រសិនបើមិនមានគណៈកម្មការចម្រុះទេ ការចរចារឿងបែងចែកអំណាច មិនអាចមានទេ។ លោកបញ្ជាក់ថា គណបក្សសង្គ្រោះជាតិ នឹងលើកបញ្ហានេះទៅព្រះមហាក្សត្រ និងនាយករដ្ឋមន្ត្រី ហ៊ុន សែន។ លោកបន្តថា មហាបាតុកម្មរយៈពេល៣ថ្ងៃ នៅតែមាន បើទោះជាមានព្រះរាជសាររបស់ព្រះអង្គក៏ដោយ។
ព្រះហាក្សត្រព្រះបាទនរោត្តមសីហមុនី កាលពីថ្ងៃព្រហស្បតិ៍ បានអញ្ជើញលោកនាយករដ្ឋមន្ត្រី ហ៊ុន សែន និងលោកសម រង្ស៊ី ចូលប្រជុំគ្នា នៅថ្ងៃទី១៤ខែកញ្ញា ដើម្បីដោះស្រាយបញ្ហាប្រទេសជាតិ មុនការចូលប្រជុំសភាដំបូង។ ព្រះរាជសាររបស់ព្រះមហាក្សត្រ បង្ហាញថា សូមអញ្ជើញ លោក ហ៊ុន សែន និងសហការីចំនួនពីររូបទៀត និងលោក សម រង្ស៊ី ព្រមទាំងសហការីពីររូបទៀត ចូលរួមប្រជុំ ដោះស្រាយបញ្ហាប្រទេសជាតិ ក្រោមអធិបតីភាពរបស់ព្រះអង្គ នៅថ្ងៃទី១៤ខែកញ្ញា វេលាម៉ោង៩ព្រឹក នៅព្រះមហាប្រាសាទខេមរិន្ទ ព្រះបរមរាជវាំង។
លោកនាយករដ្ឋមន្ត្រី ហ៊ុន សែន បានឆ្លើយតបភ្លាមៗ នឹងព្រះរាជសាររបស់ព្រះមហាក្សត្រ ដោយនឹងដឹកនាំមន្ត្រីពីររូប គឺលោក ស ខេង និងលោក សាយ ឈុំ ដើម្បីចរចាជាមួយប្រធានគណបក្សសង្គ្រោះជាតិ លោក សម រង្ស៊ី នៅថ្ងៃសៅរ៍នេះ។
គួរបញ្ជាក់ថា កាលពីថ្ងៃទី០៨ខែកញ្ញា គជប បានប្រកាសជាផ្លូវការថា គណបក្សប្រជាជនកម្ពុជា ទទួលបាន៦៨អាសនៈ ប្រហែលជា៤៨.៨ ភាគ រយ នៃអ្នកចូលរួមបោះឆ្នោតសរុប៦.៦៣លាននាក់ ហើយគណបក្សសង្គ្រោះជាតិ ទទួលបាន៥៥អាសនៈ ស្មើនឹង៤៤.៥ភាគរយ គឺ២.៩២ លានសំឡេង។ តែគណបក្សសង្គ្រោះជាតិ បានច្រានចោលលទ្ធផលបោះឆ្នោត និងព្រមានធ្វើមហាបាតុកម្មជាបន្តបន្ទាប់៕
ប្រភពពី VOD
No comments:
Post a Comment
yes