សកម្មជនគណបក្សសង្គ្រោះជាតិ ប្រចាំខេត្តមណ្ឌលគិរី មួយរូប កំពុងជាប់ឃុំខ្លួននៅពន្ធនាគារខេត្តអស់រយៈពេលជាងមួយខែកន្លងមក ទាក់ទិនបទចោទប្រកាន់ក្នុងរឿងរំលោភលើទំនុកចិត្ត ក៏ប៉ុន្តែសកម្មជនរូបនេះចាត់ទុកការឃុំខ្លួននេះជាអំពើអយុត្តិធម៌ ពីព្រោះលោកមិនបានប្រព្រឹត្តខុសដូចការចោទនោះឡើយ។
ចំណែកមន្ត្រីជាន់ខ្ពស់គណបក្សសង្គ្រោះជាតិ ចាត់ទុកការចាប់ខ្លួនសកម្មជនរូបនេះថាជាផ្នែកមួយនៃសកម្មភាពគំរាមកំហែងផ្នែកនយោបាយ។
សកម្មជនគណបក្សសង្គ្រោះជាតិ មានឋានៈជាលេខាគណៈកម្មការប្រតិបត្តិបក្សប្រចាំខេត្តមណ្ឌលគិរី និងជាជំនួយការប្រធានក្រុមហ៊ុន ម៉ូប៊ីតែល (Mobitel) សាខាខេត្តមណ្ឌលគិរី គឺលោក តើន សុខណៃ ត្រូវសមត្ថកិច្ចកងរាជអាវុធហត្ថចាប់ខ្លួន កាលពីថ្ងៃទី២៩ ខែសីហា ឆ្នាំ២០១៣ នៅការិយាល័យក្រុមហ៊ុន ដោយសារក្រុមហ៊ុនបានប្ដឹងថាលោកមានពាក់ព័ន្ធយកប្រាក់ក្រុមហ៊ុនជាង ៦ម៉ឺនដុល្លារ ជាមួយប្រធានសាខាក្រុមហ៊ុន គឺលោក ភូ ប៉ូហេង។
ឆ្នាំនេះ លោកមានអាយុ ៣២ឆ្នាំ និងមានកំណើតជនជាតិដើមភាគតិចព្នង រស់នៅភូមិពូស្សាម ឃុំសែនមនោរម្យ ស្រុកអូររាំង។ លោក តើន សុខណៃ ត្រូវបានមន្ត្រីស្ថាប័នអយ្យកាតុលាការខេត្តមណ្ឌលគិរី សម្រេចចោទប្រកាន់ពីបទរំលោភសេចក្តីទុកចិត្ត ហើយចាប់ឃុំខ្លួនលោកបណ្ដោះអាសន្ននៅពន្ធនាគារខេត្ត តាំងពីពេលនោះរហូតមក។
លោក សុខណៃ មិនប្រាកដថាការចាប់ខ្លួនលោកមានជាប់ពាក់ព័ន្ធទៅនឹងបញ្ហារើសអើងនយោបាយ ឬយ៉ាងណាទេ ក៏ប៉ុន្តែលោកប្រាកដថា មិនបានឃុបឃិតយកប្រាក់ក្រុមហ៊ុនដូចការចោទនោះឡើយ។ លោកទទួលស្គាល់ថា គ្រាដែលក្រុមសមត្ថកិច្ចកងរាជអាវុធហត្ថឃាត់ខ្លួនលោក គឺក្រុមសមត្ថកិច្ចទាំងនោះរកឃើញឯកសារគណបក្សសង្គ្រោះជាតិ មួយចំនួននៅជាប់នឹងខ្លួនលោក។ ហើយនេះ ទំនងជាហេតុផលមួយដែលត្រូវសមត្ថកិច្ចសម្រេចបញ្ជូនខ្លួនលោកទៅតុលាការ ដោយមិនមានភស្តុតាងអ្វីបញ្ជាក់ថា លោកជាប់ពាក់ព័ន្ធយកប្រាក់ក្រុមហ៊ុន។
លោក តើន សុខណៃ៖ «ខ្ញុំអត់ដឹងផង ដល់ពេលចាប់ហ្នឹង ក៏មានឯកសារនយោបាយក្នុងហ្នឹង ហើយឯកសារ ខ្ញុំជាលេខាធិការប្រចាំខេត្តមណ្ឌលគិរី ប៉ុន្តែខ្ញុំមកធ្វើការក្រុមហ៊ុនបណ្ដើរ។ ក្នុងលក្ខណៈហ្នឹង ខ្ញុំអត់បានយកទេ ខាងក្រុមហ៊ុនហ្នឹងគេប្ដឹងចាប់ពួកខ្ញុំនៅក្នុងការិយាល័យ ហៅពួកប៉េអិមចុះចាប់ដកហូតរបស់របរ និងទូរស័ព្ទរបស់ខ្ញុំ»។
កាលពីដើមខែកញ្ញា ភរិយា លោក តើន សុខណៃ គឺអ្នកស្រី ម៉េង គន្ធា អាយុ ២១ឆ្នាំ បានដាក់ពាក្យប្ដឹងសុំកិច្ចជួយអន្តរាគមន៍ពីមន្ត្រីឃ្លាំមើលសិទ្ធិមនុស្សសមាគមអាដហុក (Adhoc) ស្វែងរកយុត្តិធម៌ជួយប្ដីគាត់ដែលត្រូវជាប់ឃុំ ដោយមិនបានប្រព្រឹត្តទោសកំហុសអ្វី។ ក្នុងពាក្យប្ដឹងរបស់អ្នកស្រី បានសរសេរថា រឿងរ៉ាវបាត់ប្រាក់របស់ក្រុមហ៊ុន កើតឡើងមុនពេលប្ដីអ្នកស្រីចូលធ្វើការនៅក្រុមហ៊ុននេះទៅទៀត។ ចំណែកប្រធានសាខាក្រុមហ៊ុន គឺលោក ភូ ប៉ូហេង ក៏បានឆ្លើយសារភាពនៅការិយាល័យកងរាជអាវុធហត្ថថា លោកបានយកប្រាក់ជាង ៦ម៉ឺនដុល្លាររបស់ក្រុមហ៊ុនទៅព្យាបាលជំងឺ។
កាលពី ៣ឆ្នាំកន្លងទៅនេះ លោក តើន សុខណៃ ជាសមាជិកធម្មតារបស់គណបក្សសង្គ្រោះជាតិ នៅខេត្តមណ្ឌលគិរី។ កាលពីខែកុម្ភៈ ឆ្នាំ២០១៣ លោកបានតែងតាំងជាលេខាគណៈកម្មការប្រតិបត្តិគណបក្សប្រចាំខេត្តមណ្ឌលគិរី ដើម្បីចូលរួមការបោះឆ្នោតជ្រើសតាំងតំណាងរាស្ត្រនីតិកាលទី៥ ទើបកន្លងទៅនេះ។
មន្ត្រីជាន់ខ្ពស់គណបក្សសង្គ្រោះជាតិ ចាត់ទុកការចាប់ខ្លួនសកម្មជននេះថា ជាការរើសអើងនយោបាយ មិនមែនជារឿងយកប្រាក់ក្រុមហ៊ុននោះឡើយ។
សមាជិកគណៈកម្មការនាយកគណបក្សសង្គ្រោះជាតិ លោកស្រី ឡាក់ សុភាព កត់សម្គាល់ថា អត្តសញ្ញាណ និងឯកសារគណបក្សសង្គ្រោះជាតិ ដែលក្រុមសមត្ថកិច្ចរកឃើញនៅនឹងខ្លួន លោក តើន សុខណៃ គឺជាហេតុផលនៃការរើសអើង និងនាំឲ្យសមត្ថកិច្ចកងរាជអាវុធហត្ថសម្រេចបញ្ជូនសកម្មជននេះទៅតុលាការ និងឃុំខ្លួនដើម្បីគំរាមកំហែងស្មារតីសកម្មជនគណបក្សប្រឆាំង៖ «ចំពោះមុខ គឺអាជ្ញាធរសមត្ថកិច្ច និងកម្លាំងប៉េអិមហ្នឹង យើងឃើញថា អ្វីដែលជាករណីពិសេស គឺបញ្ហាផ្នែកនយោបាយហ្នឹងធំជាងអ្វីទាំងអស់។ ធំជាងរឿងបញ្ហាលុយកាក់។ អ្នកដែលយកលុយកាក់នោះ ប្រធានសាខារបស់គាត់អ្នកចាយលុយហ្នឹងរយៈពេល ៥ឆ្នាំហើយ គឺបាត់ម្តងបន្តិចៗ បើគេសរុបទៅ ៦១.៤០០ដុល្លារ ដល់ហើយមកចាប់ខ្លួនគាត់ដែលអត់បានប៉ះពាល់អ្វី ចាប់យកទៅឃុំខ្លួន»។
នៅក្នុងពន្ធនាគារប្រមាណ ២សប្ដាហ៍ លោក តើន សុខណៃ បានធ្លាក់ខ្លួនឈឺ ហើយមន្ត្រីពន្ធនាគារបានបញ្ជូនលោកទៅមន្ទីរពេទ្យខេត្ត ខណៈជំងឺលោកមានសភាពធ្ងន់ធ្ងរ។
មន្ត្រីសម្របសម្រួលសមាគមអាដហុក ខេត្តមណ្ឌលគិរី លោក សុក រដ្ឋា មានប្រសាសន៍បញ្ជាក់ថា នៅក្នុងមន្ទីរពេទ្យ លោក តើន សុខណៃ ស្ថិតក្រោមការឃ្លាំមើលរបស់មន្ត្រីពន្ធនាគារ និងសមត្ថកិច្ចប៉ូលិស ចំណែកមន្ត្រីកងរាជអាវុធហត្ថ មិនបានសហការផ្តល់លទ្ធភាពឲ្យមន្ត្រីលោក អង្កេតពីហេតុផលពិតប្រាកដនៃការចាប់ខ្លួនសកម្មជនគណបក្សប្រឆាំងនេះឡើយ។
លោកបន្តថា នឹងធ្វើលិខិតអន្តរាគមន៍ជូនមន្ត្រីស្ថាប័នតុលាការ រួមទាំងផ្តល់មេធាវីការពារក្តីជូនជនជាប់ចោទ ដើម្បីស្វែងរកយុត្តិធម៌ក្នុងបញ្ហានេះ៖«ពេលដែលចុះទៅសួរព័ត៌មានពីជនរងគ្រោះហ្នឹង ប៉ូលិសមកប្រហែលជា ៦-៧នាក់ ច្រូងច្រាងព័ទ្ធសកម្មជនសិទ្ធិមនុស្សយើងហ្នឹង ពីហេតុផលថាមូលហេតុអ្វីបានជាយើងមកទាក់ទងជនរងគ្រោះអ៊ីចឹង។ រយៈពេលទៅសួរព័ត៌មានពីអាជ្ញាធរអាវុធហត្ថដែរ ប៉ុន្តែពេលទៅដល់ហ្នឹង គាត់បានដេញយើងចេញពីមុខរបងអាវុធហត្ថ ថានៅក្នុងគ្មានអ្នកធ្វើការអ្វីទេ ហើយមិនបាច់សួរព័ត៌មានអ្វីទេ»។
ទាក់ទិនករណីនេះដែរ ព្រះរាជអាជ្ញាអមតុលាការខេត្តមណ្ឌលគិរី លោក ឃុត សុភាង បដិសេធថា ការសម្រេចចោទប្រកាន់ទៅលើជនសង្ស័យ គឺមានភស្តុតាងដាក់បន្ទុក ដែលនាំឲ្យមានការឃុំខ្លួនជនជាប់ចោទជាបណ្ដោះអាសន្ន ដើម្បីស៊ើបអង្កេតបន្ត។ លោកអះអាងថា ការសម្រេចរបស់ស្ថាប័នតុលាការ គឺអនុវត្តតាមនីតិវិធីច្បាប់ មិនទាក់ទិនបញ្ហានយោបាយអ្វីឡើយ៖ «មិនមែនអ៊ីចឹងទេ កិច្ចការតុលាការមិនអាចលូកលាន់ជាមួយអ្នកនយោបាយអ្វីទេ បទល្មើស គឺបទល្មើស។ ដូច្នេះ ការចាប់ខ្លួន គឺមានភស្តុតាងច្បាស់លាស់ ដែលអាចឲ្យមានការឃុំខ្លួនបាននោះ»។
ទោះជាយ៉ាងនេះក៏ដោយ ចំពោះ លោក តើន សុខណៃ ចាត់ទុកថា ការចាប់ និងឃុំខ្លួនលោកនៅពេលនេះ គឺជារឿងអយុត្តិធម៌។ លោកអំពាវនាវសុំឲ្យតុលាការស៊ើបអង្កេតជាក់លាក់ ផ្តល់យុត្តិធម៌ពីការចោទប្រកាន់ និងប្រគល់សេរីភាពឲ្យលោកវិលទៅបំពេញភារកិច្ចចិញ្ចឹមក្រុមគ្រួសារ និងចូលរួមក្នុងសកម្មភាពបម្រើសង្គមជាតិឡើងវិញ៕
No comments:
Post a Comment
yes