កម្មកររោងចក្រSL នៅព្រឹកថ្ងៃសុក្រនេះ សម្តែងការខកចិត្តនឹងមន្ត្រីសាលារាជធានីភ្នំពេញ និងមន្ត្រីខុទ្ទកាល័យនាយករដ្ឋមន្ត្រី ដែលមិនបានអនុញ្ញាតឲ្យពួកគេចូលចរចារកដំណោះស្រាយ តាមការសន្យា។
នៅព្រឹកនេះ កម្មកររោងចក្រSL ប្រមាណជា៣០០០នាក់ បានដង្ហែជាក្បួន ដោយមានគម្រោងចូលមករាជធានីភ្នំពេញ ដើម្បីស្វែងរកដំណោះស្រាយពីស្ថាប័នពាក់ព័ន្ធ។កម្មករតវ៉ានៅថ្ងៃនេះ ដោយចោទក្រុមហ៊ុនថា បានបិទទ្វារមិនឲ្យពួកគាត់ចូលធ្វើការ និងមិនបានផ្តល់សំណងសមរម្យដល់ពួកគេ។កម្មករឲ្យដឹងថា សាលារាជធានីភ្នំពេញ បានកោះហៅតំណាងកម្មករ៣០នាក់ ចូលជួបចរចានៅខុទ្ទកាល័យនាយករដ្ឋមន្ត្រី។
កម្មករ ឲ្យដឹងថា នៅពេលពួកគេមកជួបនៅក្បែរផ្ទះលោកនាយករដ្ឋមន្ត្រី ពួកគេ មិនត្រូវបានហៅឲ្យចូលជួបចរចាទេ ដោយមន្ត្រីខុទ្ទកាល័យទាមទាររកញត្តិ រួចសន្យាថា នឹងដោះស្រាយនៅពេលក្រោយទៀត។ តំណាងកម្មករ បានវិលត្រឡប់ទៅរោងចក្រវិញ ដោយព្រមានថា នឹងតវ៉ានៅពេលក្រោយទៀត។
នៅព្រឹកថ្ងៃសុក្រនេះ កម្លាំងសមត្ថកិច្ចចម្រុះជិត១ពាន់នាក់ ត្រូវបានដាក់ពង្រាយនៅផ្លូវទំនប់ថ្មី ផ្លូវ៣៧១ ចម្ការដូង ខណ្ឌមានជ័យ ដើម្បីទប់ស្កាត់កុំឲ្យកម្មកររោងចក្រSL ចូលមករាជធានីភ្នំពេញ ស្វែងរកដំណោះស្រាយ។ កម្លាំងសមត្ថកិច្ចប្រដាប់ដោយដំបងឆក់ និងខែល បានកំពុងយាមកាមនៅតំបន់នោះ។ ចំណែករថយន្តពន្លត់អគ្គិភ័យប្រមាណជា៦គ្រឿង ត្រូវដាក់បញ្ឈរនៅតំបន់នោះ។
ការតវ៉ារបស់កម្មកររោងចក្រSL បានអូសបន្លាយជាងមួយខែមកហើយ។ កន្លងទៅ ក្រសួងការងារ និងបណ្តុះបណ្តាលវិជ្ជាជីវៈ និងក្រសួងសង្គមកិច្ច យុទ្ធជន និងយុវនិតិសម្បទា បាន បញ្ជាឲ្យថៅកែរោងចក្រSL ទទួលយកកម្មករចូលធ្វើការវិញ និងព្រមានចាត់វិធានការមិនឲ្យថៅកែចេញក្រៅប្រទេស រហូតដល់មានដំណោះស្រាយទាំងអស់លើបញ្ហានេះ។
កម្មករទាមទារឲ្យក្រុមហ៊ុន ទូទាត់សំណងទាំង៥ចំណុច ស្របតាមច្បាប់ការងារ មិនមែនទូទាត់តែពីរទៅបីចំណុចនោះទេ។ រោងចក្រSL ស្ថិតនៅ ក្នុងភូមិឬស្សី សង្កាត់បឹងទំពុន ខណ្ឌមានជ័យ រាជធានីភ្នំពេញ ហើយកម្មករ បានតវ៉ាទាមទារលក្ខខណ្ឌការងារ១១ចំណុច។ រោងកច្រSL មានកម្មករជាង៦០០០នាក់៕
ប្រភពពី VOD
No comments:
Post a Comment
yes