ការតវ៉ាទាមទារឲ្យតុលាការដោះលែងអ្នកស្រីយ៉ោម បុប្ផា ដែលធ្វើឡើងដោយអ្នកភូមិបឹងកក់
ថ្ងៃទី៤កញ្ញា ឆ្នាំ២០១២-ថ្ងៃ៤កញ្ញា ឆ្នាំ២០១៣ ថ្ងៃនេះ គម្រប់មួយឆ្នាំ ដែលអ្នកស្រី យ៉ោម បុប្ផា សកម្មជនតវ៉ាដីធ្លីនៅបឹងកក់ ត្រូវបានចាប់ឃុំខ្លួន។ នៅថ្ងៃរម្លឹកខួបមួយឆ្នាំនៃការចាប់ខ្លួននេះ ក្រុមអ្នកភូមិបឹងកក់ប្រមាណ១០០នាក់ បានជួបជុំគ្នានៅបរិវេណវត្តភ្នំ មុនពេលដើរហែក្បួនទៅកាន់តុលាការកំពូល ដើម្បីស្រែកទាមទារឲ្យតុលាការផ្តល់យុត្តិធម៌ដល់អ្នកស្រី យ៉ោម បុប្ផា។
ក្រុមអ្នកភូមិបឹងកក់ចាស់ក្មេងប្រមាណ ១០០នាក់ ដែលរួមទាំងកូនប្រុសអាយុ៩ឆ្នាំ និងប្តីរបស់អ្នកស្រីយ៉ោម បុប្ផា ពាក់អាវយឺតខ្មៅ និងពាក់រូបថតអ្នកស្រីយ៉ោមបុប្ផានៅក្បាល បានជួបជុំនៅវត្តភ្នំ កាលពីព្រឹកព្រលឹមថ្ងៃពុធ ទី៤កញ្ញានេះ។ ថ្ងៃទី៤កញ្ញា ជាថ្ងៃគម្រប់មួយឆ្នាំគត់ ដែលស្ត្រីអ្នកភូមិបឹងកក់ អ្នកស្រី យ៉ោម បុប្ផា ត្រូវបានចាប់ឃុំខ្លួន។
អ្នកស្រី យ៉ោម បុប្ផា ត្រូវបានតុលាការក្រុងភ្នំពេញកាត់ទោសដាក់ពន្ធនាគារ៣ឆ្នាំ ក្នុងសំណុំរឿងព្រួតគ្នាវាយលើអ្នករត់ម៉ូតូឌុបពីរនាក់។ ក្រោយមកតុលាការសាលាឧទ្ធរណ៍បានបន្ថយទោសនៅសល់ ២ឆ្នាំ។ ក៏ប៉ុន្តែ អ្នកភូមិនិងសកម្មជនសិទ្ធិមនុស្សយល់ថា ករណីអ្នកស្រី យ៉ោម បុប្ផា ពាក់ព័ន្ធនឹងការតវ៉ារឿងដីធ្លី។ សព្វថ្ងៃនេះ សំណុំរឿងក្តីរបស់អ្នកស្រី យ៉ោម បុប្ផា កំពុងស្ថិតនៅតុលាការកំពូល។
ក្រុមអ្នកភូមិដឹកនាំដោយអ្នកស្រី ទេព វន្នី បានដើរហែក្បួនពីវត្តភ្នំ ទៅកាន់តុលាការកំពូល ដែលស្ថិតនៅខាងត្បូង ជាប់ព្រះបរមរាជវាំង។ ក្រុមអ្នកភូមិបានប្រមូលផ្តុំនៅមុខតុលាការ ស្រែកមេក្រូ ស្វែងរកយុត្តិធម៌ និងទទូចស្នើឲ្យតុលាការដោះលែងអ្នកស្រី យ៉ោម បុប្ផា។
ប៉ុន្តែ ការជួបជុំរបស់ភូមិបឹងកក់នៅព្រឹកនេះ មិនមានលើកបដាដូចពេលមុនៗទេ។ អ្នកស្រី ទេព វន្នី អះអាងថា ក្រុមអ្នកភូមិត្រូវបានអាជ្ញាធររារាំង និងចាប់ដកហូតយកបដាដែលបម្រុង នឹងនាំមកចូលរួមពិធីជួបជុំ នៅព្រឹកនេះ។
ពាក់ព័ន្ធនឹងករណីអ្នកស្រី យ៉ោម បុប្ផា គម្រប់១ឆ្នាំ ដែលត្រូវជា៣៦៥ថ្ងៃ អង្គការមជ្ឈមណ្ឌលសិទ្ធិមនុស្សកម្ពុជាក៏បានថ្លែងការណ៍បញ្ជាក់ជាថ្មីថា តុលាការផ្តន្ទាទោសអ្នកស្រី យ៉ោម បុប្ផា ខ្វះភស្តុតាងជាក់លាក់ ដើម្បីធ្វើការចោទប្រកាន់ ពីបទហិង្សាដោយចេតនា មានស្ថានទម្ងន់ទោស ពាក់ព័ន្ធនឹងករណីវាយទៅលើអ្នករត់ម៉ូតូឌុបពីរនាក់៕
No comments:
Post a Comment
yes