កងរាជអាវុធហត្ថ ប្រមាណជាង ១០០០នាក់ នឹងត្រូវដាក់ពង្រាយ នៅរាជធានីភ្នំពេញ ដើម្បីការពារសន្តិសុខ នៅថ្ងៃទី៧ ខែកញ្ញា ដែលជាថ្ងៃគណបក្សសង្គ្រោះជាតិ (CNRP) គ្រោងធ្វើមហាបាតុកម្មអហិង្សា នៅលើទីលានប្រជាធិតេយ្យ ទាមទារឲ្យមានការដោះស្រាយភាពមិនប្រក្រតីនៃការបោះឆ្នោត។
អ្នកនាំពាក្យកងរាជអាវុធហត្ថលើផ្ទៃប្រទេស លោក ខេង ទីតូ ប្រាប់VODនៅព្រឹកថ្ងៃពុធនេះថា កម្លាំងកងរាជអាវុធហត្ថ និងកម្លាំងនគរបាល មានលទ្ធភាពគ្រប់គ្រាន់ក្នុងការការពារមិនឲ្យមានការផ្ទុះហិង្សា ក្នុងអំទ្បុងមហាបាតុកម្ម។ លោកបន្តថា រថយន្តពន្លត់អគ្គីភ័យ រថយន្តសង្គ្រោះបន្ទាន់ រថពាសដែក និងឧបករណ៍ទប់ទល់ការកកស្ទះចររាចរណ៍ ក៏ត្រូវបានរៀបចំរួចស្រេចហើយ ៖ "កម្លាំងសមត្ថកិច្ចរបស់កងរាជអាវុធហត្ថ គឺបានដាក់ពង្រាយនៅតាមគោលដៅសំខាន់ៗ ក្នុងរាជធានី ជាពិសេសនៅគោលដៅដែលមានធ្វើការប្រមូលផ្តុំ ប្រជុំធ្វើបាតុកម្មអីហ្នឹង ដើម្បីសម្រួលសណ្តាប់ធ្នាប់ ឬក៏ចរាចរណ៍ និងការពាររក្សាសណ្តាប់ធ្នាប់នៅក្នុងតំបន់មានការប្រមូលផ្តុំ និងតំបន់ដទៃទៀត ដែលយើងត្រូវយកចិត្តទុកដាក់"។
អនុប្រធានគណៈកម្មាធិការវិន័យរបស់គណបក្សសង្គ្រោះជាតិ និងជាអ្នកដឹកនាំបាតុកម្មម្នាក់ លោក ហូរ វ៉ាន់ មានប្រសាសន៍ថា គណបក្ស និងសាលារាជធានីភ្នំពេញ បានពិភាក្សាគ្នាពីការរៀបចំសណ្តាប់ធ្នាប់ អំទ្បុងពេលបាតុកម្ម ដោយគណបក្សការពារសន្តិសុខនៅកន្លែងប្រមូលផ្តុំ។ ចំណែក អាជ្ញាធរជាអ្នកការពារសន្តិសុខ នៅជុំវិញបរិវេណខាងក្រៅទីលានប្រជាធិបតេយ្យ។ លោកសង្ឃឹមថា សមត្ថកិច្ចនឹងសហការជាមួយគណបក្ស ដើម្បីការពារសន្តិសុខសណ្តាប់ធ្នាប់ ឲ្យការតវ៉ារបស់ប្រជាពលរដ្ឋប្រកបដោយសុវត្ថិភាព ៖ "សណ្តាប់ធ្នាប់និងសុវត្ថិភាពរបស់បាតុករ តើយើងការពារបាតុកររបៀបយ៉ាងម៉េច ហើយយើងដាក់ក្រុមសណ្តាប់ធ្នាប់របស់គណបក្សផ្ទៃក្នុងហ្នឹងរៀបចំយ៉ាងម៉េច ហើយផ្ទៃក្រៅ កងកម្លាំងប៉ូលិសហើយនិងប៉េអឹមហ្នឹងដាក់យ៉ាងម៉េច ដើម្បីសហការគ្នា ធ្វើយ៉ាងណាឲ្យការធ្វើបាតុកម្មហ្នឹងប្រកបទៅដោយជោគជ័យ"។
មហាបាតុកម្មរបស់គណបក្សសង្គ្រោះជាតិ ដែលទទួលការអនុញ្ញាតពីសាលារាជធានីភ្នំពេញ ចាប់ផ្តើមពីម៉ោង ៧ព្រឹក រហូតដល់ម៉ោង ១១ព្រឹក ថ្ងៃសៅរ៍សប្តាហ៍នេះ ដោយមានអ្នកចូលរួមប្រមាណ២ម៉ឺននាក់។ លោកសម រង្ស៊ី និងលោក កឹម សុខា ប្រធាន និងអនុប្រធានគណបក្សសង្គ្រោះជាតិ នឹងសមាធិសុំសន្តិភាព។ គណបក្សប្រឆាំង បានប្រកាសថា បាតុកម្មនេះនឹងធ្វើឡើងដោយអហិង្សា ហើយគ្មានការដើរហែក្បួនតវ៉ា តាមដងផ្លូវឡើយ៕
ប្រភពពី VOD
No comments:
Post a Comment
yes