គ្រាប់បែកច្នៃពីគ្រាប់កាំភ្លើង អិម ៧៩ (M79) ដែលត្រូវគេប្រទះឃើញនៅក្នុងសួន
ខាងកើតស្ពាននាគ នៃរមណីយដ្ឋានវត្តភ្នំ នៅព្រឹកថ្ងៃទី១៣ ខែកញ្ញា ឆ្នាំ២០១៣
ករណីនេះ មន្ត្រីគណបក្សប្រឆាំង ចាត់ទុកជាការគំរាមកំហែងដល់គម្រោងដឹកនាំធ្វើមហាបាតុកម្មអហិង្សារបស់គណបក្សសង្គ្រោះជាតិ នៅចុងសប្ដាហ៍នេះ។
ប៉ូលិសបានឲ្យដឹងថា គ្រាប់បែកកែច្នៃត្រូវបានជនមិនស្គាល់មុខយកទៅបង្កៃទុកនៅសួនច្បារមុខមន្ទីររដ្ឋសភា ក្នុងសង្កាត់ទន្លេបាសាក់ ខណ្ឌចំការមន និងនៅសួនច្បាររូបសំណាកមហាត្មះគន្ធី ជាប់ស្ពាននាគជិតទីលានប្រជាធិបតេយ្យ ក្នុងសង្កាត់វត្តភ្នំ ខណ្ឌដូនពេញ។
ប៉ូលិសនិយាយថា គ្រាប់បែកកែច្នៃទាំងពីរទីតាំង ត្រូវប្រជាពលរដ្ឋផ្តល់ព័ត៌មានទៅសមត្ថកិច្ចនៅចន្លោះម៉ោងប្រមាណពី ៧ ទៅ ៨ព្រឹក ថ្ងៃសុក្រ ទី១៣ ខែកញ្ញា។
កងកម្លាំងសមត្ថកិច្ចចម្រុះ មានប៉ូលិសប្រឆាំងភេរវកម្ម ប៉ូលិសមូលដ្ឋាន និងមន្ត្រីដោះមីនអង្គការស៊ីម៉ាក់ បានចុះពិនិត្យដល់ទីកើតហេតុ និងបានបិទផ្លូវនៅជុំវិញទីតាំងទាំងពីរ។
ហេតុការណ៍នេះ អគ្គនាយកមជ្ឈមណ្ឌលកំចាត់មីនស៊ីម៉ាក លោក ហេង រតនា ក៏បានចុះផ្ទាល់ដល់កន្លែងកើតហេតុ និងបានសម្រេចឲ្យមន្ត្រីខ្លួន កម្ទេចគ្រាប់កែច្នៃដាក់ក្នុងប៊ីដុងជ័រ នៅមុខមន្ទីររដ្ឋសភាចោលនៅនឹងកន្លែង ព្រោះមិនអាចយកចេញបាន។ ចំណែកគ្រាប់ អិម ៧៩ ឬ សេវិនធីណៃ (M79) ចំនួន ៣គ្រាប់ចងផ្អោបគ្នា បង្កៃនៅសួនច្បារស្ពាននាគ ត្រូវមន្ត្រីស៊ីម៉ាក់ នាំយកទៅរក្សាទុក ដើម្បីទុកឲ្យសមត្ថកិច្ចជំនាញស្រាវជ្រាវ និងស៊ើបអង្កេតបន្ត។
សំឡេងបំផ្ទុះគ្រាប់បែកកែច្នៃនៅមុខមន្ទីររដ្ឋសភា បានបង្កឲ្យមានសំឡេងកងរំពង និងមានផ្សែងខ្មួលខ្មាញ់ នាំឲ្យប្រជាពលរដ្ឋធ្វើដំណើរឆ្លងកាត់ក្បែរតំបន់នោះភ្ញាក់ផ្អើល និងភ័យតក់ស្លុត។
ហេតុការណ៍នេះ ឃើញមានមន្ត្រីដឹកនាំស្ថាប័នប្រដាប់អាវុធពាក់ព័ន្ធ បានចុះមកពិនិត្យដល់ទីកន្លែងកើតហេតុ ក្នុងនោះក៏មានវត្តមាន លោក ជួន សុវណ្ណ ស្នងការនគរបាលរាជធានីភ្នំពេញដែរ។ ប៉ុន្តែ មន្ត្រីទាំងនោះមិនបានធ្វើអត្ថាធិប្បាយទេលើករណីជនមិនស្គាល់មុខបង្កៃគ្រាប់បែកនេះ។
អភិបាលខណ្ឌដូនពេញ លោក សុខ សម្បត្តិ ដែលបានចុះពិនិត្យដល់ទីតាំងកើតហេតុ ឲ្យដឹងថា អាជ្ញាធរបានប្រទះឃើញគ្រាប់ M79 ចំនួន ៣គ្រាប់ ត្រូវជនល្មើសចងផ្អោបគ្នាក្នុងថង់ប្លាស្ទិកពណ៌ខ្មៅមួយ ទុកនៅក្នុងសួនផ្កាខាងកើតស្ពាននាគ វេលាម៉ោងប្រមាណ ៨ព្រឹក ថ្ងៃសុក្រ ទី១៣ ខែកញ្ញា។ លោកថា ការរកឃើញគ្រាប់កែច្នៃនេះ តាមរយៈការផ្តល់ព័ត៌មានពីប្រជាពលរដ្ឋក្នុងមូលដ្ឋានរាយការណ៍ដល់សមត្ថកិច្ច។
លោកសន្និដ្ឋានថា ករណីបង្កៃគ្រាប់កែច្នៃនេះ ទំនងជាអាចមានជនណាមួយមានបំណងបង្កឲ្យមានចលាចលក្នុងសង្គម ក្រោយការបោះឆ្នោត៖«ចំនួន ៣គ្រាប់ M79 នៅទាំងគូថ មួយកំប្លេ។ ប្រហែលជាមានអ្នកណាមួយមានបំណងធ្វើឲ្យមានការភ្ញាក់ផ្អើលហើយ។ គ្រាប់នេះមានទាំងខ្សែភ្លើងមកជាមួយ។ ដូច្នេះ ទុកឲ្យជំនាញ ទុកឲ្យស៊ីម៉ាក់ ជាអ្នកពិនិត្យចុះ»។
លោក ហូរ វ៉ាន់ បេក្ខជនតំណាងរាស្ត្រមណ្ឌលភ្នំពេញ គណបក្សសង្គ្រោះជាតិ ដែលបានចុះដល់ទីតាំងដែលជនមិនស្គាល់មុខបង្កៃគ្រាប់ នៅជិតស្ពាននាគ ព្រឹកថ្ងៃទី១៣ ខែកញ្ញា។ លោកបានចាត់ទុកសកម្មភាពនេះថា ជាការគំរាមកំហែងដល់គម្រោងដឹកនាំធ្វើមហាបាតុកម្មអហិង្សារបស់គណបក្សសង្គ្រោះជាតិ នៅថ្ងៃទី១៥ ខែកញ្ញា។
យ៉ាងនេះក្តី លោកថា មហាបាតុកម្មអហិង្សាដឹកនាំដោយបក្សសង្គ្រោះជាតិ នឹងបន្តកើតមានតាមការគ្រោង និងមិនតក់ស្លុតទេ៖ «ខ្ញុំយល់ថា នេះវាជាការគំរាមកំហែងមួយទៅលើការចូលរួមរបស់បាតុករយើង។ ខ្ញុំយល់ថា នៅថ្ងៃទី១៥ ខែកញ្ញា នឹងមានបាតុករយ៉ាងច្រើនកុះករមកចូលរួម ទោះជាមានការគំរាមកំហែងបែបនេះក៏ដោយ ខ្ញុំសង្ឃឹមថា បាតុករយើងនឹងចូលរួមយ៉ាងច្រើនកុះករដូចការគ្រោងទុករបស់យើង»។
កាលពីថ្ងៃទី១២ ខែកញ្ញា ក៏មានករណីជនមិនស្គាល់មុខបានបង្កៃគ្រាប់បែកមួយគ្រាប់នៅក្បែរវេទិកាស្វាគមន៍ និងជួបជុំថ្នាក់ដឹកនាំគណបក្សសង្គ្រោះជាតិ និងសមាជិកគាំទ្រ នៅក្រុងសៀមរាប នាំឲ្យមានការភ្ញាក់ផ្អើលដូចគ្នានឹងទីក្រុងភ្នំពេញពេលនេះដែរ។
យ៉ាងណាក៏ដោយ សមត្ថកិច្ចចម្រុះនៅមិនទាន់កំណត់មុខសញ្ញារបស់ជនបង្កៃគ្រាប់ទាំងពីរទីតាំងនៅក្នុងរាជធានីភ្នំពេញ នៅឡើយទេ។ ប៉ុន្តែ សមត្ថកិច្ចបាននិយាយថា មន្ត្រីជំនាញកំពុងស៊ើបអង្កេត និងស្រាវជ្រាវ ដើម្បីរកអត្តសញ្ញាណជនដៃដល់ដោយយកចិត្តទុកដាក់៕
ប្រភពពី RFA
No comments:
Post a Comment
yes