ក្នុងពេលវិបត្តិនយោបាយថ្នាក់ជាតិរវាងគណបក្សប្រជាជនកម្ពុជា និងគណបក្សសង្គ្រោះជាតិ កំពុងតានតឹងនេះ អាជ្ញាធរនៅតាមមូលដ្ឋាននៃបណ្ដាខេត្តមួយចំនួន ក៏កំពុងរារាំងប្រជាពលរដ្ឋមិនឱ្យទៅចូលរួមធ្វើមហាបាតុកម្មឯទីក្រុងភ្នំពេញ ដែរ។ បន្ថែមលើនេះ ក្រុមអង្គការក្រៅរដ្ឋាភិបាលបានរកឃើញថា អាជ្ញាធរនៅតាមមូលដ្ឋានខ្លះក៏បានបំបិទសិទ្ធិសេរីភាពទទួលបានព័ត៌មាន ដោយមិនឱ្យប្រជាពលរដ្ឋបើកស្ដាប់ការផ្សាយរបស់វិទ្យុអាស៊ីសេរី និងវិទ្យុសំឡេងសហរដ្ឋអាមេរិក ជាដើម។
តើទង្វើបែបនេះ វាបំពានទៅនឹងច្បាប់អ្វីខ្លះរបស់ប្រទេសកម្ពុជា ព្រមទាំងសេចក្តីប្រកាសជាសកលស្ដីពីសិទ្ធិមនុស្សរបស់អង្គការសហប្រជាជាតិ?
ក្រុមប្រជាពលរដ្ឋមួយចំនួននៅខេត្តព្រះវិហារ និងខេត្តសៀមរាប បានអះអាងថា អាជ្ញាធរនៅតាមមូលដ្ឋាន កំពុងព្យាយាមបំភ័យពួកគេកុំឱ្យទៅចូលរួមធ្វើមហាបាតុកម្ម គាំទ្រគណបក្សសង្គ្រោះជាតិ និងនៅកន្លែងខ្លះ អាជ្ញាធរក៏ចង់បញ្ចៀសអ្នកភូមិមិនឱ្យស្ដាប់ការផ្សាយព័ត៌មានពីវិទ្យុបរទេសទេ។
ប្រភពពីប្រជាពលរដ្ឋនៅឃុំដានរុន ស្រុកសូទ្រនិគម ចម្ងាយជិត ៣០គីឡូម៉ែត្រភាគខាងកើតពីទីរួមខេត្តសៀមរាប បានឱ្យដឹងថា កាលពីពេលថ្មីៗ អាជ្ញាធរឃុំធ្លាប់បាននិយាយកុំឱ្យប្រជាពលរដ្ឋស្ដាប់វិទ្យុអាស៊ីសេរី និងវិទ្យុសំឡេងសហរដ្ឋអាមេរិក។
ស្ត្រីម្នាក់ជាអ្នកភូមិបេង ឃុំដានរុន ដែលមិនហ៊ានបញ្ចេញឈ្មោះ គាត់បានមានប្រសាសន៍ថា ប្ដីរបស់គាត់ គឺជាមនុស្សម្នាក់ដែលចូលចិត្តបើកស្ដាប់វិទ្យុអាស៊ីសេរី តាមទូរស័ព្ទដៃ។ ប៉ុន្តែ កាលពីពេលថ្មីៗ មេឃុំដានរុន បានប្រមូលអ្នកភូមិជាច្រើននាក់ទៅប្រជុំ ពីរឿងភូមិឃុំមានសុវត្ថិភាព និងការអភិវឌ្ឍ។
នៅក្នុងការជួបប្រជុំនោះ បន្ទាប់ពីចប់រឿងជាផ្លូវការ គឺបានចូលដល់រឿងនយោបាយម្ដង ដោយមេឃុំបានហាមប្រជាពលរដ្ឋកុំឱ្យទៅចូលរួមធ្វើមហាបាតុកម្មនៅទីក្រុងភ្នំពេញ។ បន្ថែមលើនេះ មេឃុំក៏បានប្រាប់ប្រជាពលរដ្ឋកុំឱ្យស្ដាប់ការផ្សាយវិទ្យុអាស៊ីសេរី និងវិទ្យុសំឡេងសហរដ្ឋអាមេរិក ជាដើម៖«គេហាមនោះឯង គេថាស្ដាប់វិទ្យុអាស៊ីសេរី ទៅ គឺមនុស្សទៅផ្សេង បើស្ដាប់ប៉ុស្តិ៍បាយ័ន គឺស្ដាប់ទៅចូលត្រចៀក។ មិនដឹងថាម៉េច បើគេហាមហើយ យើងប្រជាជនចេះតែតាមគេ បើអត់មានអ្នកណាគេជំទាស់ផង»។
បុរសម្នាក់ទៀតជាអ្នកភូមិបេង ដែលមិនហ៊ានបញ្ចេញឈ្មោះដូចគ្នានេះ បានមានប្រសាសន៍នៅមុនពេលដែលមហាបាតុកម្មអហិង្សាលើកទី២ ធ្វើឡើង ថា មេឃុំដានរុន បានប្រមូលប្រជាពលរដ្ឋទៅប្រជុំអំពីភូមិឃុំមានសុវត្ថិភាព និងការអភិវឌ្ឍ ហើយបានប្រាប់ប្រជាពលរដ្ឋកុំឱ្យបើកស្ដាប់ការផ្សាយរបស់វិទ្យុអាស៊ីសេរី មែន។ បុរសដដែលបានបញ្ជាក់ថា គាត់មិនសប្បាយចិត្តចំពោះមេឃុំដែលហាមប្រាមបែបនេះទេ ពីព្រោះគាត់ គឺជាអ្នកដែលចូលចិត្តស្ដាប់ព័ត៌មានពីវិទ្យុជាច្រើន៖ «គាត់និយាយការងារក្នុងឃុំរួចរាល់អស់ទៅ គឺគាត់និយាយថា បើយកល្អស្ដាប់ប៉ុស្តិ៍បាយ័នទៅត្រឹមត្រូវ បើប៉ុស្តិ៍អាស៊ីសេរី រាងបំផ្លើសបន្តិច។ គាត់ថា គួរស្ដាប់ក៏ស្ដាប់ បើមិនចង់ស្ដាប់ក៏បាន។ ខ្ញុំអត់ទេ ខ្ញុំបើកស្ដាប់រាល់តែថ្ងៃ ល្ងាចឡើងស្ដាប់ៗព័ត៌មានបាតុកម្ម បើកដាក់ចិញ្ចើមថ្នល់តូបខ្ញុំស្ដាប់ទៅ។ ស្ដាប់ព័ត៌មានបាយ័ន ខ្លះ ភាគច្រើនស្ដាប់អាស៊ីសេរី អាមេរិកាំង ទៀបភ្លឺស្ដាប់ដែរតើខ្ញុំ ព្រោះសិទ្ធិរបស់ខ្ញុំ ត្រូវតែស្ដាប់ យកចំណុចណាល្អៗ យើងវិភាគពិចារណាត្រង់ណាអាក្រក់ យើងមិនបាច់យក។ អាស៊ីសេរី ក៏ខ្ញុំស្ដាប់ អាមេរិកាំង ក៏ខ្ញុំស្ដាប់ ស្ដាប់គ្រប់ប៉ុស្តិ៍នោះឯង»។
ទោះយ៉ាងណា វិទ្យុអាស៊ីសេរី បានទូរស័ព្ទទៅ លោក អឿ ដាំ ជាមេឃុំដានរុន ជាច្រើនដង ដើម្បីសុំប្រតិកម្មជុំវិញការចោទប្រកាន់របស់ប្រជាពលរដ្ឋ អំពីការរារាំងសិទ្ធិទទួលព័ត៌មាននេះ ក៏ប៉ុន្តែ លោកមិនបានទទួលទូរស័ព្ទឆ្លើយតបថាយ៉ាងណានៅឡើយ។
ក្រុមអង្គការសិទ្ធិមនុស្សក្រៅរដ្ឋាភិបាល នៅខេត្តសៀមរាប បានសម្ដែងការព្រួយបារម្ភចំពោះការបិទសិទ្ធិសេរីភាពទទួលព័ត៌មានរបស់ប្រជាពលរដ្ឋពីអាជ្ញាធរ នៅក្នុងអំឡុងពេលដែលនយោបាយថ្នាក់ជាតិកំពុងមានវិបត្តិនេះ។
កាលពីពេលថ្មីៗ អង្គការសិទ្ធិមនុស្សលីកាដូ (Licadho) និងសមាគមការពារសិទ្ធិមនុស្សអាដហុក (Adhoc) បានចុះស៊ើបអង្កេតជុំវិញការបិទសិទ្ធិសេរីភាពប្រជាពលរដ្ឋខាងទទួលព័ត៌មាននោះ។
អ្នកស៊ើបអង្កេតរបស់អង្គការសិទ្ធិមនុស្សលីកាដូ អ្នកស្រី ឈុយ វ៉ាន់ថា បានមានប្រសាសន៍ថា អ្នកស្រីបានជួបសាកសួរប្រជាពលរដ្ឋ និងព្រះសង្ឃមួយចំនួន នៅក្នុងឃុំដានរុន នោះ ហើយប្រជាពលរដ្ឋ និងព្រះសង្ឃបានបញ្ជាក់ថា លោកមេឃុំដានរុន ពិតជាបាននិយាយកុំឱ្យប្រជាពលរដ្ឋបើកស្ដាប់ការផ្សាយរបស់វិទ្យុអាស៊ីសេរី មែន។
ចំណែកអ្នកស៊ើបអង្កេតរបស់សមាគមការពារសិទ្ធិមនុស្សអាដហុក លោក ច័ន្ទ ចំរើន បានមានប្រសាសន៍ថា លោកក៏បានស៊ើបអង្កេតឃើញដូចគ្នានេះដែរ។ លោក ច័ន្ទ ចំរើន បានមានប្រសាសន៍ថា ការដែលអាជ្ញាធរឃុំដានរុន លើកឡើងយ៉ាងដូច្នេះ គឺជាការបំបិទទៅលើសិទ្ធិសេរីភាពរបស់ប្រជាពលរដ្ឋគ្រប់រូប ដែលធានាដោយច្បាប់របស់ប្រទេសកម្ពុជា៖ «បើសិនជាគាត់និយាយដូចការអះអាងរបស់ប្រជាពលរដ្ឋមែន គឺថាខុសច្បាប់ហើយ។ បានសេចក្តីថា ក្នុងផ្លូវច្បាប់ ប្រជាពលរដ្ឋទូទៅមានសិទ្ធិទទួលបានព័ត៌មានគ្រប់បែបយ៉ាង គ្មានអ្នកណាមួយអាចមកហាមឃាត់គាត់មិនឱ្យទទួលបានព័ត៌មានទេ។ បើសិនជាការលើកឡើងយ៉ាងដូច្នេះ គឺថាពាក់ព័ន្ធដល់ការរារាំងសិទ្ធិទទួលបានព័ត៌មានហើយ គឺខុសច្បាប់ហើយ»។
ចំណែកនៅតាមភូមិមួយចំនួននៃសង្កាត់ជ្រាវ ក្រុងសៀមរាប កាលពីពេលថ្មីៗក៏មានប្រជាពលរដ្ឋខ្លះអះអាងថា អាជ្ញាធរបាននិយាយមិនឱ្យអ្នកភូមិបើកស្ដាប់ការផ្សាយវិទ្យុអាស៊ីសេរី ដូចគ្នានេះដែរ។
នៅខេត្តព្រះវិហារ ឯណោះវិញ មានសេចក្តីរាយការណ៍ថា បន្ទាប់ពីមានការប៉ះទង្គិចគ្នារវាងបាតុករ និងសមត្ថកិច្ចនៅទីក្រុងភ្នំពេញ បណ្ដាលឱ្យអ្នកខ្លះរងរបួស និងស្លាប់ម្នាក់មក គឺអាជ្ញាធរក្រុងព្រះវិហារ បានលើកយកចំណុចនេះបំភ័យប្រជាពលរដ្ឋ កុំឱ្យនាំគ្នាទៅចូលរួមបន្តធ្វើបាតុកម្ម ដែលកំពុងដឹកនាំដោយគណបក្សប្រឆាំង។
ច្បាប់រដ្ឋធម្មនុញ្ញដែលជាច្បាប់កំពូលរបស់ប្រទេសកម្ពុជា មាត្រា ៣៥ បានចែងថា ប្រជាពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច និងវប្បធម៌របស់ប្រទេសជាតិ។ ចំណែកមាត្រា ៤១ បានចែងថា ប្រជាពលរដ្ឋខ្មែរគ្រប់រូបមានសិទ្ធិសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ រួមនឹងសេរីភាពខាងការជួបប្រជុំផង។ ក្នុងសេចក្តីប្រកាសជាសកលស្ដីពីសិទ្ធិមនុស្សរបស់អង្គការសហប្រជាជាតិ ក៏បានចែងអំពីមនុស្សគ្រប់រូបមានសិទ្ធិគ្រប់គ្រាន់ក្នុងការទទួលបានព័ត៌មានប្រចាំថ្ងៃដែរ៕
No comments:
Post a Comment
yes