ភិក្ខុសង្ឃ សេក ឌីណា (ពាក់វែនតា) ដែលព្យាយាមដុតព្រះកាយនៅក្នុងបាតុកម្ម
នៅឯទីលានប្រជាធិបតេយ្យកាលពីថ្ងៃម្សិលមិញ
បន្ទាប់ពីសម្តែងការឈឺចាប់ទៅលើការដឹកនាំរបស់លោកនាយករដ្ឋ មន្រ្តី ហ៊ុន សែន ថា ពោរពេញទៅដោយភាពអយុតិ្តធម៌ ភ្លាមៗនោះភិក្ខុសង្ឃនាម សេក ឌីណា ព្រះជន្ម ៣៥ វស្សា បានទាញយកដបសាំងដែលលាក់ក្នុងស្បង់មកស្រោចប៉ុនប៉ងដុតព្រះកាយលើវេទិកា មហាបាតុកម្មរបស់គណបក្សសង្គ្រោះជាតិ កាលពីម្សិលមិញ។
ព្រះភិក្ខុ សេក ឌីណា បានឡើងលើវេទិកាកាលពីម្សិលមិញដែលរៀបចំដោយគណបក្សសង្គ្រោះជាតិ នៅសួនសេរីភាព ក្នុងការជួបជុំធ្វើបាតុកម្មថ្ងៃចុងក្រោយប្រឆាំងនឹងភាព អយុតិ្តធម៌ក្នុងការបោះឆ្នោត ហើយព្រះអង្គ បានមានសង្ឃដីកាថ្កោលទោសរដ្ឋាភិបាលរបស់លោក ហ៊ុន សែន ដែលបានកាន់អំណាចជាង ៣០ ឆ្នាំថា នាយករដ្ឋមន្ត្រីរូបនេះបានធ្វើបាបនិងសម្លាប់ប្រជាជនខ្មែរ ដោយបញ្ជូនពួកគេទៅ ក-៥ ហើយបានបំផ្លាញធនធានជាតិ។ លើសពីនេះព្រះតេជគុណបន្តថា លោក ហ៊ុន សែន បានផ្តល់ដីសម្បទានទៅក្រុមហ៊ុនបរទេស រហូតដល់ ៩៩ ឆ្នាំទៀតផង។
ព្រះអង្គមានថេរដីកាថា ៖ «ប្រសិនបើពិភពលោកខ្វាក់ភ្នែកមើលមិនឃើញប្រជាជនខ្មែរស្លាប់ដោយ សារអំពើព្រៃផ្សៃដែលបក្ខពួកលោក ហ៊ុន សែន ធ្វើពេលនេះតាម ហ្វេសប៊ុក។ ហេតុអ្វីមិនជួយខ្មែរ? ប្រសិនបើពិភពលោកមិនជឿថា បក្ខពួកលោក ហ៊ុន សែន សម្លាប់ប្រជាជន អាត្មាមកទីនេះ សូមដុតខ្លួនឯងធ្វើជាភ័ស្តុតាង»។
លោក សម រង្ស៊ី និងលោក កឹម សុខា ពុំបានថ្លែងសុន្ទរកថា ទាក់ទិននឹង ព្រះសង្ឃ ប៉ងដុតព្រះកាយនោះទេ ពេលមកដល់សួនសេរីភាព។
លោក សម រង្ស៊ី និងលោក កឹម សុខា គ្រាន់តែបានថ្លែងប្រាប់ទៅក្រុមបាតុករគាំទ្រថា បន្ទាប់ពីជួបប្រជុំជាមួយនឹងគណបក្សប្រជាជនជាង ៣ ម៉ោង គណបក្សទាំងពីរពុំទាន់ទទួលបានលទ្ធផលល្អ លើការដោះស្រាយបញ្ហានយោបាយប្រទេសជាតិនៅឡើយ។
លោក សម រង្ស៊ី បានប្រាប់បាតុករដែរថា កិច្ចប្រជុំកាលពីម្សិលមិញគណបក្សប្រជាជននិងគណបក្សសង្គ្រោះជាតិ ពុំបានព្រមព្រៀងដូចកិច្ចប្រជុំថ្ងៃចន្ទទេ ហើយលោក សម រង្ស៊ី ពុំបានថ្លែងលម្អិតអំពីកិច្ចប្រជុំនោះទេ ក្រៅតែពីអំពាវនាវឲ្យបាតុករត្រៀមចូលរួមក្នុងបាតុកម្មលើកក្រោយទៀត។ លោកក៏បានប្រាប់ទៅបាតុករថា គណបក្សសង្គ្រោះជាតិនឹងធ្វើពហិការកិច្ចប្រជុំសភានៅថ្ងៃ ទី២៣ ខែ កញ្ញា ប្រសិនបើបញ្ហានៅតែមិនទាន់បានដោះស្រាយ ដើម្បីរកយុតិ្តធម៌ជូនអ្នកបោះឆ្នោត។
លោក សម រង្ស៊ី បានថ្លែងថា៖ «គណបក្សសង្គ្រោះជាតិនិងអំពាវនាវឲ្យប្រជាជនចូលរួមក្នុង បាតុកម្មជាថ្មីម្ដងទៀតក្នុងពេលឆាប់ៗ។ ដូច្នេះ វាល្អណាស់ ដរាបណាឆន្ទៈរបស់យើងក្លាហាន យើងនៅតែប្តេជ្ញារួមគ្នា ខ្ញុំជឿជាក់ថា កម្លាំងយុតិ្តធម៌នឹងឈ្នះអំពើអយុតិ្តធម៌»។
លោក កឹម សុខា អនុប្រធានគណបក្ស ក៏បានលើកឡើងផងដែរថា គណបក្សប្រជាជនកំពុងខ្លាចបាតុកម្ម ដែលរៀបចំឡើងដោយគណបក្សសង្គ្រោះជាតិ និងថា ប្រសិនបើគណបក្សប្រជាជនមិនគិតអំពីយុតិ្តធម៌សម្រាប់អ្នកបោះឆ្នោតទេ មហាបាតុកម្មនឹងរៀបចំឡើងជាថ្មីនៅទូទាំងប្រទេសតែម្តង។
លោក កឹម សុខា ថ្លែងថា៖ «ថ្ងៃនេះ យើងគ្រាន់តែផ្អាកសិន ព្រោះយើងបានសន្យាជាមួយនឹងប្រជាជនថា យើងនឹងរៀបចំរយៈពេល ៣ ថ្ងៃ។ ឥឡូវ ៣ ថ្ងៃនេះ បានជោគជ័យ ប៉ុន្តែ យើងបន្តតស៊ូថែមទៀតក្នុងការចរចាដើម្បីទាមទារអ្វីដែលប្រជាជនចង់បានដោយតទល់ជជែកពិភាក្សា ហើយបើជជែកពិភាក្សាពីថ្ងៃនេះដល់ថ្ងៃទី ២២ ខែ កញ្ញា មិនអាចទទួលយកបាន នៅថ្ងៃ ទី២៣ ខែ កញ្ញា យើងជាតំណាងរាស្រ្តជាប់ឆ្នោតនៃគណបក្សសង្គ្រោះជាតិ នឹងមិនចូលរួមអង្គប្រជុំសភាដំបូងជាដាច់ខាត»។
លោក ឈាង វុន អ្នកនាំពាក្យរដ្ឋសភា និងជាតំណាងរាស្រ្តគណបក្សប្រជាជន ដែលបានចូលរួមក្នុងកិច្ចប្រជុំកាលពីម្សិលមិញ ពុំបានថ្លែងលម្អិតទេ ដោយថ្លែងប្រាប់ខ្លីថា អ្នករៀបចំធ្វើបាតុកម្មត្រូវទទួលខុសត្រូវចំពោះប្រវតិ្តសាស្រ្ត។
លោក កែម ឡី អ្នកវិភាគនយោបាយ បានលើកទឹកចិត្តគណបក្សប្រជាជន និងគណបក្សសង្គ្រោះជាតិ ឲ្យជួបចរចាគ្នាបន្ថែមទៀត បន្ទាប់ពីការចរចាលើកទី១ មានចំណុចវិជ្ជមាន បើទោះជាវាត្រូវការ ៣ ឬ ៥ ខែទៀតក្តី លោកបន្តថា ព្រះសង្ឃប៉ុនប៉ងដុតព្រះកាយគឺជាសារឲ្យមេដឹកនាំពិចារណាស៊ីជម្រៅអំពីបញ្ហាធ្ងន់ធ្ងររបស់ប្រជាជន។
លោក កែម ឡី ថ្លែងទៀតថា៖ «ឥឡូវនេះ អ្នកនយោបាយចាប់ដៃគ្នា ញញឹមដាក់គ្នា គួរបន្តកិច្ចប្រជុំ។ កុំឲ្យមានបាតុកម្ម។ អ្នកអនុញ្ញាតឲ្យមានបាតុកម្មគឺគណបក្សប្រជាជន ដែលមិនយល់ព្រមពិភាក្សា។ គាត់ប្រញាប់បញ្ចប់ គ.ជ.ប បញ្ចប់កិច្ចការក្រុមប្រឹក្សាធម្មនុញ្ញ ដើម្បីឈានទៅអង្គប្រជុំលើកដំបូង»។
លោក យ៉ាន ជឹម អាយុ ៦៤ ឆ្នាំ មកពីខេត្ត កំពង់ចាម បានថ្លែងថា លោកនឹងមកសួនសេរីភាពម្តងទៀត ដើម្បីចូលរួមបាតុកម្ម បើលោក សម រង្ស៊ី និងលោក កឹម សុខា អំពាវនាវ។
លោកនិយាយថា៖ «បាតុកម្មសំខាន់ណាស់ ព្រោះដើម្បីរកយុតិ្តធម៌ឲ្យកូនចៅ»។
លោក ហាន ឡា អាយុ ៦៥ ឆ្នាំនិងប្រពន្ធ យីន ហ៊ីន អាយុ ៥៥ ឆ្នាំមកពីខេត្ត កែបថ្លែងថា៖ «យើងមានការឈឺចាប់។ យើងដឹងថា គណបក្សសង្គ្រោះជាតិឈ្នះ។ តែ គ.ជ.ប មិនឲ្យឈ្នះខ្ញុំមានការឈឺចាប់ខ្លាំងណាស់ ដែលបាត់បង់សន្លឹកឆ្នោត។ ខ្ញុំនឹងទាមទារវាមកវិញ»៕
No comments:
Post a Comment
yes