ថ្ងៃបាំងឆត្រនៅទីលានប្រជាធិបតេយ្យកាលពីថ្ងៃអាទិត្យ
និយាយលាក់បាំងអី ក្នុងមួយជីវិតនេះខ្ញុំក៏ធ្លាប់ឃើញម្តងម្កាលអ៊ីចឹងដែរ រឿងថ្ងៃបាំងឆត្រ នៅកណ្តាលមេឃស្រឡះចែសមើលទៅឃើញសម្បើមគួរឲ្យស្ញប់ស្ញែងព្រឺ សម្បុរ។ ប៉ុន្តែខ្ញុំមិនដែលនឹកគិតស្មានថាជាអព្ភូតហេតុដ៏កម្រដែលមានប្រផ្នូលអ្វីមួយនោះទេ។ ខ្ញុំយល់ថា វាគ្រាន់តែជាដំណើរធម្មជាតិ ដែលតែងកើតឡើងយូរៗម្តងប៉ុណ្ណោះ។ ប៉ុន្តែរឿងខ្មែរនាពេលនេះមានភាពចម្លែកត្រង់ថា ថ្ងៃបាំងឆត្រចំពេលវេលាដែលស្រុកខ្មែរកំពុងមានមហាបាតុកម្មដ៏ គគ្រឹកគគ្រេងយ៉ាងកម្រមួយដែលខ្មែរមិនដែលមានទាល់តែសោះតាំងពីដើមរៀងមក។
(ថ្ងៃអាទិត្យ)ទី ១៥ ខែ កញ្ញា ២០១៣ គណបក្សសង្គ្រោះជាតិ ដែលមានរូបសញ្ញាព្រះអាទិត្យរះឡើងចិញ្ចាចចិញ្ចែង កំពុងតែចាប់ផ្តើមប្រារព្ធពិធីធ្វើការតវ៉ាប្រឆាំងនឹងលទ្ធផលនៃ សំឡេងឆ្នោត ដែលពួកគេយល់ថា បានបាត់បង់ទៅដោយសារការលួចបន្លំ របស់ គ.ជ.ប។ គឺក្នុងខណៈនេះហើយដែលអព្ភូតហេតុដ៏កម្រនេះ បានកើតឡើងធ្វើឲ្យខ្មែររាល់គ្នានឹកឆ្ងល់ពីប្រផ្នូលផ្សេងៗ ជាពិសេសពីភ័ព្វព្រេងសំណាងរបស់ប្រទេសជាតិតាមសញ្ញានៃថ្ងៃបាំងឆត្រចំថ្ងៃប្រារព្ធធ្វើមហាបាតុកម្ម។
រកថាមិនបានដែររឿង ប្រផ្នូលដែលជាសញ្ញាមកពីឋានសួគ៌។ ជួនកាលព្រះមហាអាទិទេព ទ្រង់បានឮពាក្យអធិស្ឋានរបស់ខ្មែរខ្លះ និងរបស់ជនបរទេសខ្លះ ដែលអាណិតអាសូរជនជាតិខ្មែរក៏ទ្រង់សម្រេចព្រះរាជហឫទ័យ ផ្ញើសញ្ញានេះមកជូនខ្មែរដ៏អភ័ព្វ ឲ្យពួកគេបានយល់ថា សេចក្តីសប្បុរសនៃព្រះ កំពុងតែហើរចូលមកក្នុងព្រេងវាសនារបស់ពួកគេហើយ។ គឺទ្រង់កំពុងតែធ្វើឲ្យព្រលឹងវិញ្ញាណខ្មែរមូលចូលគ្នាយ៉ាងត្រជាក់ ត្រជុំ ឈប់បែកបាក់គ្នា ឈប់ឈ្លោះប្រកែកគ្នាតទៅទៀតហើយ។
ចម្លែក ដែររឿងខ្មែរបងប្អូនប្រុសពីរនាក់ដែលមិនសូវត្រូវរ៉ូវគ្នា ស្រាប់តែឥឡូវចាប់ដៃគ្នាជាលើកដំបូង ដោយភាពរាក់ទាក់ញញឹមរីករាយមើលទៅឃើញគួរឲ្យឆ្ងល់ ដែលរាស្ត្រខ្មែរខ្លះនាំគ្នាអេះក្បាលហើយគិតថារឿងហ្នឹងវាយ៉ាង ម៉េចអ៊ីចេះ? ត្រូវហើយក្រោយពេលប្រជុំលើកទីពីរ រវាងបក្សប្រជាជននិង បក្សសង្គ្រោះជាតិនៅមន្ទីររដ្ឋសភាដែលបានប្រព្រឹត្តទៅអស់ពេលជាង ៤ ម៉ោង ក្នុងថ្ងៃចន្ទ ទី១៦ កញ្ញា ឆ្នាំ ២០១៣ សម្តេចតេជោ ហ៊ុន សែន បានជួបដោយផ្ទាល់មុខជាមួយនឹងលោកប្រធាន សម រង្ស៊ី ហើយលោកទាំងពីរ បានចាប់ដៃគ្នា ជារូបភាពល្អដ៏កម្រមួយដែលយើងរាល់គ្នាចង់ឃើញជាយូរយារមកហើយ។ គឺជារូបភាពនៃពន្លឺត្រជាក់ត្រជុំ ចែងចាំងលើកម្ពុជរដ្ឋ និងជាតិសាសន៍ខ្មែរឲ្យមានសិរីសួស្តីជ័យមង្គលកើតឡើង។
ជាការប្រសើរណាស់ទៅទៀត បើសិនជាវរជនខ្មែរទាំងពីររូបនេះឱបក្រសោបគ្នាយ៉ាងស្និទ្ធស្នាលដូច ដែលសម្តេចលោកឱបមេយួន មេសៀម នាពេលកន្លងទៅ។
ក្នុងកិច្ចប្រជុំជាលើកទីពីរនោះ ពួកគេបានរកឃើញលទ្ធផលល្អ ៣ ចំណុចក្នុងជំហានដំបូង។ យើងជារាស្ត្រសាមញ្ញតែងតែសង្ឃឹម ក្នុងចិត្តថា ព្រលឹងវិញ្ញាណត្រជាក់ត្រជុំជានានឹងគ្នា រវាងខ្មែរនិងខ្មែរ នឹងបន្តមានរស្មីកាន់តែភ្លឺត្រចះត្រចង់ល្អឡើង ថែមទៀតដែលគតិយុត្តិធម៌និងព្រលឹងនៃសេចក្តីស្នេហាជាតិមាតុភូមិក៏កំពុងតែដុះឡើងផងដែរ ក្នុងដួងវិញ្ញាណនៃមេដឹកនាំរដ្ឋខ្មែរ។
មិនត្រឹមតែការលូតលាស់ដុះដាលចម្រុងចម្រើននៃប្រទេសជាតិប៉ុណ្ណោះទេ អ្វីដែលយើងចង់បានធំបំផុតនោះ គឺសេចក្តីសុខក្សេមក្សាន្តរមនាក្នុងជីវិតយើងជារាស្ត្ររាល់គ្នា ទូទៅគ្មានអំពើអយុត្តិធម៌ក្នុងសង្គមឯណាមកបៀតបៀនការរស់នៅ របស់យើងតទៅទៀតសោះឡើយ។ យើងចង់ថែរក្សាបូរណភាពទឹកដីយើង ឲ្យបានគង់វង្សល្អដើម្បីជីវិតរស់នៅរបស់កូនចៅយើង រាប់លានតំណតទៅទៀត។ យើងនៅសល់ដីតែប៉ុណ្ណឹងទេ ដូច្នេះយើងមិនហ៊ានឲ្យអ្នកណាចូលមកលួចប្លន់ទ្រព្យសម្បត្តិដ៏តិចតួចរបស់យើងនេះឡើយ។ អ្វីៗដែលយើងរបូតដៃជ្រុះបាត់អស់ទៅ យើងនៅអាឡោះអាល័យសោកស្តាយជាអនេក ហើយយើងចង់រកឲ្យឃើញមកវិញ។ យើងមិនអាចបំភ្លេចបានឡើយ។
ដរាបណាជីវិតយើងនៅរស់ យើងនៅតែនឹកមិនភ្លេច អ្វីៗដែលជាទ្រព្យរបស់យើង ហើយយើងក៏មិនជិនណាយក្នុងការបូកសងគិតគូរ រកមធ្យោបាយទាមទារទ្រព្យសម្បត្តិរបស់យើងមកវិញសោះឡើយ។ បើយើងមិនក្បត់សតិសម្បជញ្ញៈខ្លួនឯង ហើយយើងខិតខំត្រិះរិះ (ដោយឆន្ទៈមោះមុត) ក្នុងការព្យាយាមស្រាវជ្រាវរករូបមន្តល្អៗយកមកប្រើ ដើម្បី តវ៉ាយ៉ាងសកម្ម ទាញយកអ្វីៗដែលជារបស់យើងមកវិញគឺយើងពិតជាអាចធ្វើបាន...ព្រោះ សកម្មភាពនានា ដែលយើងប្រឹងប្រែងធ្វើដោយព្យាយាមដោយអត់ធ្មត់និងដោយហ្មត់ចត់ គឺយើងអាចទាញយកលទ្ធផលល្អបាន។ តែបើយើងខ្សោយហើយគ្មានឆន្ទៈមោះមុត ក្នុងកិច្ចការនេះទេគឺយើងបាត់អស់ហើយគ្មានអ្វីនឹងបានមកវិញទេ។ ជនជាតិគេក៏ប្រមាថមើលងាយយើងតាមហ្នឹងដែរ។
ពេលនេះខ្មែរ កំពុងជានាគ្នាហើយ បងប្អូនកូនក្មួយទាំងអស់គ្នាអើយ។ សូមឲ្យភាពជានាគ្នានេះបានសះស្បើយល្អដូចកាលបុព្វបុរសខ្មែររស់នៅក្នុងសម័យដើម នៃយុគ មហានគរដ៏ប្រសើរបវររបស់យើង។ យើងចង់ស្រែកឲ្យឮកងរំពងថា ជយោ!ជនជាតិខ្មែរ! ជយោ! ទឹកចិត្តជានាគ្នារវាងខ្មែរនិងខ្មែរ! សូមជូនពរបវរ សិរីសួស្តីជ័យមង្គលល្អ ចូរមានដល់អ្នករាល់គ្នាដែលជាខ្មែរទាំងក្នុងនិងក្រៅប្រទេស។ ប្រទេសសាន្តត្រាណ យើងបានជួបជុំគ្នាក្នុងបរិយាកាសរុងរឿងល្អូកល្អិន គ្មានអំពើស្អុយគគ្រុកពុករលួយឯណានឹងឮមកដល់ត្រចៀកយើងទៀតឡើយ។ ខ្មែរចាប់ផ្តើមជានាគ្នាហើយ... ជយោ!!!៕
No comments:
Post a Comment
yes