ប្រធានគណបក្សសង្គ្រោះជាតិ លោក សម រង្ស៊ី (កណ្ដាល) ថ្លែងក្នុង
សន្និសីទកាសែតនាទីស្នាក់ការគណបក្ស រាជធានីភ្នំពេញ នៅព្រឹកថ្ងៃទី២ កញ្ញា ឆ្នាំ២០១៣
ប្រធានគណបក្សសង្គ្រោះជាតិ លោក សម រង្ស៊ី ប្រកាសថា គណបក្សសង្គ្រោះជាតិនឹងប្ដូររបៀបធ្វើបាតុកម្មតវ៉ាដោយប្រើវិធីអង្គុយស្មិងស្មាធិ៍ដើម្បីស្វែងរកសន្តិភាពនៅទូទាំងប្រទេស ចំនួន ៣ម៉ោង នៅថ្ងៃទី៧ កញ្ញា ឆ្នាំ២០១៣ គឺចាប់ពីម៉ោង ៨ ដល់ម៉ោង ១១ព្រឹក។
ការប្រកាសផ្លាស់ប្ដូរគម្រោងនេះ ធ្វើឡើងនៅក្នុងសន្និសីទកាសែតនៅព្រឹកថ្ងៃទី២ កញ្ញា នាទីស្នាក់ការគណបក្ស សម រង្ស៊ី រាជធានីភ្នំពេញ។ លោក សម រង្ស៊ី មានប្រសាសន៍ថា ប្រជាពលរដ្ឋទាំងអស់អាចចូលរួមធ្វើសមាធិនេះនៅរាជធានីភ្នំពេញ និងនៅតាមតំបន់នានាដែលពួកគាត់រស់នៅ។
លោក សម រង្ស៊ី បានប្រកាសផ្លាស់ប្ដូរពីការធ្វើបាតុកម្មមកជាការតាំងសមាធិវិញនេះ គឺដើម្បីគោរពតាមព្រះរាជសាររបស់ព្រះមហាក្សត្រ។
នៅក្នុងព្រះរាជសារចុះថ្ងៃទី៣០ ខែសីហា ឆ្នាំ២០១៣ ព្រះមហាក្សត្របានអំពាវនាវឲ្យប្រជាពលរដ្ឋទាំងអស់បន្តរក្សាភាពស្ងប់ស្ងៀម និងភាពថ្លៃថ្នូរនៃជាតិ ដោយសារមេរៀនជាប្រវត្តិសាស្ត្របានបង្ហាញថា ប្រជាជាតិកម្ពុជា លាប់មានការបែកបាក់គ្នា មានការឈឺចាប់ជាច្រើនឥតគណនា។
គណបក្សសង្គ្រោះជាតិ ក៏បានប្រកាសថា នឹងដាក់ពាក្យប្ដឹងប្រធានគណៈកម្មាធិការជាតិរៀបចំការបោះឆ្នោត (គ.ជ.ប) លោក អ៊ឹម សួស្ដី និងអ្នកសមគំនិត ពីបទឧក្រិដ្ឋ ជុំវិញភាពមិនប្រក្រតីនៃការបោះឆ្នោតឆ្នាំ២០១៣។
No comments:
Post a Comment
yes