មជ្ឈមណ្ឌលសិទ្ធិមនុស្សកម្ពុជា(CCHR) នៅថ្ងៃអង្គារទាមទារឲ្យតុលាការកំពូលទម្លាក់ការចោទ ប្រកាន់លើសកម្មជនការពារដីធ្លីនៅតំបន់បឹងកក់ អ្នកស្រី យ៉ោម បុប្ផា ដោយចាត់ទុកថាការផ្តន្ទាទោសលើរូបអ្នកស្រីមានភាពអយុត្តិធម៌។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ នៅក្នុងសេចក្តីថ្លែងការណ៍របស់មជ្ឈមណ្ឌលថា ការបន្តដាក់ពន្ធនាគារ អ្នកស្រី យ៉ោម បុប្ផា ដោយកង្វះភស្តុតាងពិតប្រាកដ ពិតជាបង្ហាញថា អ្នកស្រីពុំទទួលបានសិទ្ធិសន្មត់ថា គ្មានទោស មុនពេលរកឃើញថាមានទោស។ លោក អ៊ូ វីរៈ យល់ថា ការចោទប្រកាន់លើសកម្មជនដីធ្លីរូបនេះ ជាករណីនយោបាយ ដែលសាលក្រមត្រូវបានសម្រេចទុកជាមុន។
សេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា ធ្វើទ្បើងស្របពេលដែលពលរដ្ឋប្រមាណ៥០០នាក់ មកពីសហគមន៍មានជម្លាះដីធ្លីជាង១០ នៅរាជធានីភ្នំពេញ ក្នុងនោះសហគមន៍បឹងកក់ គ្រោងដង្ហែក្បួនទៅបាតុកម្មមុខតុលាការកំពូល នៅព្រឹកថ្ងៃពុធស្អែក ដើម្បីជំរុញឲ្យតុលាការជំនុំជម្រះ អ្នកស្រី យ៉ោម បុប្ផា ឲ្យបានឆាប់ និងឈរលើគោលការណ៍ឯករាជ្យ។
ការទាមទាររបស់មជ្ឈមណ្ឌលសិទ្ធិមនុស្សកម្ពុជា ក៏ធ្វើទ្បើងចំពេលដែលនៅថ្ងៃពុធស្អែកនេះ គឺជាថ្ងៃគម្រប់មួយឆ្នាំដែលអ្នកស្រីជាប់ពន្ធនាគារ។
គួររំលឹកថា កាលពីថ្ងៃទី១៤ ខែមិថុនា ឆ្នាំ២០១៣ សាលាឧទ្ធរណ៍ បានសម្រេចតម្កល់សាលក្រមរបស់សាលាដំបូងរាជធានីភ្នំពេញ ដោយផ្តន្ទាទោស អ្នកស្រី យ៉ោម បុប្ផា ដាក់ពន្ធនាគារបីឆ្នាំ ប៉ុន្តែព្យួរទោស១ឆ្នាំ និងបង្គាប់ឲ្យសងជំងឺចិត្ត ២០លានរៀល ទៅជនរងគ្រោះជាអ្នករត់ម៉ូតូឌុបពីរអ្នក។ សាលាឧទ្ធរណ៍បានប្តូរបទចោទ អ្នកស្រី យ៉ោម បុប្ផា ពីបទបង្ករបួសស្នាមទៅបទផ្តើមគំនិតហិង្សាដោយចេតនាទៅលើអ្នករត់ម៉ូតូឌុបពីរនាក់ តាមមាត្រា២៨នៃក្រមព្រហ្មទណ្ឌថ្មី។ មេធាវីអ្នកស្រី បានប្តឹងសារទុក្ខទៅតុលាការកំពូល៕
ប្រភពពី VOD
No comments:
Post a Comment
yes