លោក គង់ ប៊ុនថា ដែលត្រូវបានគេធ្វើទារុណកម្មបន្ទាប់ពីបណ្តេញចេញពីការងារ
បុរសអាយុ ៣០ ឆ្នាំម្នាក់ជាបុគ្គលិកបម្រើការនៅក្លិបខារ៉ាអូខេ រមណីយដ្ឋានភ្នំបូកគោ ស្ថិតក្នុងខេត្ត កំពត ត្រូវបានមេការម្នាក់បញ្ជាឲ្យសន្តិសុខធ្វើទារុណកម្មដាក់ខ្នោះ មួយយប់កាលពីថ្ងៃទី ២៧ខែ សីហា ដោយសារខ្លួនបានលុបកម្មវិធីកុំព្យូទ័របញ្ជាភ្លើងពណ៌ និងបទចម្រៀងក្រោយពីបណ្តេញចេញពីការងារ។
លោក គង់ ប៊ុនថា អាយុ ៣០ ឆ្នាំ ដែលកំពុងសម្រាកព្យាបាលរបួសនៅភ្នំពេញ បាននិយាយថាខ្លួនដាក់ពាក្យបណ្តឹងទៅតុលាការខេត្ត កំពត និងអង្គការសិទ្ធមនុស្ស អាដហុក ឲ្យជួយអន្តរាគមន៍កាលពីម្សិលមិញ បន្ទាប់ពីលោកបានមកសម្រាកព្យាបាលមុខរបួសនៅមន្ទីរពេទ្យភ្នំពេញ ដែលជាស្រុកកំណើតរបស់ខ្លួន។ លោកបានឲ្យដឹងទៀតថា៖ «ខ្ញុំទៅធ្វើការជា DJ ក្នុងក្លិបខារ៉ាអូខេក្នុងឧទ្យានជាតិ បូកគោ ខេត្ត កំពត ត្រូវបានគេធ្វើទារុណកម្មធ្វើបាបដោយសាររឿងលុបកម្មវិធីកុំព្យូទ័របញ្ជាភ្លើងពណ៌និងបទចម្រៀងកាលពីថ្ងៃ២៧ ខែ សីហា ដែលធ្វើឲ្យប៉ះពាល់ដល់ដំណើរការក្លិប»។
លោកបានរៀបរាប់ថា លោកបានធ្វើការជា DJ នៅក្លិបខារ៉ាអូខេ បូកគោ ចាប់ពីខែ កុម្ភៈ ឆ្នាំ២០១៣ ក្រោយមកនៅថ្ងៃទី ២៧ ខែ សីហា មេការបានបណ្តេញរូបលោកចេញពីការងារ។ នៅថ្ងៃនោះលោកបានប្រមូលឯកសាររបស់ខ្លួន ហើយក៏ជ្រុលដៃលុបកម្មវិធីក្នុងកុំព្យូទ័រដែលខ្លួនបង្កើតអំឡុង ពេលធ្វើការងារសម្រាប់បញ្ជាភ្លើងពណ៌និងបទចម្រៀង។ លោកឲ្យដឹងថា៖ «នៅពេលនោះមេការខឹងក៏បញ្ជសន្តិសុខបីបួននាក់ ដេញចាប់ខ្ញុំវាយធ្វើបាបខ្ញុំ ហើយយកខ្ញុំទៅឃុំក្នុងបន្ទប់ដោយដាក់ខ្នោះគ្មានអាហារទឹកនោះទេ ក្រោយពីវាយតប់ខ្ញុំរួច។ បន្ទាប់មកខ្ញុំត្រូវបានមិត្តភក្តិស្រីជួយដាក់ពាក្យបណ្តឹង ទៅប៉ូលិសនិងអង្គការទើបបានមេការនោះដោះលែងខ្ញុំ»។
លោកស្រី វ៉ៃ សុផា អាយុ ៥៥ ឆ្នាំ ត្រូវជាម្តាយនិយាយថា បើទោះបីកូនអ្នកស្រីធ្វើខុស មេការមិនគួរបញ្ជាសន្តិសុខវាយតប់នោះដែរត្រូវប្តឹងតាមផ្លូវច្បាប់ ហើយក្រុមហ៊ុនបែរជាមកប្តឹងកូនអ្នកស្រីទាមទារ ៣៨០០ ដុល្លាររឿងបំផ្លាញកម្មវិធីក្រុមហ៊ុន។
លោកស្រីថា៖ «ខ្ញុំអាណិតកូនខ្ញុំណាស់។ ទោះកូនខ្ញុំខុសក៏មិនត្រូវធ្វើបាបគ្នាដូចសត្វវាយគ្នាដាក់ឃុំអ៊ីចឹងដែរ»។
លោក ប្រាក់ សារ៉ាន់ មន្រ្តីសម្របសម្រួលសមាគម អាដហុក ប្រចាំខេត្ត កំពត បានថ្លែងឲ្យដឹងថា អាដហុក កំពុងធ្វើការស៊ើបអង្កេតករណីនេះដែលជាករណី រំលោភសិទ្ធិមនុស្សធ្ងន់ធ្ងរ។ លោកថា៖ «យើងជួយរៀបចំពាក្យបណ្តឹងដើម្បីរកយុត្តិធម៌ព្រោះនេះជា ករណីរំលោភសិទ្ធមនុស្ស បើទោះជាធ្វើខុសយ៉ាងណាក៏មេការមិនត្រូវឃុំខ្លួនធ្វើទារុណកម្ម នោះទេ»។
លោក ជាវ សាមិត្ត ស្នងការរងខេត្ត កំពត បានថ្លែងថាប៉ូលិសនឹងធ្វើការអន្តរាគមន៍នៅពេលឃើញពាក្យបណ្តឹងជនរងគ្រោះ។
មិនអាចសុំការទាក់ទងដើម្បីបំភ្លឺពីភាគីក្លិប KTV នៅភ្នំ បូកគោ បាននោះទេ តែស្រ្តីម្នាក់លើកទូរស័ព្ទមិនប្រាប់ឈ្មោះអះអាងថា ក្លិប KTV មិនបានឃុំខ្លួនបុរសឈ្មោះ គង់ ប៊ុនថា នោះទេ តែក្លិប ខារ៉ាអូខេ ពិតជាបានបណ្តេញបុរសរូបនេះពីការងារមែន៕
No comments:
Post a Comment
yes