លោក សម រង្ស៊ី ប្រធានគណបក្សសង្គ្រោះជាតិ ត្រឡប់មកដល់កម្ពុជា
ស្ថិតលើផ្លូវនាខាងមុខអាកាសយានដ្ឋានអន្តរជាតិភ្នំពេញ
នៅថ្ងៃទី១៦ ខែសីហា ឆ្នាំ២០១៣
មេដឹកនាំគណបក្សសង្គ្រោះជាតិ លោក សម រង្ស៊ី កំពុងស្វែងរកការគាំទ្រពីសហគមន៍អន្តរជាតិ ដើម្បីអន្តរាគមន៍ក្នុងរឿងជម្លោះនយោបាយនៅកម្ពុជា។
បក្សប្រឆាំងបានហៅរដ្ឋាភិបាលរបស់លោក ហ៊ុន សែន ដែលទើបបង្កើតថា ជារដ្ឋាភិបាលខុសច្បាប់ តាមរយៈរដ្ឋប្រហារច្បាប់រដ្ឋធម្មនុញ្ញ ហើយទទូចឲ្យអង្គការសហប្រជាជាតិ និងស្ថាប័នហិរញ្ញវត្ថុធំៗ កុំទទួលស្គាល់។
អ្នកវិភាគអំពីស្ថានការណ៍នយោបាយនៅកម្ពុជា បានអះអាងថា ការស្វែងរកកិច្ចអន្តរាគមន៍អន្តរជាតិរបស់ក្រុមមេដឹកនាំបក្សប្រឆាំង គឺជាសកម្មភាពស្របច្បាប់ និងជាទង្វើធម្មតារបស់ប្រទេសនីមួយៗក្នុងពិភពលោក រាប់ទាំងប្រទេសកម្ពុជាផង។
អ្នកស្រាវជ្រាវអំពីការអភិវឌ្ឍសង្គម លោក កែម ឡី បញ្ជាក់ថា ទាំងគណបក្សប្រជាជនកម្ពុជា និងគណបក្សប្រឆាំង បានព្យាយាមប្រើគ្រប់មធ្យោបាយដើម្បីយកឈ្នះរៀងៗខ្លួន និងចង់បានឲ្យមានការទទួលស្គាល់ថា ទង្វើរបស់ខ្លួនមានភាពស្របច្បាប់៖ «ខ្ញុំគិតថា នេះជាតួនាទីរបស់គណបក្សប្រឆាំងហើយ ប្រទេសណាក៏ដូចជាប្រទេសណាអ៊ីចឹង។ ក្រៅពីការធ្វើបាតុកម្ម គឺគេស្វែងរកការគាំទ្រពីប្រជាពលរដ្ឋ និងសហគមន៍អន្តរជាតិ។ កាយវិការនិងសេចក្ដីថ្លែងការណ៍ពុំមែនខុសច្បាប់ទេ គឺដើម្បីស្វែងរកការកែទម្រង់ស៊ីជម្រៅ ដើម្បីជំរុញឲ្យមានការចរចាផ្នែកនយោបាយប្រកបដោយតម្លាភាព។ គណបក្សប្រជាជន ប្រើកងកម្លាំងប្រដាប់អាវុធ និងយុទ្ធសាស្ត្រធំៗ ដើម្បីដាក់សម្ពាធលើគណបក្សប្រឆាំង ហើយគណបក្សប្រឆាំងក៏ប្រើអំណាចពលរដ្ឋនិងអំណាចសហគមន៍អន្តរជាតិដើម្បីដាក់សម្ពាធ...»។
ការអះអាងរបស់អ្នកវិភាគសង្គមនេះ ធ្វើឡើងក្រោយពីប្រតិកម្មរបស់មន្ត្រីជាន់ខ្ពស់របស់រដ្ឋាភិបាលបច្ចុប្បន្នថា ទង្វើរបស់ប្រធានបក្សប្រឆាំង គឺជាទង្វើខុសច្បាប់ និងជាការបំផ្លាញផលប្រយោជន៍ប្រទេសជាតិ។
ទាក់ទងនឹងសំណួរថាតើការស្វែងរកការគាំទ្រពីសហគមន៍អន្តរជាតិ របស់គណបក្សសង្គ្រោះជាតិ អាចនឹងទទួលបានជោគជ័យ ឬយ៉ាងណា?
លោក កែម ឡី ក៏បានបញ្ជាក់ផងដែរ បញ្ហាវិបត្តិនយោបាយនៅប្រទេសកម្ពុជា បច្ចុប្បន្ននេះ អ្នកដែលនឹងបានទទួលផលប្រយោជន៍នោះ គឺប្រជាពលរដ្ឋខ្មែរ។ លោកបន្តថា សហគមន៍អន្តរជាតិនឹងអាចដាក់សម្ពាធដល់រដ្ឋាភិបាលកម្ពុជា ឲ្យធ្វើកំណែទម្រង់ច្បាស់លាស់មុនសម្រេចផ្ដល់ជំនួយនានាដល់កម្ពុជា។
លោក កែម ឡី៖ «ខ្ញុំគិតថា វាមិនបានជោគជ័យដល់គណបក្សនយោបាយទេ ប៉ុន្តែប្រជាពលរដ្ឋនឹងទទួលបានជោគជ័យ។ កាលណាមានកិច្ចពិភាក្សាអ៊ីចឹង សហគមន៍អន្តរជាតិ មុននឹងផ្ដល់ជំនួយ ឬមុនដាក់ទណ្ឌកម្មសេដ្ឋកិច្ច ពិតជាមានដាក់លក្ខខណ្ឌ រដ្ឋាភិបាលនឹងមានកំណែទម្រង់ជាក់ស្ដែង ស៊ីជម្រៅ។ យើងឃើញថា មិនបានផលប្រយោជន៍ច្រើនដល់គណបក្សសង្គ្រោះជាតិមែន ប៉ុន្តែអាចទទួលបានផលប្រយោជន៍ច្រើនដល់ប្រជាពលរដ្ឋ។ កាលណាមានជំនួបពិភាក្សាអំពីរឿងភាពមិនប្រក្រតីនៃការបោះឆ្នោត ការកែទម្រង់អ៊ីចឹង ធ្វើឲ្យអ្នកនយោបាយ អ្នកមានអំណាច ពលរដ្ឋបានដឹងទាំងអស់គ្នា បង្កើតឲ្យមានតម្លាភាព គណនីយភាព និងអភិបាលកិច្ចល្អទៅវិញ...»។
ក្រោយពីធ្វើសមាជមហាជនកាលពីថ្ងៃអាទិត្យ ទី៦ ខែតុលា មេដឹកនាំគណបក្សសង្គ្រោះជាតិ លោក សម រង្ស៊ី កំពុងធ្វើដំណើរទៅកាន់ប្រទេសអឺរ៉ុប និងសហរដ្ឋអាមេរិក ដើម្បីស្វែងរកកិច្ចអន្តរាគមន៍ពីរដ្ឋាភិបាលទាំងនោះ ឲ្យដោះស្រាយវិបត្តិនយោបាយនៅកម្ពុជា និងកុំឲ្យទទួលស្គាល់រដ្ឋាភិបាលខុសច្បាប់ ជាពិសេសគឺជំរុញឲ្យអង្គការសហប្រជាជាតិ សហរដ្ឋអាមេរិក និងសហគមន៍អឺរ៉ុប ដាក់គំនាបដល់រដ្ឋាភិបាលកម្ពុជា ឲ្យបង្កើតគណៈកម្មការស៊ើបអង្កេតឯករាជ្យមួយ ដើម្បីពិនិត្យឡើងវិញអំពីភាពមិនប្រក្រតីនៃការបោះឆ្នោតកន្លងមកនេះ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានមានប្រសាសន៍ថា វិបត្តិនយោបាយនៅកម្ពុជាបច្ចុប្បន្ន គឺជាភារកិច្ចទទួលខុសត្រូវរបស់ប្រទេសកម្ពុជាផ្ទាល់ និងសហគមន៍អន្តរជាតិ ជាពិសេសគឺបណ្ដាប្រទេសដែលជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស។
លោក យឹម សុវណ្ណ បន្តថា គោលបំណងសំខាន់របស់គណបក្សប្រឆាំង គឺដើម្បីផលប្រយោជន៍ជាតិ និងប្រជាពលរដ្ឋតែប៉ុណ្ណោះ៖ «ឥឡូវនេះ ប្រទេសកម្ពុជាយើងកំពុងមានវិបត្តិនយោបាយ ទាំងរដ្ឋាភិបាលនិងរដ្ឋសភា ដែលបានរៀបចំឡើងដោយគណបក្សប្រជាជនកម្ពុជាម្នាក់ឯង គឺជាការរំលោភរដ្ឋធម្មនុញ្ញ ដូច្នេះគណបក្សសង្គ្រោះជាតិ មិនចូលរួមក្នុងការប្រជុំសភាណាមួយទេ ហើយមិនទទួលស្គាល់រដ្ឋាភិបាលទេ។ យើងជំរុញឲ្យរកយុត្តិធម៌សម្រាប់ម្ចាស់ឆ្នោត យើងជំរុញឲ្យមានវិធានការកែទម្រង់ស្ថាប័នជាតិសំខាន់ៗ ជាក់លាក់។ យើងចង់ឲ្យមានការដោះស្រាយបញ្ហាធ្វើឲ្យពលរដ្ឋជៀសផុតពីអំពើអយុត្តិធម៌ ការរំលោភសិទ្ធិមនុស្ស ដីធ្លី ហើយការពារផលប្រយោជន៍ជាតិ និងធនធានធម្មជាតិជាដើម...»។
កាលពីថ្ងៃអង្គារ ទី៨ ខែតុលា លោក សម រង្ស៊ី បានផ្ញើលិខិតចំនួនពីរច្បាប់ផ្សេងគ្នាទៅប្រធានធនាគារអភិវឌ្ឍន៍អាស៊ី (ADB) លោក តាកេហ៊ីកូ ណាកាអូ (Takehiko Nakao) និងតំណាងជាន់ខ្ពស់សហគមន៍អឺរ៉ុបផ្នែកកិច្ចការបរទេសនិងសន្តិសុខ អ្នកស្រី ខាត់ថឺរីន អាស្សតុន (Catherine Ashton) ឲ្យដឹងព័ត៌មានពីការលួចបន្លំលទ្ធផលបោះឆ្នោត ហើយរដ្ឋាភិបាលកម្ពុជា បដិសេធពុំព្រមស៊ើបអង្កេតភាពមិនប្រក្រតីនៃការបោះឆ្នោត។
លិខិតទៅធនាគារអភិវឌ្ឍន៍អាស៊ី លោក សម រង្ស៊ី ពន្យល់ថា រដ្ឋាភិបាលដឹកនាំដោយគណបក្សប្រជាជនកម្ពុជា ជារដ្ឋាភិបាលខុសច្បាប់។ លោកក៏បានស្នើឲ្យធនាគារ ADB ពិចារណាផ្នែកច្បាប់ចំពោះលទ្ធផលនៃប្រតិបត្តិការណាមួយនៅកម្ពុជា ដោយសារតែរដ្ឋាភិបាលបច្ចុប្បន្នជារដ្ឋាភិបាលខុសច្បាប់។
ចំណែកខ្លឹមសារលិខិតផ្ញើទៅតំណាងជាន់ខ្ពស់សហគមន៍អឺរ៉ុបវិញ លោក សម រង្ស៊ី ក៏បានបញ្ជាក់ថា ក្រោយកិច្ចព្រមព្រៀងទីក្រុងប៉ារីស រយៈពេលជាង ២០ឆ្នាំ និងការចំណាយថវិការបស់សហគមន៍អន្តរជាតិប្រមាណ ២០ពាន់លានដុល្លារមកនេះ កម្ពុជាបានដើរថយក្រោយត្រឡប់ទៅភាពដើមវិញ ដោយប្រែក្លាយរដ្ឋាភិបាលទៅជារដ្ឋាភិបាលឯកបក្ស។
លិខិតដដែលបញ្ជាក់ថា ទោះបីជាមានអនុសាសន៍ជាច្រើនពីសហភាពអឺរ៉ុប ពីអ្នករាយការណ៍ពិសេសនៃ អ.ស.ប. និងពីស្ថាប័នពិនិត្យការបោះឆ្នោតឯករាជ្យជាច្រើន រួមមានវិទ្យាស្ថានជាតិដើម្បីលទ្ធិប្រជាធិបតេយ្យ (NDI) ផង ក៏លោក ហ៊ុន សែន បានបដិសេធទាំងស្រុង។ ហើយលទ្ធផលដែលមិនធ្វើតាមអនុសាសន៍ទាំងនោះ គឺបាននាំឲ្យមានការរីករាលដាលយ៉ាងខ្លាំងនៃភាពមិនប្រក្រតីនៃការបោះឆ្នោតជាតិ កាលពីថ្ងៃទី២៨ ខែកក្កដា។ មិនតែប៉ុណ្ណោះ គឺមិនបានដោះស្រាយនូវរាល់បញ្ហាទាំងនោះឡើយ ដែលផ្ទុយនឹងឆន្ទៈរបស់ប្រជាពលរដ្ឋខ្មែរ។
ពាក់ព័ន្ធនឹងការស្វែងរកកិច្ចអន្តរាគមន៍ពីសហគមន៍អន្តរជាតិរបស់គណបក្សប្រឆាំងនេះ សមាជិករដ្ឋសភា និងជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម លោក ជាម យៀប បានប្រតិកម្មថា តាំងពីលោក សម រង្ស៊ី វិលចូលប្រទេសកម្ពុជាវិញ លោកបានបង្កបញ្ហាគ្រប់បែបយ៉ាងដល់សង្គម។
លោក ជាម យៀប បញ្ជាក់ថា ប្រការដែលគណបក្សប្រឆាំងទទូចឲ្យផ្អាកជំនួយមកកម្ពុជានេះ គឺជាអំពើក្បត់ជាតិ ក្បត់ប្រជាពលរដ្ឋខ្លួនឯង៖ «ប្រការដែលធ្វើរបៀបនេះ គឺជាអំពើក្បត់ជាតិ ក្បត់ប្រជាជន។ សូមជម្រាបថា ទង្វើ សម រង្ស៊ី សរសេរលិខិតសុំឲ្យគេផ្អាកជំនួយ ខ្ញុំថា នេះគឺជាទង្វើមួយដែល សម រង្ស៊ី យកដៃទៅខ្ទប់ដង្ហើមប្រជាពលរដ្ឋកម្ពុជា និងមាតុភូមិទាំងស្រុង។ មិនមែនថា យើងអត់ជំនួយយើងស្លាប់ទេ យើងធ្លាប់លំបាកវេទនាច្រើនលើកច្រើនសាហើយ។ សូមជម្រាបថា តាំងពី សម រង្ស៊ី បានចូលស្រុកវិញ ក្រោយពីមានការអនុគ្រោះរបស់សម្ដេច ហ៊ុន សែន និងព្រះមហាក្សត្រលើកលែងទោសមកឃើញថា សម រង្ស៊ី បានបង្កអសន្តិសុខ ជ្រួលច្របល់ក្នុងប្រទេសរៀងរហូតមក ហើយទង្វើនេះមិនអាចទទួលយកបានទេ។ ខ្ញុំមិនជឿថា អ.ស.ប. ឬ IMF ឬ World Bank ដែលជាអ្នកធ្លាប់ជួយកម្ពុជា ធ្វើតាម សម រង្ស៊ី ទេ...»។
ប៉ុន្តែលោក សម រង្សី តែងបដិសេធថា លោកមិនដែលបានទទូចឲ្យសហគមន៍អន្តរជាតិកាត់ជំនួយបរទេសទៅឲ្យកម្ពុជា ដូចការចោទប្រកាន់នោះទេ។ អ្វីដែលលោកចង់បាន គឺប្រទេសម្ចាស់ជំនួយត្រូវភ្ជាប់លក្ខខណ្ឌឲ្យរដ្ឋាភិបាលកម្ពុជា គោរពសិទ្ធិមនុស្ស និងប្រជាធិបតេយ្យដែលមាននៅក្នុងច្បាប់កម្ពុជាខ្លួនឯង។
ទោះជាយ៉ាងណា លោក ជាម យៀប ក៏បានបញ្ជាក់ថា រដ្ឋសភានិងរដ្ឋាភិបាលអាណត្តិទី៥ របស់លោកនាយករដ្ឋមន្ត្រី ហ៊ុន សែន គឺបង្កើតឡើងដោយស្របច្បាប់ទៅតាមរដ្ឋធម្មនុញ្ញ ជាពិសេសគឺមានការទទួលស្គាល់ពីព្រះមហាក្សត្រ ព្រះបរមនាថ នរោត្តម សីហមុនី ដោយព្រះអង្គបានយាងបើកសម័យប្រជុំសភាជាលើកដំបូងកាលពីខែកញ្ញា កន្លងមកនេះ៕
No comments:
Post a Comment
yes