មន្ត្រីអាជ្ញាធរឃុំគណបក្សប្រជាជនកម្ពុជាចំនួនពីរនៅស្រុកបរកែវ ខេត្តរតនៈគិរី ឃាត់មន្ត្រី គណបក្សសង្គ្រោះជាតិហើយឲ្យចុះកិច្ចសន្យា ឈប់ប្រមូលស្នាមមេដៃនិងដកញត្តិទុក ខណៈដែលកំពុង ដើរប្រមូលស្នាមមេដៃ ប្រជាពលរដ្ឋដាក់ជូនអង្គការសហប្រជាជាតិ។
គិតត្រឹមថ្ងៃទី១៩ ខែតុលានេះ គណបក្សសង្គ្រោះជាតិ ប្រមូលស្នាមមេដៃពីប្រជាពលរដ្ឋ បានជិត២លាននាក់ ដើម្បីដាក់ទៅអង្គការសហប្រជាជាតិ និងប្រទេសជាហត្ថលេខីនៃកិច្ចព្រមព្រៀង ទីក្រុងប៉ារីស ឲ្យជួយដោះស្រាយវិបត្តិនយោបាយនៅកម្ពុជា។
មន្ត្រីស៊ើបអង្កេតសមាគមអាដហុកប្រចាំខេត្តរតនៈគិរី លោក មាន ព្រហ្មមុនី ប្រាប់VOD នៅព្រឹកថ្ងៃសៅរ៍ ទី១៩ ខែតុលានេះថា មេឃុំ និងនគរបាល នៅឃុំកិចុង និង ឃុំកក់ ស្រុកបរកែវ បានឃាត់មន្ត្រីគណបក្សសង្គ្រោះជាតិ ដកញត្តិទុក និងបង្ខំឲ្យចុះកិច្ចសន្យា ព្រោះតែមន្ត្រីទាំងនោះប្រមូលស្នាមមេដៃប្រជាពលរដ្ឋ នៅទីសាធារណៈដោយមិនបានជូនដំណឹងជាមុន។
VOD មិនអាចទាក់ទងមេឃុំកិចុង លោក ចំឡៃ និងនគរបាល ដែលរងការចោទថា ឃាត់ដំណើរការប្រមូលស្នាមមេដៃ របស់សកម្មជនគណបក្សសង្គ្រោះជាតិបានទេនៅថ្ងៃនេះ។
គណបក្សសង្គ្រោះជាតិ គ្រោងប្រមូលស្នាមមេដៃពីប្រជាពលរដ្ឋនៅរាជធានី-ខេត្ត ឲ្យបានជាង៣លាននាក់ ដើម្បីដាក់ញត្តិទៅអគ្គលេខាធិការអង្គការសហប្រជាជាតិ លោក បាន គីមូន និងប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស តាមរយៈតំណាងឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា។
ការប្រមូលស្នាមមេដៃរបស់គណបក្សសង្គ្រោះជាតិ ចាប់ផ្តើមពីថ្ងៃទី០៦ ខែតុលា ហើយនឹងបញ្ចប់នៅថ្ងៃ ទី២៣ខែតុលាដដែល។ ចាប់ពីការប្រមូលស្នាមមេដៃមក ដល់ថ្ងៃទី១៩ ខែតុលានេះ អាជ្ញាធរភូមិ-ឃុំ និងសង្កាត់មួយចំនួននៅខេត្ត កំពង់ចាម បាត់ដំបង សៀមរាប និង រតនៈគិរីជាដើម រងការចោទថា គំរាមកំហែងសកម្មជនគណបក្សសង្គ្រោះជាតិ ដែលដើរប្រមូលស្នាមមេដៃទាំងនោះ៕
No comments:
Post a Comment
yes