មេធាវីកម្ពុជាដែលតំណាងឲ្យសេដ្ឋីអចលនទ្រព្យរុស្ស៊ីឈ្មោះ Sergei Polonsky ដែលកំពុងជាប់ពន្ធនាគារបានថ្លែងកាលពីម្សិលមិញថា លោកបានដាក់បណ្តឹងចំនួនបួនទៅសាលាដំបូងខេត្ត ព្រះសីហនុ ដោយចោទប្រកាន់ពាណិជ្ជកររុស្ស៊ីដែលរស់នៅក្នុងប្រទេស កម្ពុជា ពីបទគំរាមយកប្រាក់ពីកូនក្តីរបស់លោកចំនួនរាប់រយលានដុល្លារនិងកំពុងរៀបចំបណ្តឹងចំនួន ១៧ ផ្សេងទៀតប្រឆាំងទៅលើមន្រ្តីកម្ពុជាជាច្រើនរូបដែលពាក់ព័ន្ធនឹងអំពើពុករលួយ។
ខណៈកំពុងសុំឲ្យមានការឃុំខ្លួនលោក Polonsky ក្នុងប្រទេសកម្ពុជាមុនធ្វើបត្យាប័នគាត់ទៅប្រទេសរុស្ស៊ីដើម្បី ប្រឈមមុខនឹងបទចោទប្រកាន់កិបកេងប្រាក់លោកមេធាវី រស់ ស៊ីថា បានថ្លែងថា លោកកំពុងរៀបចំបណ្តឹងចំនួន ១៧ ប្រឆាំងទៅលើមន្រ្តីកម្ពុជា «ពុករលួយ» និងពាណិជ្ជករ។
លោកបានថ្លែងបន្តថា៖ «លោកនៅមានសំណុំរឿងនៅសាលាដំបូងខេត្ត ព្រះសីហនុ នៅឡើយដូច្នេះយើងចង់ឲ្យតុលាការធ្វើការកាត់ទោសនៅទីនេះមុនពេលបញ្ជូនគាត់ទៅប្រទេស រុស្ស៊ី»។
ដីកាចាប់ខ្លួនសេដ្ឋីរូបនេះក្នុងប្រទេសរុស្ស៊ីពាក់ព័ន្ធករណីកិបកេងប្រាក់ ១៧៦ លានដុល្លារ ពីគម្រោងអភិវឌ្ឍន៍អចលនទ្រព្យ ត្រូវបានចេញកាលពីខែ សីហា។ អាជ្ញាធរកម្ពុជាបានចាប់ខ្លួនគាត់នៅ កោះ រ៉ុង ជិតឆ្នេរខេត្ត ព្រះសីហនុ កាលពីថ្ងៃ ទី១០ ខែ វិច្ឆិកា បន្ទាប់ពីមានសំណើពីប្រទេស រុស្ស៊ី សុំធ្វើបត្យាប័នគាត់។
លោក Polonsky ជាម្ចាស់ក្រុមហ៊ុនអចលនទ្រព្យឈ្មោះ Mirax ដែលបានបញ្ឈប់ប្រតិបត្តិការក្នុងឆ្នាំ ២០១១។ គាត់បានជាប់ពន្ធនាគាររយៈពេលជាង ៣ខែ ក្នុងខេត្ត ព្រះសីហនុ កាលពីដើមឆ្នាំនេះដោយត្រូវបានចោទប្រកាន់ពីបទប្រើអំពើហិង្សាទៅលើបុរសអ្នកបើកទូក ៦នាក់ ប៉ុន្តែក្រោយមកគាត់ត្រូវបានដោះលែងឲ្យនៅក្រៅឃុំ។
លោកបានថ្លែងថា លោកបានជួបជាមួយមន្រ្តីជាន់ខ្ពស់នៅក្រសួង យុត្តិធម៌ ប៉ុន្តែលោកមិនត្រូវបានប្រាប់ទេថា តើនៅពេលណាពួកគេធ្វើបត្យាប័ន Polonsky។
«Polonsky អាចប្រឈមមុខជាប់ពន្ធនាគារជាង ១០ឆ្នាំ ក្នុងប្រទេស រុស្ស៊ី ប្រសិនបើគាត់ត្រូវបានធ្វើបត្យាប័ន»។
លោក ប៊ូ ប៊ុនហាង ព្រះរាជអាជ្ញានៃសាលាដំបូងខេត្ត ព្រះសីហនុ ថ្លែងថា លោកមិនទាន់បានឃើញបណ្តឹងពីមេធាវីរបស់លោក Polonsky ទេ។
ប្រព័ន្ធផ្សព្វផ្សាយរបស់ រុស្ស៊ី បានរាយការណ៍កាលពីម្សិលមិញថា Alexander Karabanov មេធាវីរបស់ Polonsky បានថ្លែងថា កូនក្តីរបស់គាត់ត្រូវបានផ្តល់ឲ្យនូវសិទ្ធិជ្រោកកោនក្នុងនោះរួមទាំងអាមេរិក។ ប៉ុន្តែ លោក តិល សាមុត ដែលជាជំនួយការផ្ទាល់និងអ្នកបកប្រែឲ្យ Polonsky បានថ្លែងថា Polonsky ដឹងថាមិនមានការផ្តល់ឲ្យបែបនេះទេ។ លោកថា៖ «ខ្ញុំបានពិនិត្យព័ត៌មាននេះជាមួយគាត់ (Polonsky) ហើយ ប៉ុន្តែវាមិនផ្លូវការទេ វាគ្រាន់តែជាអ្វីដែលបានរាយការណ៍នៅក្នុងប្រព័ន្ធផ្សព្វផ្សាយ រុស្ស៊ី ប៉ុណ្ណោះ»។ លោកថា៖ «អ្វីដែលយើងកំពុងធ្វើសម្រាប់ករណីនេះនាពេលឥឡូវនេះគឺសុំអន្តរាគមន៍ពីក្រសួង យុត្តិធម៌ ឬអគ្គព្រះរាជអាជ្ញាសាលាឧទ្ធរណ៍រក្សាគាត់នៅក្នុងប្រទេសកម្ពុជាដើម្បីបញ្ចប់សំណុំរឿងតុលាការ របស់គាត់ជាមុនសិន។ ជម្រើសតែមួយប៉ុណ្ណោះគឺត្រូវរក្សាគាត់ឲ្យនៅក្នុងប្រទេសកម្ពុជា បន្តទៀត»៕
No comments:
Post a Comment
yes