(រូបថតដោយ ញឹម សុខន)
ព្រះសង្ឃ និងប្រជាពលរដ្ឋប្រមាណ៥០០នាក់ នៅម៉ោងជិត៩ព្រឹកថ្ងៃព្រហស្បតិ៍នេះ ចាប់ផ្តើមដើរដង្ហែចេញពីរមណីយដ្ឋានវត្តភ្នំ ឆ្លងតាមបណ្តោយមហាវិថីព្រះនរោត្តម ដើម្បីយកញត្តិទៅដាក់នៅក្រសួងកិច្ចការនារី ដោយអំពាវនាវដល់រាជរដ្ឋាភិបាលឲ្យបញ្ឈប់រាល់ហិង្សាលើស្ត្រីតវ៉ាដោយអហិង្សា។
អ្នកចូលរួមទាំងនោះមកពីសហគមន៍មានជម្លោះដីធ្លីចំនួន២០នៅរាជធានីភ្នំពេញ និងមកពីសហជីពកម្មករ ចំណីអាហារ និងសេវាកម្មជាដើម។ សកម្មជនដីធ្លីនៅតំបន់បឹងកក់ អ្នកស្រី យ៉ោម បុប្ផា ដែលទើបចេញពីមន្ទីរឃុំឃាំង កាលពីថ្ងៃទី២២ ខែវិច្ឆិកានេះ ក៏មានវត្តមានក្នុងការដើរដង្ហែនេះដែរ។ ចំណែក កម្លាំងនគរបាលជាង៥០នាក់ត្រូវបានដាក់ពង្រាយ ដើម្បីឃ្លាំមើលសកម្មភាពនេះ។
ប្រជាពលរដ្ឋក៏គ្រោងដើរដង្ហែទៅដាក់ញត្តិនៅអគ្គស្នងការដ្ឋាននគរបាលជាតិ ដើម្បីជំរុញឲ្យស្ថាប័ននេះចាត់ការពាក្យបណ្តឹងរបស់ខ្លួន។ អ្នកមានជម្លោះដីធ្លីរំលឹកថា កាលពីថ្ងៃទី២២ ខែកញ្ញា កម្លាំងនគរបាល និងកងរាជអាវុធហត្ថ ដែលមានដំបងឆក់ និងជំពាមកៅស៊ូ បានបង្ក្រាបតំណាងជាច្រើនរបស់អ្នកភូមិ ដែលត្រូវបានអាជ្ញាធរបណ្តេញចេញពីផ្ទះក្នុងសហគមន៍បឹងកក់ ខណៈពួកគាត់ធ្វើកូដកម្មអត់អាហារនៅរមណីយដ្ឋានវត្តភ្នំ។ ស្ត្រី៤នាក់រងរបួសដោយការបង្ក្រាបនេះ។
ពួកគាត់ឲ្យដឹងថា រហូតមកដល់ពេលនេះ គ្មានជនដៃដល់ណាម្នាក់ត្រូវបានចាប់ខ្លួនយកមកផ្តន្ទាទោសទ្បើយ៕
No comments:
Post a Comment
yes