ក្រុមមិត្ត១០ធ្នូ ដង្ហែធម្មយាត្រា-សិទ្ធិយាត្រា ពីខេត្តពោធិ៍សាត់ ប្តេជ្ញាបន្តដំណើរ ឆ្ពោះមកកាន់រាជធានីភ្នំពេញ ទោះបីជាជួបបញ្ហា ឬការរារាំងពីសំណាក់អាជ្ញាធរ មិនឲ្យស្នាក់អាស្រ័យនៅតាមទីវត្តអារាម ឬសាលារៀនក្តី។
តំណាងមិត្ត១០ធ្នូ មកពីខេត្តពោធិ៍សាត់ ព្រះតេជគុណ អូន ឡុង មានសង្ឃដីកាថា ក្បួនដង្ហែធម្មយាត្រា ដែលមានព្រះសង្ឃ និងពលរដ្ឋប្រមាណ៧៥អង្គនាក់ នៅថ្ងៃសៅរ៍នេះ បានធ្វើដំណើរមកដល់ចំណុចសាលាលេខ ៥ខេត្តកំពង់ឆ្នាំង ដោយប្រឈមនឹងបញ្ហាសុខភាពខ្លះ ប៉ុន្តែពួកគាត់ម្នាក់ៗ នៅតែមានភាពស្វាហាប់ក្លាហានបន្តដំណើរ ដើម្បីបំពេញបំណងប្រាថ្នាទាមទារការគោរពសិទ្ធិមនុស្សឲ្យបានពេញលេញនៅកម្ពុជា។
ព្រះអង្គមានសង្ឃដីកាបន្តថា ក្បួនដង្ហែនេះត្រូវបានរារាំងមិនឲ្យចូលស្នាក់អាស្រ័យនៅក្នុងវត្ត សាលារៀន ចំនួនពីរដងមកហើយ កាលពីថ្ងៃទី១ និងទី៦ ខែធ្នូ រហូតឈានដល់ការប្រទាញប្រទង់គ្នាខ្លះ រវាងអាជ្ញាធរ និងពលរដ្ឋ រហូតល់មានការបិទផ្លូវ តែករណីទាំងនេះ មិនចោទជាបញ្ហាធំដុំនោះទេ ដោយសារក្រោយមកមានការសម្របសម្រួលគ្នា។
នៅល្ងាចថ្ងៃសុក្រម្សិលមិញនេះ ប្រជាពលរដ្ឋហែក្បួន មកពីខេត្តកំពង់ស្ពឺ បាននាំគ្នាបិទកំណាត់ផ្លូវជាតិលេខ៤ ត្រង់ចំណុចជិតវត្តសាលូនពោធិ៍វង្ស ប្រមាណ៣ម៉ោង ដោយសារខឹងសម្បារនឹងអាជ្ញាធររារាំងក្បួនធម្មយាត្រា-សិទ្ធិយាត្រា មិនឲ្យចូលស្នាក់នៅក្នុងវត្ត ដោយសារតែមេគន់ខេត្ត បានគំរាមព្រះចៅអធិការវត្ត សាលូន ពោធិវង្ស មិនឲ្យក្រុមមិត្ត១០ធ្នូ ចូលសម្រាកក្នុងវត្ត។
ក្រុមមិត្ត១០ធ្នូ បានដើរក្បួនចាប់តាំងពីថ្ងៃទី១ ខែធ្នូនេះ ដោយចេញដំណើរពីខេត្តចំនួន៥ គឺខេត្តស្វាយរៀង ហែតាមផ្លូវជាតិលេខ១ ខេត្តកំពត ហែតាមផ្លូវជាតិ៣ ខេត្តកំពង់ស្ពឺ ហែតាមផ្លូវជាតិ៤ ខេត្តពោធិ៍សាត់ ហែតាមផ្លូវជាតិ៥ និងខេត្តកំពង់ធំ ហែតាមផ្លូវជាតិ៦ ដើម្បីមកជុំគ្នាធំនៅរាជធានីភ្នំពេញអបអរទិវាសិទ្ធិមនុស្សអន្តរជាតិលើក៦៥៕
No comments:
Post a Comment
yes