បន្លាលួសទាំងនេះ ត្រូវបានគេឃើញនៅតាមដងផ្លូវ មុខវត្តបទុមវតី រាជធានីភ្នំពេញ កាលពីថ្ងៃម្សិលមិញ ខណៈសង្គមស៊ីវិលរៀបចំប្រារព្ធទិវាសិទ្ធិមនុស្សនៅថ្ងៃនេះ។ រូបថត ហេង ជីវ័ន
ក្នុងរយៈពេល១០ថ្ងៃក្នុងការធ្វើដំណើរជាសមូហភាពក្នុងចម្ងាយ ប្រហែល១ពាន់គីឡូម៉ែត្រ ព្រះសង្ឃនិងអ្នកគាំទ្រប្រមាណ២៥០០ នាក់ដែលកំពុងដើរក្បួនពីខេត្តចំនួន ៥ផ្សេងគ្នា ត្រូវបានគេចាក់សោមិនឲ្យចូលវត្តនិងកើតជម្លោះជាមួយ អាជ្ញាធរមូលដ្ឋាន។
ក្នុងអំឡុងទិវាសិទ្ធិមនុស្សអន្តរជាតិ លើកទី៦៥ ថ្ងៃនេះ ព្រះសង្ឃនិងអ្នកគាំទ្រ បានព្យាយាមធ្វើការចរចាសុំឲ្យនគរបាលបើកផ្លូវ នៅក្នុងកិច្ចប្រឹងប្រែង ដើម្បីពាំនាំក្តីបារម្ភអំពីសិទ្ធិមនុស្សជាសារជូនទៅ រដ្ឋាភិបាល។
ព្រះតេជគុណ ប៊ុត ប៊ុនទិញ ស្ថាបនិកនៃបណ្តាញព្រះសង្ឃឯករាជ្យដើម្បីយុត្តិធម៌សង្គមបានមានសង្ឃដីកាថា៖ «យើងនឹងមិនផ្លាស់ប្តូរចិត្តទេ យើងនឹងដើរក្បួនឆ្ពោះទៅកាន់រដ្ឋសភា»។
ក្រសួងមហាផ្ទៃបានហាមប្រាមដាច់ខាត មិនឲ្យក្រុមណាមួយហែក្បួនទៅរដ្ឋសភា នៅថ្ងៃអង្គារនេះទេ។
ព្រះតេជគុណ ប៊ុនទិញ មានសង្ឃដីកាថា ប៉ុន្តែប្រសិនបើរដ្ឋាភិបាល ដាក់របាំងបិទផ្លូវ ព្រះសង្ឃនឹងបំបែកជាក្រុមតូចៗ និមន្តទៅជុំវិញពួកគេ។
ព្រះតេជគុណបន្តថា ផ្លូវធ្វើដំណើរមិនងាយស្រួលទេ សម្រាប់ក្រុមព្រះសង្ឃចំនួន ៥ក្រុម ដែលនិមន្តមកកាន់រាជធានីភ្នំពេញនៅថ្ងៃនេះ ប៉ុន្តែ ក្រុមសមូហភាពទាំងអស់អះអាងអំពីឆន្ទៈផ្លាស់ប្តូរថា គ្មានមន្រ្តីណាមានសិទ្ធិកំណត់ថា កន្លែងណាប្រជាជនអាចដើរបានឬកន្លែងណាមិនអាចដើរទៅបាននោះទេ។
ក្នុង ពេលសម្រាកអាហារថ្ងៃត្រង់កាលពីម្សិលមិញ នៅវត្តមួយ នៅផ្លូវជាតិលេខ៤ ក្នុងខណ្ឌពោធិ៍សែនជ័យ លោក ផល វណ្ណៈ ជាពលរដ្ឋម្នាក់ដែលបានដើរពីខេត្តកំពង់ស្ពឺមកជាមួយក្បួនធម្មយាត្រាមានគ្នាប្រហែល ១០០ នាក់ រួមទាំងព្រះសង្ឃ ៤៥ អង្គផងបានថ្លែងថា ក្រុមរបស់គាត់បានជ្រើសយកវិធានការតទល់ខ្លាំងក្លា នៅពេលដែលអាជ្ញាធរនិងថ្នាក់ដឹកនាំវត្តបន្តចាក់សោវត្តឲ្យ ពួកគេស្នាក់នៅខាងក្រៅ។
លោកថ្លែងថា កាលពីថ្ងៃសុក្រ ក្រុមរបស់លោកបានធ្វើការបិទផ្លូវជាតិលេខ៤ ក្នុងស្រុកសំរោងទងរយៈពេល ២ម៉ោងកន្លះ រហូតទាល់តែអាជ្ញាធរយល់ព្រមឲ្យពួកគាត់ចូលទៅក្នុងវត្ត។ ពួកគេបិទផ្លូវជាតិលេខបួនម្តងទៀតកាលពីម្សិលមិញ រហូតទាល់តែត្រូវបានអនុញ្ញាតឲ្យចូលទៅវត្តជម្ពូវ័ន ដែលនៅទីនោះ អាជ្ញាធរបានហាមមិនឲ្យសាធារណជនចូលទៅសាទរទេ។
លោក វណ្ណៈ បន្តថា៖ «ពួកគេមិនអនុញ្ញាតឲ្យយើងនិយាយច្រើនជាមួយសិស្សនិងប្រជាជន អំពីសិទ្ធិមនុស្សនោះទេ»។
លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា ដែលហែក្បួនជាមួយក្រុមព្រះតេជគុណ ប៊ុនទិញ ថ្លែងថា ប្រជាជននៅតាមផ្លូវនិងវត្តនៅពេលយប់មិនត្រូវបង្ខំឲ្យដេកនៅក្រោមដើមឈើទេ ពួកគេហាក់ដូចជាមានឆន្ទៈ ទទួលយកគំនិតថ្មីចំពោះសារស្តីពីសិទ្ធិមនុស្សដែលក្រុមអ្នកហែ ក្បួនផ្សព្វផ្សាយ។
ប៉ុន្តែ ជាការពិតអាជ្ញាធរមូលដ្ឋាននិងព្រះសង្ឃចៅអធិការវត្ត បានហាមឃាត់ក្រុមអ្នកហែក្បួន មិនឲ្យបង្ហាញអំពីតម្រូវការនៃការហែក្បួន។
លោក ជា មុនី ថ្លែងបន្តថា៖ « អ្វីដែលអាជ្ញាធរនិងមេដឹកនាំសង្ឃមួយចំនួនបានធ្វើ គឺជាការបំពានសិទ្ធិមនុស្ស»។ លោកបន្តថា៖ «វាបង្ហាញថា នៅក្នុងប្រទេសកម្ពុជាបញ្ហាសិទ្ធិមនុស្សមិនទាន់ត្រូវបានគោរពនៅឡើយ»។
ក្រៅពីក្បួនដង្ហែរបស់ក្រុមព្រះសង្ឃមកដល់រាជធានីភ្នំពេញនៅ ថ្ងៃនេះ ដែលព្រះតេជគុណបានព្យាករថា នឹងមកដល់នៅចន្លោះពីម៉ោង១០ព្រឹកទៅថ្ងៃត្រង់ ប្រសិនបើពួកគាត់មិនជួបឧបសគ្គតាមផ្លូវនោះ គណបក្សសង្គ្រោះជាតិ មានការយល់ព្រមពីរដ្ឋាភិបាល អនុញ្ញាតឲ្យមានការជួបជុំធ្វើបាតុកម្មរហូតដល់១ម៉ឺននាក់នៅ ទីលានប្រជាធិបតេយ្យ និងក្រុមសង្គមស៊ីវិលចំនួន៥ ពាន់នាក់នៅទីតាំងវត្តភ្នំដូនពេញ។
រដ្ឋាភិបាលចេញការហាម ប្រាមចំពោះការហែក្បួននៅថ្ងៃទិវាសិទ្ធិមនុស្ស គឺដើម្បីការពារករណីគ្រោះថ្នាក់ចរាចរណ៍។ នេះបើតាមអ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានប្រាប់ភ្នំពេញប៉ុស្តិ៍កាលពីម្សិលមិញ។ ដោយមិនគិតថា ពួកគេ មានចេតនាអ្វីនោះទេ តែគ្រប់ក្រុមទាំងអស់ត្រូវតែគោរពទៅតាមបទបញ្ជាខាងលើនេះ។
លោក ផៃ ស៊ីផាន បានថ្លែងអំពីក្រុមព្រះសង្ឃដែលនិមន្តហែក្បួនថា៖ «លោកត្រូវតែគោរពនយោបាយរបស់យើង។ ទាំងអស់គ្នាមានកាតព្វកិច្ចគោរពច្បាប់របស់ប្រទេស និងសហការជាមួយអាជ្ញាធរមូលដ្ឋាន»។
អ្នកនាំពាក្យកងរាជអាវុធហត្ថជាតិ លោក ខេង ទីតូ ថ្លែងថា នាយកដ្ឋានរបស់លោកនឹងបញ្ជូនមន្រ្តីយ៉ាងហោចចំនួន ៥០០នាក់ ទៅមើលតាមដានបាតុកម្មនៅថ្ងៃអង្គារនេះ។
លោក ខេង ទីតូ បានបន្តថា៖ «ប្រជាជនដែលហែក្បួនត្រូវតែគោរពបទបញ្ជារបស់ក្រសួងមហាផ្ទៃ និងសាលារាជធានី ហើយសហការជាមួយអាជ្ញាធរ ដើម្បីបញ្ចៀសនូវព្រឹត្តិការណ៍អាក្រក់កើតឡើង។ យើងនឹងរក្សាសន្តិសុខសាធារណៈ ឲ្យដូចថ្ងៃធម្មតា»។
លោក កែម ឡី អ្នកវិភាគនយោបាយឯករាជ្យ បានថ្លែងឲ្យដឹងពីថ្ងៃម្សិលមិញថា ការឆ្លើយតបដោយអហិង្សាពីខាងនគរបាល គឺជាចំណាត់ការដ៏ល្អប្រសើរបំផុតនៅពេលដោះស្រាយជាមួយ ក្រុមព្រះសង្ឃ ដែលព្រះតេជគុណ ប៊ុនទិញ មានសង្ឃដីកាថា នឹងអាចកើតមាន ប្រសិនបើមន្ត្រីនគរបាលនិងក្រុមអ្នកគាំទ្រប្រឈមដាក់គ្នា។
លោក កែម ឡី បន្តថា ការបាញ់កាំភ្លើងរបស់នគរបាលដែលបានសម្លាប់ប្រជាជន ដែលមិនពាក់ព័ន្ធនៅក្នុងករណីបាតុកម្មពីរផ្សេងគ្នា នៅស្ពានអាកាសក្បាលថ្នល់កាលពីថ្ងៃទី១៥ កញ្ញា និងក្នុងកុបកម្មរបស់កម្មកររោងចក្រកាត់ដេរ ក្នុងខណ្ឌមានជ័យ កាលពីថ្ងៃទី១២ ខែវិច្ឆិកា បានក្លាយជាភាពអាម៉ាស់ជាអន្តរជាតិ។ ប៉ុន្តែ អាជ្ញាធរទំនងនឹងចងចាំមេរៀននេះ។
លោកបន្ត ដោយសំដៅទៅលើករណីនគរបាលបាញ់ទៅលើក្រុមកម្មករដែលគាំទ្រកូដកម្មរបស់កម្មកររោងចក្រអេសអិលកាលពីខែមុនថា៖ «នគរបាលមិនអាចលាក់បាំងទង្វើរបស់ខ្លួនបានទេ ដោយសារឥឡូវនេះ មនុស្សគ្រប់គ្នាកំពុងតាមឃ្លាំមើល»។ លោកថា មិនថានគរបាលមានចេតនាអ្វីទេ ការតស៊ូដែលព្រះសង្ឃនិងក្រុមគាំទ្របានប្រឈមរហូតមកដល់ពេល នេះ គឺមិនបានធ្វើឲ្យព្រះតេជគុណ ប៊ុនទិញ រារែកឬក៏ភ័យខ្លាចនោះទេ។
ព្រះ តេជគុណ ប៊ុនទិញ មានសង្ឃដីកាថា៖ «យើងអាចបិទផ្លូវក្នុងខេត្តកំពង់ឆ្នាំង ហេតុអ្វីយើងមិនអាចធ្វើនៅក្នុងក្រុងភ្នំពេញ? អាត្មា កំពុងតែធ្វើការងាររបស់អត្មាតែប៉ុណ្ណោះ»៕
No comments:
Post a Comment
yes