ពលរដ្ឋដែលរងការបង្ខំឲ្យរុះរើផ្ទះពីដីគម្របព្រៃរដ្ឋ។ រូបថត សហការី
ប្រជាពលរដ្ឋចំនួន២៩គ្រួសារ រស់នៅក្នុងឃុំផ្ទះរុង ស្រុកភ្នំក្រវាញ ខេត្តពោធិ៍សាត់ ត្រូវអាជ្ញាធរស្រុក កោះហៅមកប្រាប់ឲ្យរុះរើផ្ទះសម្បែងកំពុងស្នាក់នៅលើដីគម្រប ព្រៃឈើ ក្នុងរយៈពេល ៣០ ថ្ងៃហើយព្រមានថា សមត្ថកិច្ចនឹងអនុវត្តវិធានការច្បាប់បើមិនធ្វើតាមការជូនដំណឹងនេះទេ។
លោក ឈន ឃន មេឃុំផ្ទះរុងបានថ្លែងឲ្យដឹងថា អាជ្ញាធរមូលដ្ឋានបានដាក់កំហិតឲ្យពួកគេរុះរើផ្ទះសម្បែងចេញ ក្នុងរយៈពេល៣០ថ្ងៃ បន្ទាប់ពីអាជ្ញាធរស្រុករកឃើញថា អ្នកស្រុកទាំងអស់នោះ កំពុងតាំងទីរស់នៅលើដីព្រៃគម្របរបស់រដ្ឋលើផ្ទៃដីប្រមាណជា ២០ហិកតា។
លោក បន្តថា៖«ពួកគេអះអាងថា គ្មានកន្លែងរស់នៅ ហើយដោយឃើញដីព្រៃនេះទំនេរ ក៏នាំគ្នាមកតាំងទីរស់នៅពេលថ្មីៗនេះ ហើយដោយសារតែជាដីគម្របព្រៃរបស់រដ្ឋ ទើបអាជ្ញាធរស្រុកមិនចង់មានបញ្ហាទៅថ្ងៃក្រោយ ទើបប្រាប់ឲ្យពួកគេរុះរើជាបន្ទាន់ ក្នុងរយៈពេល៣០ថ្ងៃ»។
លោក ហឹម សារឿន ពលរដ្ឋម្នាក់ដែលតម្រូវឲ្យរុះរើផ្ទះនេះដែរនិយាយថា កាលពីចុងសប្តាហ៍អាជ្ញាធរស្រុកបានប្រាប់ឲ្យពួកគាត់ ដោយព្រមានផង ឲ្យរុះរើផ្ទះសម្តែងក្នុងរយៈ៣០ថ្ងៃ បើមិនដូច្នេះទេ គេនឹងចាត់វិធានការតាមផ្លូវច្បាប់។
លោកនិយាយថា៖«យើងគ្មានកន្លែងនៅ ក៏នាំគ្នាមករស់នៅក្នុងឆ្នាំ២០០៤ មិនមែនទើបមករស់នៅថ្មីៗនេះទេ យើងដឹងថា ទីនេះដីរបស់រដ្ឋ តែពួកយើងជួបបញ្ហារស់នៅ ហេតុដូច្នេះយើងសូមឲ្យអាជ្ញាធរជួយរកដីទំនេរឲ្យពួកខ្ញុំរស់នៅ ផង»។
លោក ភួង សុធា មន្រ្តីសម្របសម្រួលសមាគមអាដហុកប្រចាំខេត្តពោធិ៍សាត់បានថ្លែង ថាតាមការពិនិត្យជាក់ស្តែងរបស់អាដហុកឃើញថា ពួកគេទើបរស់នៅថ្មីគ្មានដីចម្ការដាំដុះណាមួយនោះទេ តែអាជ្ញាធរក៏គួររកដំ-ណោះស្រាយសមរម្យផងដែរ។
លោកបន្តថា៖«ចៀសវាងការបណ្តេញចេញដោយបង្ខំអាជ្ញាធរគួររកដំណោះស្រាយ ទោះបីគាត់រស់នៅថ្មីៗក៏ដោយ»។
ច្បាប់ស្ដីពីការគ្រប់គ្រងព្រៃឈើ មាត្រាទី៩៧ ត្រង់ចំណុចទី៦: ការកាប់រានព្រៃ ឈូសឆាយដីព្រៃ ហ៊ុមព័ទ្ធកាន់កាប់ដីព្រៃ ត្រូវផ្ដន្ទាទោស ក្រោមបទល្មើសព្រៃឈើថ្នាក់ទី១ ដែលត្រូវជាប់ពន្ធនាគារពីប្រាំ ទៅដប់ឆ្នាំ និងត្រូវរឹបអូសវត្ថុតាងទាំងអស់ជាសម្បត្តិរដ្ឋ ដកហូតកិច្ចព្រមព្រៀង អាជ្ញាប័ណ្ណ លិខិតអនុញ្ញាត និងកម្ទេចចោលនូវវត្ថុតាងក្លែងទាំងនោះផង៕
No comments:
Post a Comment
yes