សកម្មភាពហែក្បួនរបស់ប្រជាពលរដ្ឋ មន្ត្រីរាជការ អង្គការសង្គមស៊ីវិល ក្នុងខួបលើកទី៦៥ ទិវាសិទ្ធិមនុស្សអន្តរជាតិ នៅក្រុងបានលុង ខេត្តរតនគិរី កាលពីថ្ងៃទី៩ ខែធ្នូ ឆ្នាំ២០១៣
អាជ្ញាធរខេត្តរតនគិរី រួមទាំងមន្ត្រីអង្គការសង្គមស៊ីវិល ប្រជាពលរដ្ឋសហគមន៍ជនជាតិដើមភាគតិច និងសិស្សានុសិស្ស បានរួមគ្នាប្រារព្ធខួបលើកទី៦៥ ទិវាសិទ្ធិមនុស្សអន្តរជាតិ ក្រោមប្រធានបទ យើងទាំងអស់គ្នារួមគ្នាលើកស្ទួយ និងការពារយុត្តិធម៌សង្គម។
មនុស្សប្រមាណ ៤០០នាក់ នាំមុខដោយក្រុមឆៃយ៉ាំ និងរថយន្តបំពងសំឡេង បានដង្ហែក្បួនចេញពីមន្ទីរវប្បធម៌ ដើម្បីរំលឹកទិវាសិទ្ធិមនុស្សអន្តរជាតិនាថ្ងៃច័ន្ទ ទី៩ ខែធ្នូ នាក្រុងបានលុង ខេត្តរតនគិរី។
ក្បួនធ្វើដំណើរអមដោយបដាពាក្យស្លោករំលឹកពីសិទ្ធិមនុស្ស បានដង្ហែចេញពីមន្ទីរវប្បធម៌ ធ្វើដំណើរឆ្ពោះមករង្វង់មូលខេត្ត ហើយបត់ទៅទិសខាងកើតតាមបណ្តោយផ្លូវជាតិលេខ៧៨ រហូតដល់ស្ថានីយសាំង សែម សឿន ទើបធ្វើដំណើរត្រឡប់ក្រោយបន្តដំណើរតាមផ្លូវជាតិលេខ៧៨ ដដែល ឆ្ពោះទៅស្ថានីយសាំង តេលា ទើបធ្វើដំណើរឆ្ពោះមករង្វង់មូលខេត្តវិញ ហើយបញ្ចប់ពិធីហែក្បួននៅមុខមន្ទីរវប្បធម៌ ដើម្បីប្រារព្ធមិទ្ទិញនៅទីនោះ។
អគ្គលេខាធិការអង្គការការពារសិទ្ធិមនុស្ស អាដហុក (Adhoc) លោក អ៊ិន គា បានកត់សម្គាល់ថា បរិបទនៃការគោរពសិទ្ធិមនុស្សនៅតែបន្តសកម្មភាពទៅមុខជានិច្ច បើទោះបីស្ថានភាពរំលោភសិទ្ធិមនុស្សនៅតែបន្តកើតមាននៅឡើយនៅប្រទេសកម្ពុជា។ លោកចាត់ទុកការចូលរួម និងការបើកទូលាយរបស់អាជ្ញាធរគ្រប់ខេត្តក្រុង នាឆ្នាំនេះ គឺជាដំណើរឆ្ពោះរកការគោរពសិទ្ធិមនុស្សកាន់តែប្រសើរ៖ «វាជាដំណាក់កាលមួយដែលយើងគិតថា យើងអាចធ្វើសកម្មភាពលើកស្ទួយសិទ្ធិមនុស្ស ជាការមួយដែលអាជ្ញាធរគ្រប់លំដាប់ថ្នាក់ឥឡូវនេះកំពុងតែមានការចាប់អារម្មណ៍ និងបើកចំហឲ្យយើងធ្វើកម្មវិធីនេះ ទាំងនៅរាជធានីភ្នំពេញ ទាំងនៅខេត្ត ជាពិសេសខេត្តរតនគិរី នេះ»។
តំណាងអភិបាលខេត្ត និងជាអគ្គនាយករដ្ឋបាលសាលាខេត្តរតនគិរី លោក សេក ហៃ មានប្រសាសន៍បញ្ជាក់ថា ការកែទម្រង់ស៊ីជម្រៅរបស់រាជរដ្ឋាភិបាលអាណត្តិទី៥ នេះ គឺជាផ្នែកមួយដ៏សំខាន់ទាក់ទិនទៅនឹងការគោរពសិទ្ធិមនុស្សកាន់តែប្រសើរឡើង។ លោកបន្តថា គោលនយោបាយលើកស្ទួយយុត្តិធម៌សង្គមក៏បានកំណត់នៅក្នុងកំណែទម្រង់ស៊ីជម្រៅរបស់រាជរដ្ឋាភិបាលដូចគ្នានេះដែរ៖ «រាជរដ្ឋាភិបាលបាន និងកំពុងប្រឹងប្រែងបង្ក្រាបបទល្មើសព្រៃឈើ និងការពារធនធានធម្មជាតិ ព្រមទាំងដោះស្រាយវិវាទដីធ្លីនៅសេសសល់ និងបន្តការពារករណីរំលោភសិទ្ធិដីធ្លីលំនៅឋាន ដោយសហការជាមួយអង្គការសង្គមស៊ីវិល»។
ចំណែកជនជាតិភាគតិចទំពួន នៅឃុំកិចុង ស្រុកបរកែវ លោក ហន់ រ៉ ចាប់អារម្មណ៍ដែរថា បើគ្មានសិទ្ធិមនុស្សទេ ជនជាតិដើមភាគតិចនឹងត្រូវបាត់បង់ប្រពៃណី វប្បធម៌ ជាពិសេសធនធានធម្មជាតិ ព្រៃឈើ ដីធ្លីសហគមន៍អស់គ្មានសល់។ លោកកត់សម្គាល់ថា ថ្វីត្បិតសិទ្ធិមនុស្សត្រូវបានលើកស្ទួយនៅតំបន់ជនជាតិដើម ប៉ុន្តែករណីរំលោភសិទ្ធិជនជាតិដើមនៅតែបន្តកើតមាន៖ «ស្ថានភាពបច្ចុប្បន្ន អ្នកខ្លះបានដឹងហៅថាផ្នែកច្បាប់សិទ្ធិមនុស្សប្រពៃណី បានថែរក្សា និងរៀបចំព្រៃអារក្ស ព្រៃកប់ខ្មោច ឬជាដីសហគមន៍ជាសមូហភាព គ្មានការរើសអើង គឺរួមគ្នា សាមគ្គីគ្នាដូចពីមុនដែរ។ ឥឡូវហ្នឹង មានដែរជនខ្លះរំលោភសិទ្ធិលក់ដី»។
ចូលរួមមតិក្នុងទិវាសិទ្ធិមនុស្សនេះដែរ ព្រះរាជអាជ្ញាអមសាលាដំបូងខេត្តរតនគិរី លោក លាវ ស្រេង បានចាត់ទុកបញ្ហាសិទ្ធិមនុស្ស គឺជាកត្តាសំខាន់ ហើយលោករំលឹកថា ប្រជាពលរដ្ឋមានសិទ្ធិសេរីស្មើៗគ្នា ក៏ប៉ុន្តែប្រជាពលរដ្ឋត្រូវគោរពសិទ្ធិអ្នកដទៃ និងច្បាប់ដែលបានកំណត់៖ «ខ្ញុំសុំចូលរួមរីករាយគាំទ្រ ចំពោះវេទិកានេះជាការរំលឹក ហើយស្នើសុំចំពោះពុកម៉ែបងប្អូនក្មួយៗទាំងអស់ ចងចាំសុំចាំ ហើយចាំទៀតថា យើងមានសិទ្ធិ ប៉ុន្តែសិទ្ធិយើងមានក្របខ័ណ្ឌ»។
មន្ត្រីអង្គការការពារសិទ្ធិមនុស្សអាដហុក សហការជាមួយអាជ្ញាធរខេត្តរតនគិរី រៀបចំទិវាសិទ្ធិមនុស្សឆ្នាំនេះ រួមជាមួយពាក្យស្លោកសំខាន់ៗដូចជា អំពើពុករលួយជាប្រភពនៃការរំលោភសិទ្ធិមនុស្ស និងច្បាប់ យើងទាំងអស់គ្នាត្រូវការតុលាការឯករាជ្យ ដើម្បីការពារ និងលើកស្ទួយយុត្តិធម៌សង្គម បំផ្លាញធនធានធម្មជាតិ គឺបំផ្លាញជាតិ និងបំផ្លាញខ្លួនឯង យើងទាំងអស់គ្នាត្រូវការសិទ្ធិសេរីភាពបញ្ចេញមតិ យើងទាំងអស់គ្នាមានកាតព្វកិច្ចលើកស្ទួយ និងការពារសិទ្ធិមនុស្ស យើងគ្រប់រូបមានសិទ្ធិទទួលបានព័ត៌មានជាសាធារណៈ ដោយចំហជាដើម៕
No comments:
Post a Comment
yes