ក្រុមបាតុករថៃដែលប្រឆាំងនឹងរដ្ឋាភិបាលលោកស្រី យីងឡាក់ ស៊ីណាវ៉ាត្រា គ្រវីទង់ជាតិពេលចូលដល់វិមានរដ្ឋាភិបាល កាលពីថ្ងៃអង្គារម្សិលមិញ។ រូបថត AFP
ប៉ូលិសថៃ បានបោះបង់ការការពារវិមានរដ្ឋាភិបាលរបស់ខ្លួន ដែលត្រូវបានឡោមព័ទ្ធកាលពីថ្ងៃអង្គារដោយអនុញ្ញាតឲ្យក្រុមអ្នក តវ៉ា ដែលពិបាកគ្រប់គ្រងឆ្លងកាត់របាំងការពារ នៅក្នុងទង្វើមួយ ដែលបានបន្ធូរភាពតានតឹង នៅមុនព្រះរាជពិធីចម្រើនព្រះជន្ម ព្រះមហាក្សត្រជាទីគោរពរបស់ពួកគេ។
ការប្រយុទ្ធតាមដងផ្លូវជាច្រើន ថ្ងៃរវាងបាតុករនិងកម្លាំងសន្តិសុខភ្លាមៗ ក៏បានបើកផ្លូវឲ្យមានការឱបរឹតគ្នានិងការញញឹមញញែមដាក់គ្នា បន្ទាប់ពីក្រុមប៉ូលិសបាននិយាយថា ពួកគេលែងប្រើកម្លាំងប្រឆាំងក្រុមអ្នកតវ៉ាដែលព្យាយាមសម្រុកចូល ការិយាល័យនាយករដ្ឋមន្ត្រី លោកស្រី យីងឡាក់ ស៊ីណាវ៉ាត្រា និងទីស្នាក់ការផ្ទាល់ខ្លួនផងដែរ។
មូលហេតុនៃការផ្លាស់ប្ដូរយុទ្ធសាស្ត្រភ្លាមៗនោះមិន ទាន់ច្បាស់នៅឡើយ ប៉ុន្តែប្រទេសនេះ កំពុងត្រៀមខ្លួនប្រារព្ធព្រះរាជពិធីចម្រើនព្រះជន្មាយុទី៨៦ របស់ព្រះមហាក្សត្រភូមិបុល អាឌុលយ៉ាដេតនៅថ្ងៃព្រហស្បតិ៍ជាថ្ងៃមួយដែលតាមធម្មតាបញ្ជាក់ពីស្មារតីស្ងប់ស្ងាត់ និងក្តីគោរពដ៏ជ្រាលជ្រៅចំពោះព្រះមហាក្សត្រ។
ប្រមុខក្រុមប្រឹក្សាសន្តិសុខជាតិ លោកផារ៉ាដន ផាត់តាណាតា បុត បានប្រាប់AFP ថា៖ «មានការយោគយល់គ្នាថា អ្វីគ្រប់យ៉ាងត្រូវតែស្ងៀមស្ងាត់និងមានរបៀបរៀបរយនៅថ្ងៃដ៏ល្អបវរនេះ»។
លោកបានបន្ថែមថា៖ «វាជាសញ្ញាវិជ្ជមានមួយ ហើយការចរចាអាចត្រូវធ្វើ បន្ទាប់ពីពិធីចម្រើនព្រះជន្មព្រះមហាក្សត្រ»។
ស្នងការ ប៉ូលិសក្រុងឧត្ដមសេនីយ៍ឯក កាំរ៉ុនវីត ធូកក្រាចាង បាន ប្រាប់ AFP ថា៖ «ថ្ងៃនេះ នឹងមិនមានការប្រើឧស្ម័នបង្ហូរទឹកភ្នែកទេ។ បើសិនយើងមិនព្រមចាញ់នោះនឹងមានការរងរបួសកាន់តែច្រើន ហើយយើងជាថៃទាំងអស់គ្នា»។
ការតវ៉ាដែលមានបំណងរំលំរដ្ឋាភិបាលលោកស្រីយីងឡាក់ និង ជំនួសវិញដោយ«ក្រុមប្រឹក្សាប្រជាជន»មួយ គឺជាភាពចលាចលថ្មីបំផុតក្នុងព្រះរាជាណាចក្រនេះចាប់តាំងពី ក្រុមឧត្ដមសេនីយ៍រាជានិយម បានបណ្ដេញបងប្រុសលោកស្រីយីងឡាក់ គឺលោក ថាក់ស៊ីន ក្នុងរដ្ឋប្រហារពី៧ឆ្នាំមុន។
មេដឹកនាំតវ៉ាលោក ស៊ូថេប ធឿកស៊ូបាន អតីតឧបនាយករដ្ឋមន្ត្រីបាននិយាយថា ការប្រយុទ្ធដើម្បីផ្តួលរំលំរដ្ឋាភិបាលនៅមិនទាន់ចប់ទេ។
លោក បានប្រាប់ក្រុមអ្នកគាំទ្រ ថា៖ «ជ័យជម្នះមួយផ្នែក ប៉ុន្តែ វាមិនទាន់ដល់ទីបញ្ចប់នៅឡើយ ព្រោះរបបថាក់ស៊ីន នៅនឹងកន្លែងនៅឡើយ។ អ្នកមិនអាចត្រឡប់ទៅវិញទេ។ យើងត្រូវតែបន្តការតស៊ូរបស់យើង»។
ជម្លោះនយោបាយដែលអូសបន្លាយ របស់ថៃនេះ ជាការតតាំងគ្នារវាងក្រុមឥស្សរជននៅក្នុងក្រុងបាងកកដែល គាំទ្រពីយោធា និងព្រះរាជវាំងប្រឆាំងនឹងក្រុមអ្នកបោះឆ្នោតវណ្ណៈកសិករជនបទ ដែលស្មោះត្រង់នឹង លោក ថាក់ ស៊ីន ដែលជាមហាសេដ្ឋីជំនួញ ក្លាយជានាយករដ្ឋមន្ត្រី។
នៅក្នុងរបត់ថ្មីបំផុតនេះ ក្រុមបាតុករត្រូវបានគេអនុញ្ញាតដោយមិននឹកស្មានឲ្យចូលទៅជិត ហើយក្រោយមកចូលទៅក្នុងបរិវេណនៃវិមានរដ្ឋាភិបាលដោយគ្មានការរារាំងពីកម្លាំងសន្តិសុខសោះ។ ពួកគេបានជួបជុំគ្នានៅក្នុងបរិវេណនោះ ប្រមាណជាមួយម៉ោង មុនពេលចាកចេញទៅវិញ។
ក្រុម អ្នកតវ៉ារាប់ពាន់នាក់ដែលភាគច្រើននៅតែពាក់ម៉ាស់មុខ និងវ៉ែនតាការពារប្រឆាំងនឹងឧស្ម័នបង្ហូរទឹកភ្នែក ក៏បានចូលទៅក្នុងទីស្នាក់ការប៉ូលិសក្រុងដែលពួកគេត្រូវបានមើល ឃើញថា កំពុងចាប់រលាក់ដៃជាមួយក្រុមមន្ត្រីប៉ូលិសផងដែរ។ គ្រឿងចក្រប៊ូលដូហ្ស៊ែរ១គ្រឿង ត្រូវបានគេប្រើដើម្បីឈូសរបាំងរាំងផ្លូវចេញ៕
No comments:
Post a Comment
yes