បណ្តាញសហគមន៍ការពារព្រៃឡង់ ប្រមាណជា៥០នាក់ នៅថ្ងៃអាទិត្យនេះ បានចុះល្បាតនៅចំណុចមួយនៃឃុំកំពង់ចាម ស្រុកសំបូរ ខេត្តក្រចេះ រកឃើញថា ក្រុមហ៊ុនស៊ីការអូទិច កំពុងតែកាប់ព្រៃឈើ ដោយមិន មានអាជ្ញាប័នស្របច្បាប់នោះទេ។
តំណាងបណ្តាញសហគមន៍ព្រៃឡង់ប្រចាំខេត្តក្រចេះ លោក មឿង ពៅ ប្រាប់ VOD នៅរសៀលថ្ងៃអាទិត្យ ទី ០១ ខែធ្នូនេះថា នៅថ្ងៃនេះលោកមានគ្នាប្រមាណជា៥០នាក់បានចុះល្បាតព្រៃរកឃើញថា ក្រុមហ៊ុនស៊ីការអូទិច មានម៉ាស៊ីនអារឈើប្រហែលជា៤០គ្រឿង បាននឹងកំពុងកាប់ព្រៃឈើ នៅត្រង់ចំណុច តាមូទឹកជ្រោះ ឃុំកំពង់ចាម ខេត្តក្រចេះ។ លោកបន្តថា នៅពេលដែលបណ្តាញសហគមន៍ព្រៃឡង់ចូល ទៅសាកសួរតំណាងក្រុមហ៊ុននោះ ឆ្លើយថាពួកគេមិនមានអាជ្ញាប័ននោះទេ ។
លោក មឿង ពៅ អំពាវនាវឲ្យរាជរដ្ឋាភិបាលកម្ពុជា ជួយពិនិត្យឡើងវិញ ករណីក្រុមហ៊ុនមួយចំនួន មិនមានអាជ្ញាប័នស្របច្បាប់ ដែលហ៊ានកាប់រានព្រៃឈើតាមអំពើចិត្ត ដោយមិនមានអាជ្ញាធរចុះទៅត្រួតពិនិត្យ។
ទាក់ទងនឹងការកាប់បំផ្លាញព្រៃឡង់នេះដែរ ក្រុមបណ្ដាញសហគមន៍ព្រៃឡង់ ខេត្តផ្សេងៗទៀតបានឲ្យដឹងថា ព្រៃឈើដែលសម្បូរទៅដោយជីវចម្រុះនេះ ត្រូវក្រុមឈ្មួញកាប់បំផ្លាញដោយខុសច្បាប់យ៉ាងអនាធិបតេយ្យ ហើយពលរដ្ឋសាមញ្ញក៏ពុំអាចទាញអនុផលពីព្រៃឡង់នេះបានជាលក្ខណៈ គ្រួសារដូចមុនទៀតឡើយ។
VOD មិនទាន់បានទាក់ទងក្រុមហ៊ុនស៊ីការអូទិច ឆ្លើយតបជុំវិញការចោទប្រកាន់របស់ប្រជា សហគមន៍នេះទេ។
ព្រៃឡង់គ្រប់ដណ្តប់លើខេត្តចំនួន៤គឺកំពង់ធំ ក្រចេះ ស្ទឹងត្រែង និង ខេត្តព្រះវិហារ កំពុងរងការ កាប់បំផ្លាញពីឈ្មួញ និង ក្រុមហ៊ុនដែលទទួលបានដីសម្បទានសេដ្ឋកិច្ច។
No comments:
Post a Comment
yes