រថយន្តដឹកឈើដែលគេកាប់ពីដែនជម្រកសត្វស្នួល ដឹកទៅលក់នៅវៀតណាម
សហការី
យ៉ាងហោចឈើប្រណីតប្រមាណជា៥០ម៉ែត្រគុប មានតម្លៃរាប់ម៉ឺនដុល្លារ ត្រូវគេកាប់ដឹកចេញជារៀងរាល់ថ្ងៃ យកទៅលក់ក្នុងប្រទេសវៀតណាម តាមច្រកស្រុកស្នួល ខេត្តក្រចេះ ដោយមិនឃើញមានការទប់ស្កាត់ពីអាជ្ញាធរមានសមត្ថកិច្ចណាឡើយ។
លោក ជា ហ៊ាន ប្រធានអង្គការប្រឆាំងអំពើ ពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិមនុស្ស (NRWPO) និងក្រុមការងារដែលបាននិងកំពុង ធ្វើការស្រាវជ្រាវពីបទល្មើសព្រៃឈើក្នុងខេត្តក្រចេះ បានអះអាងកាលពីម្សិលមិញថា ឈើប្រណីតប្រភេទធ្នង់ និងប្រភេទផ្សេងៗទៀត ក្នុងដែនជម្រកសត្វព្រៃស្នួល កំពុងរងការកាប់ ហើយដឹកចូលដីក្រុមហ៊ុនវៀតណាមប៊ិនភឿកII ដែលនៅជាប់ព្រំគ្នានឹងដែនជម្រកសត្វ។
លោក ជា ហ៊ាន បានបញ្ជាក់ថា៖«ពេលយប់ឡើង គេដឹកចេញពីក្រុមហ៊ុនតាមឡានច្នៃទៅលក់នៅវៀតណាម ដែលក្នុងមួយឡានមានប្រហែលជា៥ម៉ែត្រគុប ហើយរាល់យប់ៗ ដឹកចេញមិនតិចជាង១០ឡាន»។ លោកបន្តថា ទីតាំងក្រុមហ៊ុននោះ គឺស្ថិតនៅក្នុងភូមិប៉ោដើមស្វាយ ឃុំឃ្សឹម ស្រុកស្នួល និងនៅស្រុកកែវសីមា ខេត្តមណ្ឌលគិរី មានចម្ងាយប្រមាណ២៥គីឡូម៉ែត្រ ពីព្រំប្រទល់ កម្ពុជា-វៀតណាម។
លោកបន្ថែមថា នៅតាមផ្លូវមានប៉ុស្តិ៍នគរបាលប្រមាណជាបួនប្រាំកន្លែងដែរ ប៉ុន្តែគ្មានមន្រ្តីប៉ុស្តិ៍ណាមួយឆែកឆេរត្រួតពិនិត្យឈើទាំង នោះទេ។
លោក ជា ហ៊ាន និយាយថា៖ «បទល្មើសព្រៃឈើកើតឡើងខ្លាំង តែគ្មានអ្នកបង្រ្កាប ព្រោះឈ្មួញបង់លុយឲ្យមន្រ្តីបរិស្ថាន នគរបាល និងទាហាន។ ឈើ គឺសុទ្ធតែខុសច្បាប់។ បើឈើរបស់ក្រុមហ៊ុន ក៏គ្មានឃើញវាយត្រាបង់ពន្ធចូលរដ្ឋដែរ»។
ទាក់ទងទៅនឹងបទ ល្មើសព្រៃឈើនេះដែរ លោក សុក រដ្ឋា ជាអ្នកសម្របសម្រួលអង្គការអាដហុកប្រចាំខេត្តមណ្ឌលគិរីបានឲ្យដឹង ថា ឈើប្រភេទធ្នង់ នាងនួន និងបេង ជាដើម ត្រូវក្រុមឈ្មួញប្រមូលទិញទាំងអស់ មិនថា ឈើនោះជាឈើស្របច្បាប់ ឬខុសច្បាប់ទេ ហើយឲ្យតម្លៃមួយម៉ែត្រគុប យ៉ាងហោច១៥០ដុល្លារដែរ។ ប៉ុន្តែ ពេលពួកគេលក់ចេញទៅប្រទេសវៀតណាមវិញ តម្លៃឈើនេះអាចគុណនឹង៣ដងនៃតម្លៃដើម គឺ៤៥០ដុល្លារក្នុងមួយម៉ែត្រគុប។ ដោយឡែក ចំពោះឫស និងគល់ឈើធំៗវិញ ពួកគេទិញមួយគីឡូក្រាម តម្លៃពី២០ទៅ៣០ដុល្លារផ្សេងទៀត។
លោក សុក រដ្ឋា បានថ្លែងថា៖«មានឈ្មួញធំៗប្រហែលជា៤នាក់ គឺពួកគេតែងតែប្រមូលទិញ និងដឹកឈើទៅប្រទេសវៀតណាមនៅពេលយប់ៗតាមឡានធំៗ។ អ៊ីចឹងហើយយើងមានការពិបាកក្នុងការអង្កេតដែរពេលយប់»។ លោកបានឲ្យដឹងដែរថា ច្រកសំខាន់ៗ ដែលឈ្មួញដឹកឈើចេញ គឺមានច្រកកែវសីមា និងច្រកដាក់ឡាក់ ជាដើម។
ឆ្លើយតបទៅនឹងការចោទប្រកាន់នេះ មន្រ្តីមានសមត្ថកិច្ចបានបដិសេធពីការពាក់ព័ន្ធនឹងបទល្មើសព្រៃឈើនេះ។
លោក ញ៉ាន សោយ៉ុន នាយរងផ្នែកស្ថិតិនិងប្រធាននគរបាលអន្តរាគមន៍ស្រុកស្នួលអះអាងថា ទាំងលោក និងមន្រ្តីនគរបាលលោកដទៃទៀត មិនពាក់ព័ន្ធនឹងការកាប់ឬដឹកឈើខុសច្បាប់អស់នោះទេ។
ចំណែក លោក ទូច ប៊ុន្នី នាយផ្នែករដ្ឋបាលព្រៃឈើឃ្សឹម ស្រុកស្នួល បានអះអាងថា លោកមិនបានដឹងពីការដឹកឈើខុសច្បាប់ចេញទៅប្រទេសវៀតណាមដូចការ អះអាងនោះទេ។
លោក ទូច ប៊ុន្នី បានថ្លែងថា៖ «រឿងដឹកឈើនោះខាងខ្ញុំអត់បានដឹងទេ ណាមួយវាហួសពីដែនសមត្ថកិច្ចរបស់ខ្ញុំ បើឈើកាប់ក្នុងដែនជម្រកសត្វព្រៃ។ វាស្ថិតនៅក្រោមការគ្រប់គ្រងរបស់មន្រ្តីបរិស្ថាន»។
ទោះយ៉ាងណា លោក គង់ ងីម នាយដែនជម្រកសត្វព្រៃស្នួលក៏បដិសេធដូចគ្នាដែរថា មិនមានការកាប់ឈើក្នុងដែនជម្រកសត្វព្រៃដូចការចោទប្រកាន់នោះ ទេ ប៉ុន្តែ លោកថា សព្វថ្ងៃមានជនចំណាកស្រុកខ្លះកំពុងទន្រ្ទានកាប់ឆ្ការព្រៃយក ដីលក់ដោយខុសច្បាប់។
លោក គង់ ងីម បានបញ្ជាក់ថា៖ «ក្នុងដែនជម្រកសត្វមិនមានឈើធំៗសម្រាប់កាប់ទេ។ តែបើរឿងទន្រ្ទានកាប់ឆ្ការព្រៃយកដី គឺមានខ្លះ។ យើងមិនអាចទប់ស្កាត់ឈ្នះទេ ព្រោះជនចំណាកស្រុក ពេលខ្លះប្រើហិង្សាដាក់យើងក៏មាន ពេលចុះទៅបង្រ្កាប»៕
No comments:
Post a Comment
yes