លោក សម រង្ស៊ី ថ្លែងទៅកាន់អ្នកគាំទ្រនៅទីលានប្រជាធិបតេយ្យ
ថ្ងៃ១០ ធ្នូ ២០១៣
មេដឹកនាំគណបក្សសង្គ្រោះជាតិបានប្រកាសធ្វើតាមគំរូនៃអតីត ប្រធានាធិបតីអាហ្វ្រិកខាងត្បូង ណែលសុន ម៉ាន់ដឺឡា ក្នុងការទាមទារសិទ្ធិសេរីភាពជូនប្រជាជន ដោយអះអាងថា នឹងធ្វើការតស៊ូដើម្បីប្រជាធិបតេយ្យ សេរីភាពប្រជាជន ដោយមិនចាត់ទុកខ្មែរណាម្នាក់ជាសត្រូវឡើយ។
ថ្លែងទៅកាន់ ប្រជាជនរាប់ពាន់នាក់នៅទិវាសិទ្ធិមនុស្សអន្តរជាតិនៅទីលាន ប្រជាធិបតេយ្យក្នុងរាជធានីភ្នំពេញកាលពីម្សិលមិញ ប្រធានគណបក្សសង្គ្រោះជាតិ លោក សម រង្ស៊ី និងអនុប្រធានលោក កឹម សុខា ថ្លែងដោយមិនរំឭកឈ្មោះចំៗទៅប្រមុខរដ្ឋាភិបាលលោកនាយក រដ្ឋមន្ត្រី ហ៊ុន សែន ថា នៅពេលគណបក្សសង្គ្រោះជាតិទទួលបានអំណាច ខ្លួននឹងមិនចាត់ទុកខ្មែរណាម្នាក់ជាសត្រូវទេ។
លោកថ្លែងទៀតថា «ប្រសិនបើក្រុមអ្នកដឹកនាំកម្ពុជាណា ធ្លាប់ប្រព្រឹត្តអាក្រក់ឬប្រព្រឹត្តព្រៃផ្សៃទៅលើប្រជាជន ហើយមិនអាចដឹកនាំប្រទេសឲ្យរីកចម្រើន ពួកគេត្រូវតែចុះចេញពីអំណាច ហើយគណបក្សសង្គ្រោះជាតិនឹងមិនដាក់ទោសគេទេ ហើយក៏មិនចាត់ទុកថាជាសត្រូវដែរ»។
លោក សម រង្ស៊ី បានថ្លែងថា៖ «របបលោក ណែលសុន ម៉ាន់ដឺឡា បានធ្វើឲ្យមានប្រជាធិបតេយ្យពិតប្រាកដ ដែលបានចាក់ឫសគល់ក្នុងប្រទេសអាហ្វ្រិកខាងត្បូង។ ប្រទេសនេះមានសន្តិភាពទាំងសកម្មភាពនិងសីលធម៌ ដែលយើងចង់បាន...ដូច្នេះ ថ្ងៃនេះពិភពលោកទាំងមូលកំពុងគោរពវិញ្ញាណក្ខន្ធលោក ម៉ាន់ដឺឡា។ ខ្ញុំក៏សូមឲ្យទាំងអស់គ្នា គិតទៅដល់គំរូវីរភាពលោក ម៉ាន់ដឺឡា ហើយគណបក្សសង្គ្រោះជាតិ យើងធ្វើតាមគំរូរបស់លោក ហើយយើងនឹងទទួលបានជោគជ័យដូចនៅប្រទេសអាហ្វ្រិកដែរ»។
លោក កឹម សុខា ក៏បានថ្លែងដែរថា ប្រជាជនមានអាយុ១៨ឆ្នាំឡើងទៅ ពួកគេមានសិទ្ធិសម្រេចចិត្តជ្រើសរើសមេដឹកនាំ និងមានសិទ្ធិបោះឆ្នោតទម្លាក់មេដឹកនាំខ្លួនទៅតាមឆន្ទៈ ប៉ុន្តែ ចាប់តាំងពីអាណត្តិទី២ រហូតដល់អាណត្តិទី៥ ប្រជាជនមិនមានសិទ្ធិពេញលេញ ដើម្បីធ្វើការសម្រេចជ្រើសរើសមេដឹកនាំខ្លួន ព្រោះតែសិទ្ធិពួកគេត្រូវគេលួច។
លោក កឹម សុខា ថ្លែងថា៖ «ដូច្នេះ ថ្ងៃ នេះសារនយោបាយដែលគណបក្សសង្គ្រោះជាតិចង់ផ្ញើទៅមតិជាតិ អន្តរជាតិនៅថ្ងៃទិវាសិទ្ធិមនុស្សអន្តរជាតិទី៦៥ ថ្ងៃទី១០ ធ្នូនេះ គឺយើងទាំងអស់គ្នាជាខ្មែរ យើងត្រូវការផ្លាស់ប្តូរមេដឹកនាំបច្ចុប្បន្នចេញ»។
លោក កឹម សុខា បានប្រាប់ទៅអ្នកគាំទ្រថា គណបក្សសង្គ្រោះជាតិព្រមចូលរួមក្នុងកំណែទម្រង់ជាមួយគណបក្ស ប្រជាជនកម្ពុជា ប៉ុន្តែ គណបក្សប្រជាជនកម្ពុជាត្រូវតែរៀបចំឲ្យមានការបោះឆ្នោតឡើងវិញ ជាបន្ទាន់ដែរ បើមិនដូច្នោះទេ មេដឹកនាំគណបក្សកាន់អំណាចត្រូវតែចុះចេញពីអំណាច។
ខណៈមេ ដឹកនាំគណបក្សប្រឆាំងថ្លែងពីការមិនយកអ្នកណាជាសត្រូវនៅទីលាន ប្រជាធិបតេយ្យនោះ អ្នកថតវីដេអូរបស់ទូរទស្សន៍ជាតិកម្ពុជា លោក សេង ចាន់ ដែលបានចូលទៅយកព័ត៌មានក្នុងហ្វូងមនុស្សនៅមុខវេទិកាមេដឹក នាំគណបក្សសង្គ្រោះជាតិ ស្រាប់តែត្រូវបានវាយនិងបណ្តេញចេញពីទីនោះដោយក្រុមអ្នកចូល រួមមួយចំនួនដែលចាត់ទុកថា ជាក្រុមអ្នកគាំទ្រគណបក្សប្រជាជន។
លោក សេង ចាន់ បានប្រាប់ថា គាត់ក្រុមអ្នកគាំទ្រវ៉ៃប្រហែល១០ដៃ ត្រូវក្បាលនិងកញ្ចឹងក បន្ទាប់ពីភិក្ខុមួយអង្គសួរថា «ធ្វើការនៅទូរទស្សន៍ណា? និងតបថា នៅទូរទស្សន៍ជាតិកម្ពុជា។
លោក សេង ចាន់ បន្តថា ៖ «ភិក្ខុអង្គនោះមានសង្ឃដីកាថា អ្នកមិនត្រូវថតរូប ដែលទូរទស្សន៍ជាតិនេះមិនដែលចាក់ផ្សាយទេ។ ចេញពីទីនេះទៅ។ ខ្ញុំទូលទៅលោកវិញថា ខ្ញុំករុណាចាក់ផ្សាយ ប៉ុន្តែព្រះអង្គមិនដែលបានទត»។ លោកថា ស្រាប់ភិក្ខុអង្គនោះបានវ៉ៃគាត់មួយដៃ ហើយអ្នកដទៃទៀត ក៏ស្ទុះមកវាយគាត់នឹងដៃនិងដបទឹក ប៉ុន្តែ សំណាងបានសន្តិសុខគណបក្សនេះជួយ។
ទាក់ទិននឹងអំពើហិង្សានេះ អគ្គនាយកទូរទស្សន៍ជាតិលោក កឹម គុណវឌ្ឍន៍ បានថ្លែងថា មេដឹកនាំគណបក្សសង្គ្រោះជាតិត្រូវតែយល់ថា នេះជាអំពើអមិត្ត ហើយសកម្មភាពនេះអាចធ្វើឲ្យមានភាពអមិត្តកាន់តែធំទៅៗ នៅកម្ពុជា។
លោកបន្តថា៖ «ការចូលរួម គឺជាសិទ្ធិរបស់អ្នកសារព័ត៌មាន។ នេះជាការរើសអើង ហើយការរើសអើងបែបនេះធ្វើឲ្យជាតិបែកបាក់»។
ក្នុងទំព័រ ហ្វេសបុក រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានសរសេរដែរថា៖« ទាមទារឲ្យគេផ្សាយពីខ្លួន ដល់ ទ.ទ.កទៅបែរជាដេញវាយអ្នកយកព័ត៌មានដូចឆ្កែឆ្មា។ ឥឡូវសូមកុំបន្ទោសគេរឿងមិនផ្សាយ ។ មិនទាន់កាន់អំណាចផង ឫកដូចឆ្កែបានជិះឡាន»។
ប៉ុន្តែ អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានតបនឹងបញ្ហានេះថា លោកមិនបានទទួលព័ត៌មាន អំពីករណីហិង្សានេះទេ ហើយបានបញ្ជាក់ថា នេះគ្រាន់តែជាការឈ្លោះគ្នាទៅវិញទៅមកប៉ុណ្ណោះ។
លោក ថ្លែងបន្តថា៖ «យើងស្វាគមន៍អ្នកកាសែតទាំងអស់ដោយមិនរើសអើង បើទោះជាពួកគេសរសេរអ្វីក៏ដោយ វាជាសិទ្ធិរបស់ពួកគេ។ ដូច្នេះ វាមិនមែនជាគោលការណ៍របស់គណបក្សសង្គ្រោះជាតិទេ។ គោលការណ៍របស់គណបក្សសង្គ្រោះជាតិ គឺអហិង្សា»៕
No comments:
Post a Comment
yes