កម្មកររោងចក្រ មេតថេក ខេមបូឌា (Medtecs Cambodia Co Ltd) ប្រមាណ
ជិត ៣ពាន់នាក់ បន្តធ្វើកូដកម្មទាមទារប្រាក់ខែគោល ១៦០ដុល្លារ
នាខេត្តកំពង់ចាម នៅថ្ងៃទី៣ ខែមករា ឆ្នាំ២០១៤
តំណាងសហជីពនៅខេត្តកំពង់ចាម រងការគំរាមចោទប្រកាន់ពីសំណាក់រោងចក្រ ថាបានធ្វើសកម្មភាពញុះញង់ឱ្យកម្មករធ្វើបាតុកម្មនៅពេលកន្លងទៅ។ តំណាងកម្មករបានលើកឡើងថា ពួកគាត់មិនបានធ្វើខុសនោះទេ គ្រាន់តែធ្វើការទាមទារប្រាក់ខែគោលដើម្បីការរស់នៅសមរម្យរបស់កម្មករតែប៉ុណ្ណោះ។
ប្រធានសម្ព័ន្ធសហជីពកម្ពុជានៃរោងចក្រ មេតថេក ខេមបូឌា (Medtecs Cambodia Co., Ltd) លោក ចន ធាង បានមានប្រសាសន៍ថា ក្រុមសហជីពលោក ៤ ត្រូវបានខាងភាគីរោងចក្រព្យួរការងាររយៈពេល ៤ខែ ដោយគិតថ្លៃឈ្នួល ៥០ភាគរយ និងគំរាមថា នឹងដាក់ពាក្យប្ដឹងទៅតុលាការពីបទបានញុះញង់កម្មករឱ្យធ្វើបាតុកម្មកន្លងទៅ។ លោកបន្តថា ការធ្វើបែបនេះវាជារឿងមិនត្រឹមត្រូវ ពីព្រោះលោកបានធ្វើតាមការចង់បានរបស់កម្មករ ចំពោះការដំឡើងប្រាក់ខែគោលសមរម្យសម្រាប់ការរស់នៅក្នុងសង្គម។
លោក ចន ធាង៖ «និយាយរួម ទាក់ទងនឹងការធ្វើកូដកម្មហ្នឹង ទាក់ទងពីច្បាប់ អ៊ីចឹងទៅខ្ញុំមិនថា វាមិនមែនជាការខុសអីដែរ។ យើងរហូតដល់ដាក់ទៅតុលាការទាក់ទងនឹងអ្វីដែលមើលទៅមានភាពភ័យខ្លាច។ ខ្ញុំមើលទៅដូចជាវាមិនគួរសោះ។ និយាយទៅខ្ញុំអត់មានការព្រួយបារម្ភ ពីព្រោះអីអានេះគឺជារឿងមួយដែលថា យើងធ្វើទូទាំងប្រទេស ហើយអ្វីដែលយើងធ្វើ គឺទាក់ទងទៅនឹងផលប្រយោជន៍រួម ទាក់ទងរឿងប្រាក់ជួយបងប្អូនកម្មករ»។
លោកបន្ថែមទៀតថា ពួកគាត់ ៣នាក់ផ្សេងទៀត កាលពីថ្ងៃ១០ មករា ត្រូវបានភាគីរោងចក្របណ្ដេញចេញមិនឱ្យធ្វើការ។ ខាងលោកបានត្រៀមមេធាវីរួចរាល់ហើយ ចំពោះការប្ដឹងពីសំណាក់ភាគីរោងចក្រ។
បញ្ហានេះ អតីតប្រធានផ្នែករដ្ឋបាលនិងបច្ចុប្បន្នជាអ្នកបកប្រែ លោក សម សីហា បានមានប្រសាសន៍ថា លោកមិនទាន់បានដឹងចំពោះករណីរោងចក្រប្ដឹងប្រធានសហជីពនោះទេ ពីព្រោះលោកមិនមែនជាអ្នករត់ការក្នុងរឿងនោះ។ ដោយឡែក នៅថ្ងៃ១១ មករា នេះ កម្មករបាននាំគ្នាវិលត្រឡប់ចូលធ្វើការស្ទើរតែទាំងអស់ហើយ៖ «អត់ច្បាស់ទេ ប៉ុន្តែពេលខ្ញុំទៅធ្វើការល្ងាចមិញឃើញមនុស្សទៅច្រើន កម្មករទៅច្រើន ខ្ញុំមិនបានសួរខាងរដ្ឋបាលថាចូលពេញអត់ខ្ញុំមិនដឹងទេ»។
រីឯអភិបាលរងខេត្តកំពង់ចាម និងជាប្រធានដោះស្រាយទំនាស់បាតុកម្មនិងកូដកម្ម លោក ជីម លាវ បានមានប្រសាសន៍ថា លោកក៏មិនទាន់បានដឹងចំពោះករណីថា មានការប្ដឹងសហជីពរោងចក្រនោះទេ ប៉ុន្តែលោកបានទទួលដំណឹងថា មិនមានបញ្ហាអ្វីកើតឡើងលើពួកគាត់នោះឡើយ៖ «អត់ដឹងថាយ៉ាងម៉េចទេនេះ! គ្រាន់តែដឹងថា ព័ត៌មានបឋម ខ្ញុំបានសួរគេថា តំណាងសហជីពហ្នឹងយ៉ាងម៉េចដែរ ថាគេបានបើកប្រាក់ខែជូនឱ្យតំណាងសហជីពរួចអស់ហើយ។ ហើយទីពីរ ខ្ញុំសួរថា តើមានបញ្ហាអ្វីដែរក្រោយពីរោងចក្របើកប្រាក់ខែហើយ? គេថា ទាំងកម្មករ ទាំងសហជីព មិនមានបញ្ហាអ្វីនោះទេ។ ទាំងកម្មករទាំងសហជីពចូលធ្វើការវិញទាំងអស់»។
លោកបញ្ជាក់ថា ប្រសិនបើមានករណីបែបនេះមែន នោះខាងលោកនឹងដើរតួជាអ្នកសម្របសម្រួលភាគីទាំងពីរ ដើម្បីកុំឱ្យមានបញ្ហាកើតឡើងតទៅទៀត ដែលវានឹងអាចធ្វើឱ្យកម្មករឈានទៅដល់ការផ្ទុះបាតុកម្មសាជាថ្មីនោះ៕
No comments:
Post a Comment
yes